ޔޫކްރެއިނުން ރަޝިޔާގެ ތެޔޮ ސާފުކުރާ ދެ ކާރުޚާނާ އަކަށް ހަމަލާ ދީފި

ޔޫކްރެއިންގެ ޑްރޯންތައް ބޭނުންކޮށްގެން ރަޝިޔާގެ ތެޔޮ ސަޕްލައިއަށް ދޭ ހަމަލާތައް ވަރުގަދަކޮށްފައިވާއިރު، ރަޝިޔާގެ ކްރަސްނޯޑާ އަދި ޔަރޮސްލާވް ސަރަހައްދުގައި ހުރި ދެ ތެޔޮ ރިފައިނަރީއަކަށް ރޭގަނޑުގެ ވަގުތެއްގައި ހަމަލާދީފައިވާ ކަމަށް ޔޫކްރެއިންގެ ރައީސް ވޮލޮޑިމީރް ޒެލެންސްކީ އާދީއްތަ ދުވަހު ވިދާޅުވެއްޖެ އެވެ.

ޔޫކްރެއިންގެ ޑްރޯންތަކުން ރަޝިޔާގެ ދެ ތެޔޮ ރިފައިނަރީއަކަށް ރޭގަނޑު ދިން ހަމަލާތަކަށްފަހު، ރަޝިޔާއަށް ދޭ މިފަދަ ހަމަލާތައް ކުރިއަށް ގެންދަވާނެ ކަމަށް ވެސް ރައީސް ވޮލޮޑިމީރް ޒެލެންސްކީ ވަނީ ވައުދުވެވަޑައިގެންފަ އެވެ.

ޔޫކްރެއިންއިން ރަޝިޔާގެ ހަކަތަ އުފައްދާ ވަސީލަތްތަކަށް އަމާޒުކޮށް ދެމުންދާ ހަމަލާތަކުގެ ސަބަބުން ރަޝިޔާގެ ބައެއް ސަރަހައްދުތަކުން ތެލުގެ ދަތިކަން އިންތިހާއަށް ކުރިމަތިވެފައިވާއިރު، އާދީއްތަ ދުވަހުގެ ހެނދުނުގެ ވަގުތެއްގައި ރަޝިޔާގެ ދެކުނުގެ ކްރަސްނޯޑާ ސަރަހައްދާއި ޔަރޮސްލާވް ސަރަހައްދުގައި ހުރި ތެޔޮ ރިފައިނަރީތަކުގައި ވަނީ އަލިފާން ރޯވެފަ އެވެ.

"މި ހަނގުރާމަ ކުރިއަށް ގެންދިއުމަށް ރަޝިޔާއަށް އޮތް ގާބިލުކަން ކުޑަކުރުމަށްޓަކައި އަޅުގަނޑުމެން ކުރިއަށްގެންދާ އޮޕަރޭޝަންތައް ހުއްޓުމެއްނެތި ކުރިއަށްދާނެ. ދުރު ރާސްތާގެ ހަމަލާތަކުގެ ސަބަބުން ރަޝިޔާގެ ހަނގުރާމަވެރި މެޝިނަރީއަށް ބޭނުންވާ ވަސީލަތްތައް މަދުވެ، މިއީ ސުލްހައާ ދިމާލަށް އެޅޭ އިތުރު ފިޔަވަޅެއް،" ޔޫކްރެއިންގެ ރައީސް ވިދާޅުވި އެވެ.

ކްރަސްނޯޑާގެ ގަވަރުނަރު ވެނިއަމިން ކޮންޑްރަޓިއޭވް ވިދާޅުވި ގޮތުގައި، އެ ސަރަހައްދުގައި ހުންނަ ރިފައިނަރީގައި އަލިފާން ރޯވެފައިވާއިރު، ކައިރީގައި އޮތް އަވަށަކުން އެކަކު މަރުވެ، އިތުރު މީހަކަށް ވަނީ އަނިޔާވެފަ އެވެ.

މީގެ އިތުރުން، ރަޝިޔާއިން ވެސް ވަނީ އާދީއްތަ ދުވަހުގެ ފަތިހުގެ ވަގުތެއްގައި ޔޫކްރެއިންގެ ވެރިރަށް ކީވްއަށް ބެލިސްޓިކް މިސައިލް ހަމަލާތަކެއް ދީފަ އެވެ. މި ހަމަލާތަކުގައި މަދުވެގެން ދެ މީހަކަށް އަނިޔާވެފައިވާ ކަމަށް ރިޕޯޓުތައް ބުނެ އެވެ.

މި ހަމަލާތައް ދީފައިވަނީ، ހަނގުރާމަ ހުއްޓާލުމަށް ރަޝިޔާއަށް ބާރުއެޅުމުގެ ގޮތުން 40 ދުވަހުގެ އަސްކަރީ އޮޕަރޭޝަނެއް ކުރިއަށް ގެންދިއުމަށް ނިންމެވުމަށްފަހު، ރަޝިޔާގެ ލީޑަރު ވްލަޑިމީރް ޕޫޓިން "ޔޫކްރެއިން އިން ބޭރުވުމަށާއި" "ސުލްހައަށްޓަކައި އެ ފިޔަވަޅު އެޅުމަށް" ރައީސް ޒެލެންސްކީ ގޮވާލައްވާފައިވާ ދަނޑިވަޅެއްގަ އެވެ.

ޒެލެންސްކީ ވިދާޅުވި ގޮތުގައި، 40 ދުވަހުގެ މި އޮޕަރޭޝަން ކުރިއަށް ގެންދިއުމަށް އޭނާ ނިންމެވީ ޔޫކްރެއިންގެ ސެކިއުރިޓީ ސާވިސްގެ އިސްވެރިޔާއާ މަޝްވަރާ ކުރެއްވުމަށްފަހުގައެވެ.