ޕާކިސްތާނުން އަފްޣާން ބޯޑަރަށް ވަރުގަދަ ވައިގެ ހަމަލާތަކެއް ދީފި
ޕާކިސްތާނުން އަފްޣާނިސްތާނުގެ ބޯޑަރު ސަރަހައްދަށް ދިން ވަރުގަދަ ވައިގެ ހަމަލާތަކެއްގައި ހަނގުރާމަވެރިންގެ މަރުކަޒުތަކެއް ހަލާކުކޮށްލައި 26 މީހުން މަރާލާފައިވާ ކަމަށް އެ ގައުމުގެ ސަރުކާރުން ބުނެފި. ނަމަވެސް ތާލިބާން ސަރުކާރުން މިކަން ދޮގުކޮށް ބުނެފައިވަނީ މި ހަމަލާތަކުގައި މަރުވި 13 މީހުންގެ ތެރޭގައި ގިނައީ ކުޑަކުދިން ކަމަށް. ޕާކިސްތާނުން މި ހަމަލާތައް ދީފައިވަނީ އެ ގައުމަށް ދޭ ޓެރަރިސްޓް ހަމަލާތަކަށް އަފްޣާނިސްތާނުން ހިމާޔަތްދޭ ކަމަށް ތުހުމަތުކުރުމަށްފަހު ކަމަށްވާއިރު، މިއީ ފާއިތުވި މަސްތަކުގައި ދެ ގައުމުގެ މަސްރަހު މިހާ ބޮޑަށް ގޯސްވި ފުރަތަމަ ފަހަރު.
ޕާކިސްތާނުގެ ސަރަހައްދުތަކަށް ބޯޑަރު ހުރަސްކޮށް ދެމުންދާ ހަމަލާތަކުގެ ފަހަތުގައިވާ ހަރުކަށި ފިކުރުގެ މީހުންނަށް އަފްޣާނިސްތާނުން ހިމާޔަތްދޭ ކަމަށް ބުނެ އިސްލާމްއާބާދުން ކުރާ ތުހުމަތުތަކާ ގުޅިގެން، ދެ ގައުމުގެ މެދުގައި ހަމަނުޖެހުންތައް ހިނގަމުންދާތާ މިހާރު މަސްތަކެއް ވެއްޖެ. | ގެޓީ އިމޭޖަސް
ޕާކިސްތާނާއި އަފްޣާނިސްތާނު ގުޅޭ ބޯޑަރު ސަރަހައްދަށް ޕާކިސްތާނުން ވަރުގަދަ ވައިގެ ހަމަލާތަކެއް ދީފިއެވެ. މިއީ ހަމަނުޖެހުން ބޮޑު އެ ސަރަހައްދުގައި ފާއިތުވި މަސްތަކުގައި އޮތް ހަމަހިމޭންކަމަށްފަހު ދިން ފުރަތަމަ ހަމަލާތަކެވެ.
ޕާކިސްތާނުގެ އިންފޮމޭޝަން މިނިސްޓަރު އަތާއުﷲ ތަރާރު ބުދަ ދުވަހު ވިދާޅުވީ، އަމާޒުތަކަށް ބަލައިގެން ދިން މި ހަމަލާތަކުގައި ހަނގުރާމަވެރިންގެ ހަތަރު މަރުކަޒެއް ހަލާކުކޮށްލާފައިވާ ކަމަށާއި، މި ހަމަލާތަކުގައި 26 ހަނގުރާމަވެރިން މަރުވެފައިވާ ކަމަށެވެ. ނަމަވެސް އަފްޣާނިސްތާނުގެ ތާލިބާން ސަރުކާރުން މީގެ ކުރިން ބުނެފައިވަނީ، ޕާކިސްތާނުން ތިން ޕްރޮވިންސަކަށް ދިން ހަމަލާތަކުގައި 13 މީހުން މަރުވެފައިވާ ކަމަށާއި، އޭގެ ތެރޭގައި 11 ކުޑަކުދިން ހިމެނޭ ކަމަށެވެ.
ޕާކިސްތާނުގެ ފަސްގަނޑުގައި ޓެރަރިސްޓް ހަމަލާތައް ދޭ މީހުންނަށް އަފްޣާނިސްތާނުން ހިމާޔަތްދޭ ކަމަށް ޕާކިސްތާނުން ތުހުމަތުކުރާތާ ގިނަ ދުވަސްތަކެއް ވެފައިވީ ނަމަވެސް، ތާލިބާން ސަރުކާރުން އެ ތުހުމަތުތައް ދޮގުކުރެއެވެ.
