ޕާކިސްތާނުގެ ހަމަލާތަކަށް ރައްދު ދިނުމަށް ތާލިބާނުން ވަރުގަދަ އަސްކަރީ އޮޕަރޭޝަނެއް ފަށައިފި

ޕާކިސްތާނުން ދާދިފަހުން ދިން ހަމަލާތަކަށް ރައްދު ދިނުމުގެ ގޮތުން، އެ ގައުމުގެ އަސްކަރީ މަރުކަޒުތަކަށް އަމާޒުކޮށް "ބޮޑު" އަސްކަރީ އޮޕަރޭޝަނެއް ފަށާފައިވާ ކަމަށް އަފްޣާނިސްތާނުގެ ތާލިބާން ސަރުކާރުގެ އޮފިޝަލުން ވިދާޅުވެއްޖެއެވެ.

ތާލިބާން ސަރުކާރުގެ އިސް ތަރުޖަމާނު ޒަބީހުﷲ މުޖާހިދު ވިދާޅުވީ، ދެ ގައުމު ހިއްސާކުރާ ބޯޑަރު ސަރަހައްދުގައި ބުރާސްފަތި ދުވަހުގެ ރޭ ފެށި މި ހަމަލާތަކުގައި ޕާކިސްތާނުގެ ގިނަ އަދަދެއްގެ ސިފައިން މަރުވެފައިވާ ކަމަށާއި، ބައެއް ސިފައިން ހައްޔަރުކޮށްފައިވާ ކަމަށެވެ.

ނަމަވެސް، ޕާކިސްތާނުގެ ބޮޑުވަޒީރުގެ ތަރުޖަމާނު ވަނީ މި ވާހަކަތައް ދޮގުކުރައްވާފައެވެ. އަދި ޕާކިސްތާނުގެ އަސްކަރީ މަރުކަޒުތައް ތާލިބާނުންގެ ބާރުގެ ދަށަށް ގެންގޮސްފައިވާ ކަމަށް ބުނާ ބުނުމަށް އިންކާރު ކުރައްވަމުން އޭނާ ވިދާޅުވީ، އިސްލާމްއާބާދުން ދިން ރައްދު ހަމަލާތަކުގައި އަފްޣާނިސްތާނަށް "ބޮޑެތި ގެއްލުންތަކެއް" ލިބިފައިވާ ކަމަށެވެ.

މި ކުރިމަތިލުންތައް ފެށިފައި މިވަނީ، މި ހަފުތާގެ ކުރީކޮޅު ޕާކިސްތާނުން ދިން ހަމަލާތަކެއްގައި މަދުވެގެން 18 މީހުން މަރުވެފައިވާ ކަމަށް ތާލިބާނުން ބުނެފައިވާ ދަނޑިވަޅެއްގައެވެ. ޕާކިސްތާނުން ބުނެފައިވަނީ އެ ހަމަލާތަކުގައި އަމާޒުކޮށްފައިވަނީ ހަނގުރާމަވެރިންގެ ކޭމްޕްތަކާއި ފޮރުވިގެން ތިބޭ ތަންތަނަށް ކަމަށެވެ.

ތާލިބާނުންގެ އަސްކަރީ ތަރުޖަމާނު މަވްލަވީ ވަހީދުﷲ މުޙައްމަދީ ވިދާޅުވީ، ބަދަލުހިފުމުގެ ގޮތުން ފެށި މި އޮޕަރޭޝަން ފަށާފައިވަނީ ބުރާސްފަތި ދުވަހުގެ ރޭގަނޑު އެތަނުގެ ގަޑިން 20:30  ހާއިރު ކަމަށެވެ.

ޒަބީހުﷲ މުޖާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، ޕާކިސްތާނުގެ އަސްކަރީ ފަރާތްތަކުން ތަކުރާރުކޮށް ބޯޑަރުގެ އިންތަކާ ޚިލާފުވެ، ހަމަނުޖެހުން ހިންގަމުންދާތީ، އޭގެ ރައްދުގައި ޕާކިސްތާނުގެ އަސްކަރީ މަރުކަޒުތަކާއި ވަސީލަތްތަކަށް އަމާޒުކޮށް ބޮޑު އޮޕަރޭޝަނެއް ފަށާފައިވާ ކަމަށެވެ. އަދި ތާލިބާން ސިފައިން ޕާކިސްތާނުގެ އަސްކަރީ 15 މަރުކަޒެއް ހިފާފައިވާ ކަމަށްވެސް އޭނާ ވިދާޅުވިއެވެ.

