ޕާކިސްތާނުގެ ހަނގުރާމަމަތީ ބޯޓުތަކުން އަފްޣާނިސްތާނުގެ ވެރިރަށް ކާބުލް އަށް ބޮން އަޅާ ހަނގުރާމަ އިއުލާނު ކޮށްފި
27 ފެބުރުއަރީ 2026 | ހުކުރު 02:16ޕާކިސްތާނުގެ އަސްކަރީ މަތިންދާބޯޓުތަކުން އަފްޣާނިސްތާނުގެ ވެރިރަށް ކާބުލްއަށާއި ކަންދަހާރުގައި ހުންނަ އަސްކަރީ މަރުކަޒަކަށް ވަރުގަދަ ވައިގެ ހަމަލާތަކެއް ދީފި. ހުކުރު ދުވަހުގެ ފަތިހު ދިން މި ހަމަލާތަކަށް ރައްދުދިނުމުގެ ގޮތުން އަފްޣާނިސްތާނުގެ ސިފައިން ވަނީ އެންޓި-އެއާކްރާފްޓް ބަޑި ބޭނުންކޮށްގެން ޕާކިސްތާނުގެ ބޯޓުތަކަށް ހަމަލާދީފައި.
2025 ވަނަ އަހަރުގެ އޮކްޓޫބަރު މަހު ޕާކިސްތާނާއި އަފްޣާނިސްތާނުގެ ސިފައިންގެ މެދުގައި ބަދަލުކުރެވުނު ހަމަލާތަކަށްފަހު، ކަންދަހާރު ޕްރޮވިންސްގެ ސްޕިން ބޯލްޑަކް ސަރަހައްދުގައި ހުންނަ އަފްޣާނިސްތާނާއި ޕާކިސްތާނު ގުޅޭ ބޯޑަރު ކައިރީގައި އަފްޣާން ތާލިބާން ހަނގުރާމަވެރިން ފޯރިމަރަމުންދަނީ (ފައިލް). | ރޮއިޓާސް
ޕާކިސްތާނުގެ އަސްކަރީ މަތިންދާބޯޓުތަކުން އަފްޣާނިސްތާނުގެ ވެރިރަށް ކާބުލްއަށް ބޮން އަޅައިފިއެވެ. ދެ ގައުމު ގުޅޭ ބޯޑަރު ސަރަހައްދުގައި ހުރި ޕާކިސްތާނުގެ އަސްކަރީ މަރުކަޒުތަކަށް އަފްޣާނިސްތާނުގެ ސިފައިން ދިން ހަމަލާތަކާ ގުޅިގެން ދެ ގައުމުގެ ދެމެދުގައި ކުރިމަތިލުންތައް ވަރުގަދަވެފައިވާއިރު، އިސްލާމްއާބާދުން މިހާރު ވަނީ އަފްޣާނިސްތާނާ ދެކޮޅަށް "ފާޅުކަން ބޮޑު ހަނގުރާމައެއް" އިއުލާންކޮށްފައެވެ.
ކާބުލްގައި ހުރި އަލްޖަޒީރާގެ ރިޕޯޓަރު ނާސިރު ޝަދީދު ހުކުރު ދުވަހުގެ ފަތިހު ރިޕޯޓުކޮށްފައިވާ ގޮތުގައި، އެ ގައުމުގެ ގަޑިން މެންދަމު 1:50 ހާއިރު ޕާކިސްތާނުން ވަނީ ކާބުލްއަށް ބޮން އަޅާފައެވެ. އަދި އޭގެ ކުޑަވަގުތުކޮޅެއް ފަހުން ދެވަނަ ވައިގެ ހަމަލާއެއްވެސް ވަނީ ދީފައެވެ.
އަލް ޖަޒީރާ އިން ރިޕޯޓުކޮށްފައިވާ ގޮތުގައި، ޕާކިސްތާނުގެ ފުރަތަމަ ވައިގެ ހަމަލާއާއެކު އަފްޣާނިސްތާނުގެ އެންޓި-އެއާކްރާފްޓް ބަޑިތަކުން ހަމަލާދޭން ފަށާފައިވެއެވެ. އަދި ދެވަނަ ހަމަލާއަށް ފަހުވެސް އަފްޣާނިސްތާނުން ދިޔައީ މެދުނުކެނޑި ބަޑިޖަހަމުންނެވެ.
އަފްޣާނިސްތާނުގެ ސަރުކާރުގެ މަސްދަރަކުން އަލްޖަޒީރާއަށް ކަށަވަރުކޮށްދީފައިވާ ގޮތުގައި، ޕާކިސްތާނުގެ ވައިގެ ހަމަލާތައް ކާބުލްގެ އިތުރުން އެ ގައުމުގެ ދެކުނުގައި އޮންނަ ކަންދަހާރު ޕްރޮވިންސްގައި ހުންނަ އަސްކަރީ މަރުކަޒަކަށްވެސް ވަނީ އަމާޒުވެފައެވެ.