މި ފަހަރުގެ ކުރިމަތިލުމަކީ، ބޯޑަރު ސަރަހައްދުގައި ހިނގި ހަމަނުޖެހުންތަކެއްގައި އެތައް ސަތޭކަ ބަޔަކު މަރުވި ފެބްރުއަރީ މަހަށްފަހު، ދެ ގައުމުގެ ދެމެދުގައި މަސްރަހު މިހާ ބޮޑަށް ގޯސްވި ފުރަތަމަ ފަހަރެވެ.
ހަފުތާތަކެއް ވަންދެން ކުރިއަށްދިޔަ ނުރައްކާތެރި ކުރިމަތިލުންތަކަށްފަހު، މިދިޔަ އޮކްޓޯބަރު މަހު ދެ ގައުމުން ވަނީ ހަމަލާ ބަދަލުކުރުން ހުއްޓާލުމުގެ އެއްބަސްވުމަކަށް އައިސްފައެވެ.
ޕާކިސްތާނުގެ އިންފޮމޭޝަން މިނިސްޓަރު އަތާއުﷲ ތަރާރު ވިދާޅުވީ، މި ހަމަލާތަކަކީ ފަހަކަށް އައިސް ޕާކިސްތާނުގައި ހިނގާފައިވާ ޓެރަރިސްޓް ހާދިސާތަކަށް ރައްދު ދިނުމުގެ ގޮތުން ދިން ހަމަލާތަކެއް ކަމަށެވެ. އަދި މި ހަމަލާތައް އަމާޒުކޮށްފައިވަނީ ބޯޑަރު ސަރަހައްދުގައި ހުރި ހަނގުރާމަވެރިންގެ މަރުކަޒުތަކަށާއި، ތަމްރީނުދޭ ތަންތަނުގެ އިތުރުން ހަތިޔާރު ރައްކާކުރާ ގުދަންތަކަށް ކަމަށް އޭނާ ވިދާޅުވިއެވެ.
"ޕާކިސްތާނުން އަބަދުވެސް މަސައްކަތް ކުރަނީ ސަރަހައްދީ ސުލްހަޔާއި ހަމަޖެހުން ގާއިމުކުރުމަށް. ނަމަވެސް ހަމައެއާއެކު، އަޅުގަނޑުމެންގެ ރައްޔިތުންގެ ރައްކާތެރިކަމާއި ސަލާމަތަކީ އަބަދުވެސް އެންމެ އިސްކަންދޭނެ ކަންތައް،" ތަރާރު ވިދާޅުވިއެވެ.
ތާލިބާން ސަރުކާރުގެ ތަރުޖަމާނު ޒަބީހުﷲ މުޖާހިދު މީގެ ކުރިން ވިދާޅުވީ، ޕާކިސްތާނުގެ ހަމަލާތައް އަމާޒުވީ ކުނާރް، ހޯސްޓް އަދި ޕަކްތިކާ ޕްރޮވިންސަށް ކަމަށެވެ.
އޭނާ ވިދާޅުވި ގޮތުގައި މި ހަމަލާތަކުގައި "11 ކުޑަކުދިންނާއި، އަންހެނަކާއި، އުމުރުން ދުވަސްވީ ފިރިހެނަކު" ވަނީ މަރުވެފައެވެ.
ހަނގުރާމަވެރިންނަށް ހިމާޔަތްދޭ ކަމަށް ޕާކިސްތާނުން ކުރާ ތުހުމަތުތައް ދޮގުކުރުމުގެ އިތުރުން، އަފްޣާނިސްތާނުގެ ސަރުކާރުން ތަކުރާރުކޮށް ބުނަމުންދަނީ އެ ގައުމުގެ ފަސްގަނޑަކީ އެހެން ގައުމުތަކުގެ ސަލާމަތަށް ނުރައްކާވާނެ ފަދަ ކަންކަމަށް ފުރުސަތުދޭނެ ތަނެއް ނޫން ކަމަށެވެ.
ފެބްރުއަރީ މަހުގެ ފަހުކޮޅު ހިނގި ވަރުގަދަ ކުރިމަތިލުންތަކަށްފަހު، ދޭތެރެ ދޭތެރެއިން ބޯޑަރު ސަރަހައްދުގައި ކުދި ހަމަނުޖެހުންތައް ހިނގަމުންދާއިރު، ދުނިޔޭގެ ލީޑަރުން ދަނީ ދެ ގައުމުގެ ދެމެދުގައި އޮތް ދެކޮޅުވެރިކަން ހުއްޓާލުމަށް ގޮވާލަމުންނެވެ.
