ޓިއުނީޝިއާ ބަލިކޮށް ނެދަލެންޑްސް އަށް އެއް ވަނަ، ޖަޕާން އާއި ސްވިޑެން ވެސް އަނެއް ބުރަށް
ނެދަލެންޑްސް އަށް ގުރޫޕުގެ އެއް ވަނަ ލިބުނީ ތިން މެޗުން ހަތް ޕޮއިންޓާ އެކު. ފަސް ޕޮއިންޓާ އެކު ޖަޕާން އަށް ދެ ވަނަ ލިބުނުއިރު، ތިން ވަނަ އަށް ދިޔަ ސްވިޑެން އަށް ލިބެނީ ހަތަރު ޕޮއިންޓު. ތިން ޓީމަަށް ވެސް ވަނީ މުބާރާތުގެ ދެ ވަނަ ބުރުން ޖާގަ ލިބިފައި.
މެޗުގައި ލަނޑު ޖެހުމަށް ފަހު ނެދަލެންޑްސްގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕްގެ ގުރޫޕު އެފްގައި ޓިއުނީޝިއާއާ ދެކޮޅަށް ކުޅުނު މެޗުން މޮޅުވެ، ނެދަލެންޑްސް އިން މުބާރާތުގެ ދެ ވަނަ ބުރުން ޖާގަ ހޯދައިފި އެވެ.
ހުކުރު ދުވަހުގެ ފަތިހު ކުޅުނު މެޗު ނެދަލެންޑްސް އިން ކާމިޔާބު ކުރީ 3-1 އިންނެވެ.
މެޗު ފަށައިގެން ތިން ވަނަ މިނެޓުގައި ނެދަލެންޑްސް އަަށް ލީޑު ލިބުނީ ޓިއުނީޝިއާގެ އެލްޔެސް ޝިކީރީ އަތުން ބައި ކޮޅަށް ވަތް ލަނޑުންނެވެ.
އޭގެ ހަތަރު މިނެޓު ފަހުން ބްރަޔަން ބްރޮބީ ވަނީ ނެދަލެންޑްސްގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ޓިއުނީޝިއާގެ ހަމައެކަނި ލަނޑު ޖެހީ ހަޒެމް މަސްތޫރީ އެވެ.
އޭގެ ފަހުން މެޗުގައި ނެދަލެންޑްސްގެ ތިން ވަނަ ލަނޑު 62 ވަނަ މިނެޓުގައި ޖެހީ ޕައުލް ވެން ހެކާ އެވެ.
މި ގުރޫޕުގައި ޖަޕާން އާއި ސްވިޑެން ބައްދަލު ކުރި މެޗު ނިމުނީ 1-1 އިން އެއްވަރު ވެގެންނެވެ. މެޗުގައި ޑައިޒެން މައޭޑާގެ ލަނޑުން ޖަޕާން އިން ލީޑު ހޯދާފައި ވަނިކޮށް، ސްވިޑެން އަށް ނަތީޖާ ހަމަހަމަ ކޮށްދިނީ އެންތަނީ އެލަންގާ އެވެ.
މިއާ އެކު ނެދަލެންޑްސް އަށް ގުރޫޕުގެ އެއް ވަނަ ލިބުނީ ތިން މެޗުން ހަތް ޕޮއިންޓާ އެކު އެވެ. ފަސް ޕޮއިންޓާ އެކު ޖަޕާން އަށް ދެ ވަނަ ލިބުނުއިރު، ތިން ވަނަ އަށް ދިޔަ ސްވިޑެން އަށް ލިބެނީ ހަތަރު ޕޮއިންޓެވެ. ތިން ޓީމަަށް ވެސް ވަނީ މުބާރާތުގެ ދެ ވަނަ ބުރުން ޖާގަ ލިބިފައި އެވެ.
