ޕާކިސްތާން އިން ދިން ޙަމަލާއެއްގައި އަފްޣާނިސްތާނުގެ ބަޔަކު މަރުވެއްޖެ

ޕާކިސްތާނުގެ އަސްކަރިއްޔާ އިން އަފްޣާނިސްތާނުގެ އިރުމަތީ ސަރަހައްދު ތަކަށް ދިން ވައިގެ ހަމަލާ ތަކެއްގައި، މަދުވެގެން 13 މީހުން މަރުވެ، އިތުރު ބަޔަކު ޒަޚަމުވެއްޖެ އެވެ.

އަފްޣާނިސްތާނުގައި ވެރިކަން ކުރާ ތާލިބާން ސަރުކާރުގެ ތަރުޖަމާނު ޒަބީހުﷲ މުޖާހިދު ހާމަ ކުރެއްވި ގޮތުގައި، ޕާކިސްތާނުގެ އަސްކަރީ ޖެޓުތަކުން އަފްޣާނިސްތާނުގެ ވައިގެ ސަރަހައްދަށް ވަދެ ހަމަލާ ދީފައި ވަނީ އިރުމަތީގައިވާ ކޮސްޓް، ކުނާރު، އަދި ޕަކްތީކާ ޕްރޮވިންސްގެ އާންމުން ދިރިއުޅޭ ގެދޮރަށެވެ.

މި ހަމަލާ ތަކުގައި މަރުވި މީހުންގެ ތެރޭގައި 11 ކުޑަކުދިންނާއި، އަންހެނަކާއި، އުމުރުން ދުވަސްވީ ފިރިހެނަކު ހިމެނޭއިރު، އިތުރު 14 އަންހެނުންނާއި ކުޑަކުދިން ޒަޚަމު ވެފައިވާ ކަމަށް ތާލިބާން ސަރުކާރުން ބުނެ އެވެ.

މި ހަމަލާތަކާ ގުޅިގެން ޕާކިސްތާނުގެ އިންފޮމޭޝަން މިނިސްޓަރު އަތާއުﷲ ތަރާރް ވިދާޅުވީ، މިއީ ޕާކިސްތާނުގެ އެތެރޭގައި ދެމުންދާ ބޭރުގެ އެހީތެރިކަން ލިބޭ ޓެރަރިސްޓް ހަމަލާ ތަކަށް ރައްދު ދިނުމުގެ ގޮތުން ދެވުނު ހަމަލާ ތަކެއް ކަމަށެވެ. އަދި މި އޮޕަރޭޝަނުގައި ތަހްރީކޭ ތާލިބާން ޕާކިސްތާންގެ 26 ހަނގުރާމަވެރިން މަރުވެ، އެ ޖަމާއަތުގެ ތަމްރީނު މަރުކަޒުތަކާއި ހަތިޔާރު ގުދަންތައް ހިމެނޭހެން ހަތަރު އަމާޒަކަށް ކާމިޔާބުކަމާ އެކު ހަމަލާ ދީފައި ވާނެ ކަމަށް ޕާކިސްތާނުން ބުނެ އެވެ.

ޕާކިސްތާނުން ތުހުމަތު ކުރާ ގޮތުގައި އަފްޣާނިސްތާނުގެ ތާލިބާން ސަރުކާރުން ދަނީ ޓީޓީޕީގެ ހަނގުރާމަވެރިންނަށް އެ ގައުމުގެ ފަސްގަނޑުން ހިމާޔަތްދީ، ޕާކިސްތާންއާ ދެކޮޅަށް ހަމަލާ ދިނުމަށް ފުރުސަތު ފަހި ކޮށްދެމުންނެވެ. ނަމަވެސް، އަފްޣާނިސްތާނުން މި ތުހުމަތުތައް ދޮގު ކުރެ އެވެ.

މި ފަހުގެ ވައިގެ ހަމަލާ ތަކާ އެކު، އަވަށްޓެރި މި ދެ ގައުމުގެ ދެމެދުގައި އޮތް ނުތަނަވަސްކަން ވަނީ އިންތިހާ އަށް ބޮޑުވެފައި އެވެ. މިއަހަރުގެ ކުރީ ކޮޅުން ފެށިގެން ދެ ގައުމުގެ ބޯޑަރު ސަރަހައްދުގައި ދެމުންދާ ހަމަލާ ތަކުގައި ސަތޭކައަށް ވުރެ ގިނަ މީހުން މަރު ވެފައިވާއިރު، ބޯޑަރު ބަންދު ކުރުމުގެ ސަބަބުން ވިޔަފާރި އާއި، އިންސާނީ އެހީ ފޯރު ކޮށްދިނުމަށް ބޮޑެތި ހުރަސް ތަކެއް ވަނީ ކުރިމަތި ވެފައި އެވެ.

އަފްޣާނިސްތާނުގެ ފޮރިން މިނިސްޓްރީ އިން ވަނީ އެ ޤައުމުގައި ހުންނަވާ ޕާކިސްތާނުގެ ޑިޕްލޮމޭޓް ހާޒިރުކޮށް، ޝަކުވާ އުފުލާފަ އެވެ.