ޕާކިސްތާނުން އަފްޣާނިސްތާނަށް ދިން ވައިގެ ހަމަލާތަކެއްގައި އާންމުންގެ ބަޔަކު މަރުވެއްޖެ

ޕާކިސްތާނުން އަފްޣާނިސްތާނަށް ދިން ވައިގެ ހަމަލާތަކެއްގައި، އަންހެނުންނާއި ކުޑަކުދިން ހިމެނޭހެން އެތައް ބަޔަކު މަރުވެ، ގިނަ ބަޔަކު ޒަޚަމްވެފައިވާ ކަމަށް ތާލިބާނުން ބުނެފިއެވެ.

ޕާކިސްތާނުގެ އިސްލާމްއާބާދުން ބުނި ގޮތުގައި، މި ހަމަލާތައް އަމާޒުކޮށްފައިވަނީ ޕާކިސްތާނާއި އަފްޣާނިސްތާނު ގުޅޭ ބޯޑަރު ކައިރީގައި ހުރި ހަނގުރާމަވެރިންގެ ހަތް ކޭމްޕަކަށާއި ހަނގުރާމަވެރިން ފިލައިގެން އުޅޭ ތަންތަނަށެވެ. އަދި މި ހަމަލާތައް ދީފައިވަނީ ދާދިފަހުން ޕާކިސްތާނުގައި ދިން ޖާނުން ފިދާވުމުގެ ބޮމުގެ ހަމަލާތަކާ ގުޅިގެން ކަމަށްވެސް އެ ގައުމުން ބުނެއެވެ.

އަފްޣާނިސްތާނުން ވަނީ މި ހަމަލާތައް ކުށްވެރިކޮށްފައެވެ. އަދި މި ހަމަލާތައް އަމާޒުވީ އާންމުން ދިރިއުޅޭ ގިނަ ގެތަކަކަށާއި ދީނީ މަދަރުސާއަކަށް ކަމަށް އެ ގައުމުން ބުނެފައިވެއެވެ.

މިދިޔަ އޮކްޓޯބަރު މަހު ބޯޑަރު ސަރަހައްދުގައި ހިނގި ނުރައްކާތެރި ކުރިމަތިލުންތަކަށްފަހު، ދެ ގައުމުގެ ދެމެދުގައި ހަނގުރާމަ ހުއްޓާލުމުގެ އެއްބަސްވުމަކަށް އައިސްފައިވީ ނަމަވެސް، އޭގެ ފަހުންވެސް ދޭތެރެ ދޭތެރެއިން ކުރިމަތިލުންތައް ވަނީ ހިނގާފައެވެ.

ތާލިބާނުންގެ ޑިފެންސް މިނިސްޓްރީން ބުނި ގޮތުގައި، ޕާކިސްތާނުގެ މި ހަމަލާތައް އަމާޒުވީ ނަންގަރްހާރް އަދި ޕަކްތިކާ ޕްރޮވިންސްގެ އާންމުން ދިރިއުޅޭ ސަރަހައްދުތަކަށެވެ.

ނަންގަރްހާރްގެ އޮފިޝަލުން ބީބީސީއަށް މައުލޫމާތު ދެއްވި ގޮތުގައި، ޝަހާބުއްދީން ކިޔާ މީހެއްގެ ގެއަށް ދިން ހަމަލާއެއްގައި، އޭނާގެ އާއިލާގެ 20 މެންބަރުން ވަނީ މަރުވެފައެވެ. މީގެ ތެރޭގައި އަންހެނުންނާއި ކުޑަކުދިން ހިމެނެއެވެ.

ޕާކިސްތާނުގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިންގް އިން ބުނީ، އެ ގައުމުން ހަމަލާ ދީފައިވަނީ ލިބިފައިވާ މައުލޫމާތަށް ބިނާކޮށް، ޓެރަރިސްޓުންގެ ހަތް ކޭމްޕަކަށާއި އެމީހުން ފިލައިގެން އުޅޭ ތަންތަނަށް ކަމަށެވެ.

އެކްސްގައި އާންމުކުރި ބަޔާނެއްގައި އެ މިނިސްޓްރީން ބުނީ، މި ހަމަލާތަކުގައި އަމާޒުކުރި މީހުންގެ ތެރޭގައި ޕާކިސްތާނުގައި މަނާކޮށްފައިވާ ތަހްރީކޭ ތާލިބާން ޕާކިސްތާން (ޓީޓީޕީ) ގެ މެންބަރުން ހިމެނޭ ކަމަށެވެ. ޕާކިސްތާނު ސަރުކާރުން މި ޖަމާއަތަށް ނިސްބަތްކުރަނީ "ފިތުނަ އަލް ޚަވާރިޖް" ގެ ނަމުންނެވެ. މީގެ އިތުރުން އެމީހުންނާ ގުޅުން އޮންނަ ގްރޫޕްތަކާއި އިސްލާމިކް ސްޓޭޓް-ޚުރާސާން ޕްރޮވިންސްގެ މެންބަރުންނަށްވެސް ހަމަލާ އަމާޒުވި ކަމަށް ބުނެފައިވެއެވެ.