ޕާކިސްތާނު ސަރުކާރުން ބުނެފައިވަނީ، ތާލިބާނުންނަށް ކަންކަން އޮޅި، އެ ގައުމުގެ ހުޅަނގު އުތުރު ޕްރޮވިންސެއް ކަމަށްވާ ޚައިބަރް ޕަޚްތޫންކުވާގެ އެކި ސަރަހައްދުތަކަށް އެއްވެސް އުދުވާނަކާ ނުލައި ބަޑީގެ ހަމަލާދީފައިވާ ކަމަށެވެ. އަދި އިސްލާމްއާބާދުގެ ސަލާމަތީ ބާރުތަކުން އެކަމަށް "ވަގުތުން އަދި ނަތީޖާ ލިބުނު" ރައްދެއް ދީފައިވާ ކަމަށްވެސް ބުނެފައިވެއެވެ.

ޕާކިސްތާނުގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިންގް އިން އެކްސްގައި އާންމުކުރި ބަޔާނެއްގައި ބުނެފައިވަނީ، މިހާތަނަށް ލިބިފައިވާ ރިޕޯޓްތަކުން އަފްޣާނިސްތާނުގެ ފަޅިން ގިނަ ބަޔަކު މަރުވެ، ގިނަ އަދަދެއްގެ މަރުކަޒުތަކާއި ވަސީލަތްތައް ހަލާކުވެފައިވާކަން ކަށަވަރުވާ ކަމަށެވެ.

"ޕާކިސްތާނުގެ ސަރަހައްދީ އިސްތިގުލާލް އާއި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އަޅަންޖެހޭ ހުރިހާ ފިޔަވަޅެއް އެ ގައުމުން އަޅާނެ،" އެ ބަޔާނުގައިވެއެވެ.

ބޮޑުވަޒީރު ޝެހްބާޒް ޝަރީފްގެ ތަރުޖަމާނު މުޝައްރަފް ޒައިދީ، ޕާކިސްތާނަށް ގެއްލުން ލިބިފައިވާ ކަމަށް ބުނާ ވާހަކަތައް ދޮގުކުރައްވަމުން ވިދާޅުވީ، ކުރިމަތިވާ ކޮންމެ އުދުވާނަކަށް ވަގުތުން  ރައްދެއް ދޭނެ ކަމަށެވެ.

މިދިޔަ އާދީއްތަ ދުވަހުގެ ރޭ ޕާކިސްތާނުން ދިން ހަމަލާތަކާ ގުޅިގެން، "މުނާސަބު ވަގުތެއްގައި" ބަދަލުހިފާނެ ކަމުގެ އިންޒާރު ކާބުލްއިން ކުރިން އޮތީ ދީފައެވެ.

އިސްލާމްއާބާދުން ބުނެފައިވަނީ ބޯޑަރު ކައިރީގައި ހުރި ހަނގުރާމަވެރިންގެ ހަތް ކޭމްޕަކާއި ފޮރުވިގެން ތިބޭ ތަންތަނަށް ހަމަލާދީފައިވާނެ ކަމަށެވެ. އަދި މި ހަމަލާތައް ދީފައިވަނީ ދާދިފަހުން ޕާކިސްތާނުގައި އަމިއްލައަށް މަރުވެގެން ދިން ބޮމުގެ ހަމަލާތަކާ ގުޅިގެން ކަމަށްވެސް ބުނެފައިވެއެވެ.

ނަމަވެސް ކާބުލްއިން ބުނެފައިވަނީ ޕާކިސްތާނުގެ ހަމަލާތައް އަމާޒުވީ އާންމުން ދިރިއުޅޭ ގެތަކަށާއި ދީނީ މަދަރުސާއަކަށް ކަމަށާއި، މަރުވި މީހުންގެ ތެރޭގައި އަންހެނުންނާއި ކުޑަކުދިން ހިމެނޭ ކަމަށެވެ.

ދެ ގައުމުގެ ދެމެދުގައި ބަދަލުކުރެވެމުންދާ މި ހަމަލާތައް ފެށިފައި މިވަނީ، ބޯޑަރު ސަރަހައްދުގައި ހިނގި ނުރައްކާތެރި ކުރިމަތިލުންތަކަކަށްފަހު މިދިޔަ އޮކްޓޯބަރު މަހު ހަނގުރާމަ ހުއްޓާލުމުގެ  އެއްބަސްވުމަކަށް އައިސްފައި ވަނިކޮށެވެ. އެހެންނަމަވެސް، އޭގެ ފަހުންވެސް ދޭތެރެ ދޭތެރެއިން ދެ ގައުމުގެ ދެމެދުގައި ހަމަލާތައް ބަދަލުކުރެވެމުންދެއެވެ.

ޕާކިސްތާނާއި އަފްޣާނިސްތާނާ ދެމެދު 1,600 މޭލު (2,574 ކިލޯމީޓަރު) ގެ ފަރުބަދަ މަތީ ބޯޑަރެއް އޮވެއެވެ.