ފުރަތަމަ ފަހަރަށް މިޞްރު ދެ ވަނަ ބުރަށް، ނިއުޒިލެންޑު ބަލިކޮށް ބެލްޖިއަމް އަށް ގުރޫޕުގެ އެއް ވަނަ

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު ޖީގައި އީރާންއާ ދެކޮޅަށް ކުޅުނު މެޗު އެއްވަރުކޮށް، މިޞްރުން މުބާރާތުގެ ދެ ވަނަ ބުރުގެ ޖާގަ ހޯދައިފި އެވެ.

ހޮނިހިރު ދުވަހުގެ ހެނދުނު ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް މިޞްރުންނެވެ.

މެޗު ފަށައިގެން ފަސް ވަނަ މިނެޓުގައި މިޞްރަށް ލީޑު ނަގައިދިނީ މުހައްމަދު ސަބޭރު އެވެ. އޭގެ ފަހުން ވެސް މިޞްރަށް ވަނީ ލީޑު ފުޅާ ކުރާނެ ފުރުސަތު ލިބިފައި އެވެ. މެޗުގެ ނަތީޖާ ހަމަހަމަ ކުރުމަށް ލިބުނު ރަނުގެ ފުރުސަތުގައި އީރާންގެ މަހުދީ ތަރޭމީ ފޮނުވާލި ޕެނަލްޓީ ކާމިޔާބެއް ނުވި އެވެ. ނަމަވެސް، އޭގެ ތިން މިނެޓު ފަހުން ރަމީ ރެޒައީން ވަނީ ލަނޑު ޖަހައި އީރާން އަށް ނަތީޖާ ހަމަހަމަ ކޮށްދީފައި އެވެ.

މި ގުރޫޕުގައި ނިއުޒިލެންޑާ ދެކޮޅަށް ކުޅުނު މެޗު ބެލްޖިއަމް އިން ކާމިޔާބު ކޮށްފައި ވަނީ 5-1 އިންނެވެ. މެޗުގައ ބެލްޖިއަމްގެ ލަނޑުތައް ޖެހީ ލިއާންޑްރޯ ޓްރޮސާޑް އާއި، ކެވިން ޑި ބްރޭނާ އާއި، ރޮމެލޫ ލުކާކޫ އަދި އަލެކްސިސް ސަލަމޭކާ އެވެ. މެޗުގައި ޓްރޮސާޑް ވަނީ ދެ ލަނޑު ޖަހައިފަ އެވެ. މެޗުގައި ނިއުޒިލެންޑުގެ ހަމައެކަނި ލަނޑު ޖެހީ އެލިޖާ ޖަސްޓް އެވެ.

މިއާ އެކު ބެލްޖިއަމް އިން ދެ ވަނަ ބުރުގެ ޖާގަ ހޯދީ ތިން މެޗުން ފަސް ޕޮއިންޓާ އެކު އެއް ވަނައިގައި އެވެ. ދެ ވަނަ އަށް ދިޔަ މިޞްރަށް ތިން މެޗުން ލިބެނީ ފަސް ޕޮއިންޓެވެ. މިއީ މިޞްރުން އެ ޤައުމުގެ ތާރީޚުގައި ވޯލްޑް ކަޕްގެ ގުރޫޕު ސްޓޭޖު ފަހަނަ އަޅައި ދިޔަ ފުރަތަމަ ފަހަރެވެ. ތިން ވަނަ އަށް ދިޔަ އީރާާން އަށް ދެ ވަނަ ބުރުގެ ޖާާގަ އޮތީ އެންމެ ރަނގަޅު ނަތީޖާ ނެރޭ ތިން ވަނަ ޓީމު ތަކުގެ ތެރޭގައި ހިމެނިގެންނެވެ.