އުރުގުއޭ ބަލިކޮށް ސްޕެއިން އަށް އެއް ވަނަ، ކޭޕް ވާޑް ވެސް ދެ ވަނަ ބުރަށް
މިއާ އެކު ތިން މެޗުން ހަތް ޕޮއިންޓު ހޯދައިގެން އެއް ވަނައިގައި ދެ ވަނަ ބުރަށް ދިޔައީ ސްޕެއިން. ތިން މެޗުން ތިން ޕޮއިންޓު ހޯދި ކޭޕް ވާޑް އަށް ވެސް ދެ ވަނަ ބުރުން ޖާގަ ލިބުނުއިރު، މިއީ އެ ޓީމަށް ތާރީޚީ ކާމިޔާބެއް.
މެޗުގައި ލަނޑު ޖެހުމަށް ފަހު ސްޕެއިންގެ ކުޅުންތެރިން އުފާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު އެޗްގައި އުރުގުއޭއާ ދެކޮޅަށް ކުޅުނު މެޗުން މޮޅުވެ، ސްޕެއިން އިން ގުރޫޕުގެ އެއް ވަނަ ހޯދައިފި އެވެ.
ހުކުރު ދުވަހުގެ ރޭ ދަންވަރު ކުޅުނު މެޗު ސްޕެއިން އިން ކާމިޔާބު ކުރީ 1-0 އިންނެވެ. މެޗުގައި ސްޕެއިން އިން ލަނޑު ޖެހީ ވެސް ފުރަތަމަ ހާފުގައި އެވެ.
މެޗު ފަށައިގެން ސްޕެއިން އިން ރަނގަޅަށް ކުޅެ ލަނޑު ޖަހަން މަސައްކަތް ކޮށްފައިވެ އެވެ. އެގޮތުން މެޗުގެ ފުރަތަމަ ހާފުގެ 42 ވަނަ މިނެޓުގައި ސްޕެއިން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ސްޕެއިން އަށް ޖަހައިދިނީ އަލެކްސް ބައޭނާ އެވެ. އެއީ މާކޮސް ލޮރެންޓޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
މި ގުރޫޕުގައި ކޭޕް ވާޑް އާއި ސައުދީ އަރަބިއްޔާ ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެވެ. ގުރޫޕް ސްޓޭޖުގައި ކޭޕް ވާޑްގެ ތިން މެޗު ވެސް އެއްވަރުވެފައިވާއިރު، ސައުދީގެ ދެ މެޗު އެއްވަރުވެ އަދި އަނެއް މެޗުން ވަނީ ބަލިވެފައި އެވެ.
މިއާ އެކު ތިން މެޗުން ހަތް ޕޮއިންޓު ހޯދައިގެން އެއް ވަނައިގައި ދެ ވަނަ ބުރަށް ދިޔައީ ސްޕެއިން އެވެ. ތިން މެޗުން ތިން ޕޮއިންޓު ހޯދި ކޭޕް ވާޑް އަށް ވެސް ދެ ވަނަ ބުރުން ޖާގަ ލިބުނުއިރު، މިއީ އެ ޓީމަށް ތާރީޚީ ކާމިޔާބެކެވެ. މުބާރާތުގެ ދެ ވަނަ ބުރުން ޖާގަ ނުލިބި އުރުގުއޭ ވަނީ ކަޓައިފަ އެވެ.