މި ހަމަލާތަކަކީ، އަފްޣާނިސްތާނުގެ ކާބުލް ސަރުކާރުގެ ހިމާޔަތުގައި ތިބި ޓެރަރިސްޓް ގްރޫޕްތަކުން ދާދިފަހުން ޕާކިސްތާނުގައި ދިން ޖާނުން ފިދާވުމުގެ ބޮމުގެ ހަމަލާތަކަށް ދިން "ބަދަލުހިފުމުގެ ހަމަލާތަކެއް" ކަމަށް އެ މިނިސްޓްރީން ސިފަކޮށްފައިވެއެވެ.

ދާދިފަހުން ޕާކިސްތާނަށް ދިން ހަމަލާތަކުގެ ތެރޭގައި، މި މަހުގެ ކުރީކޮޅު ވެރިރަށް އިސްލާމްއާބާދުގައި ހުންނަ ޝިއައީ މިސްކިތަކަށް ދިން ހަމަލާއާއި، މި ހަފުތާގައި ރަމަޟާން މަސް ފެށުނު ފަހުން ހުޅަނގު އުތުރުގެ ޚައިބަރް ޕަޚްތުންޚުވާ ޕްރޮވިންސްގައި ދިން ހަމަލާތައް ހިމެނެއެވެ.

ހަނގުރާމަވެރިންނާ ދެކޮޅަށް ފިޔަވަޅު އެޅުމަށް އަފްޣާން ތާލިބާނުން ނުކުޅެދިފައިވާ ކަމަށް ޕާކިސްތާނުން ވަނީ ތުހުމަތުކޮށްފައެވެ. އަދި މި ހަމަލާތަކަކީ އަފްޣާނިސްތާނުގައި ތިބި އެމީހުންގެ ލީޑަޝިޕްގެ އިރުޝާދުގެ ދަށުން ދިން ހަމަލާތަކެއް ކަމުގެ "ސާފު ހެކި" އެބަހުރި ކަމަށްވެސް ޕާކިސްތާނުން ބުނެއެވެ.

ތާލިބާނުންގެ ޑިފެންސް މިނިސްޓްރީން ފަހުން އެކްސްގައި ކުރި ޕޯސްޓެއްގައި ބުނީ، މި ހަމަލާތަކަކީ "އަފްޣާނިސްތާނުގެ އިސްތިގުލާލަށް އަރައިގަތުން" ކަމަށް ބުނެ އެކަން ހަރުކަށި އިބާރާތުން ކުށްވެރިކުރާ ކަމަށެވެ. އަދި މިއީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު އަމަލެއް ކަމަށްވެސް ބުނެފައިވެއެވެ.

އެ މިނިސްޓްރީން ވަނީ "މުނާސަބު ވަގުތެއްގައި އެކަށީގެންވާ ރައްދެއް ދޭނެ" ކަމުގެ އިންޒާރު ދީފައެވެ. އަދި އާންމުންގެ ތަންތަނަށާއި ދީނީ މަރުކަޒުތަކަށް ހަމަލާދިނުމުން ދޭހަވަނީ، ޕާކިސްތާނު ސިފައިންގެ އިންޓެލިޖެންސް އަދި ސަލާމަތީ ކަންކަން ފެއިލްވެފައިވާ މިންވަރު ކަމަށްވެސް ބުނެފައިވެއެވެ.

މި ހަމަލާތައް މި ދިނީ، މިދިޔަ އޮކްޓޯބަރު މަހު ބޯޑަރުގައި ހިނގި ކުރިމަތިލުންތަކުގައި ކާބުލްއިން ހައްޔަރުކުރި ޕާކިސްތާނުގެ ތިން ސިފައިން، ސައުދީ އަރަބިއްޔާ މެދުވެރިވެގެން މި ހަފުތާގެ ކުރީކޮޅު މިނިވަންކޮށްފައި ވަނިކޮށެވެ.

އޮކްޓޯބަރު މަހުގެ އެ ކުރިމަތިލުންތަކަކީ 2021 ވަނަ އަހަރު ތާލިބާނުން އަލުން ވެރިކަމަށް އައި ފަހުން ހިނގި އެންމެ ނުރައްކާތެރި ހަމަލާތަކެވެ. އެ ކުރިމަތިލުންތައް ނިމުމަކަށް އައީ އެ މަހު އެކުލަވާލި ވަގުތީ ހަނގުރާމަ ހުއްޓާލުމުގެ އެއްބަސްވުމަކާ އެކުގައެވެ.

ޕާކިސްތާނާއި އަފްޣާނިސްތާނުން ހިއްސާކުރަނީ 1,600 މޭލު (2,574 ކިލޯމީޓަރު) ގެ ފަރުބަދަަމަތީ ބޯޑަރެކެވެ.