ޔޫކްރެއިން އާއި ރަޝިޔާގެ ސުލްޙައިގެ މަޝްވަރާ ތަކުން ކުރިއެރުމެއް ނުލިބޭ

ޔޫކްރެއިން އާއި ރަޝިޔާއާ ދެމެދު ބާއްވަމުން އަންނަ ސުލްޙައިގެ މަޝްވަރާ ތަކުގެ ފުރަތަމަ ބުރުގެ ބައްދަލުވުމުގައި އެއްވެސް ކުރިއެރުމެއް ލިބިފައި ނުވާއިރު، ދެ ވަނަ ބުރުގެ މަޝްވަރާތައް ބުދަ ދުވަހު ކުރިއަށް ގެންދަން ތައްޔާރުވެއްޖެ އެވެ. 

ސްވިޒެލެންޑުގެ ޖެނީވާގައި ދެ ވަނަ ބުރުގެ މަޝްވަރާ ތަކެއް ކުރިއަށް ގެންދިޔުމަށް ތައްޔާރު ވަމުން އަންނައިރު، ދެ ވަނަ ބޮޑު ހަނގުރާމައިގެ ފަހުން ޔޫރަޕުގައި ހިނގަމުން އަންނަ އެންމެ ބޮޑު ހަނގުރާމަ ނިންމުމަށް ދެ ފަރާތުން ވެސް އެއްބަސްވުމަކާ ކައިވެރިވެފައިވާ ކަމުގެ އިޝާރާތެއް ދީފައި ނުވެ އެވެ. 

މިއީ ހަތަރު އަހަރަށް ދެމިގެން ގޮސްފައިވާ ހަނގުރާމަ ނިންމުމަށް ކުރަމުން އަންނަ މަސައްކަތުގެ ތެރެއިން، އެންމެ ފަހުގެ ސިޔާސީ މަސައްކަތެވެ. މި ހަނގުރާމައިގައި މިހާތަނަށް އެއް ލައްކަ އަށް ވުރެ ގިނަ މީހުން މަރުވެ، މިލިއަނެއްހާ މީހުންނަށް ވަނީ ޤައުމު ދޫކޮށް ދާން މަޖުބޫރުވެފަ އެވެ. ރަޝިޔާގެ ހަމަލާ ތަކުގައި ޔޫކްރެއިންގެ އިރުމަތީ އަދި ދެކުނުގެ ބޮޑު ސަރަހައްދުތަކަށް ވަނީ ގިނަ ގެއްލުން ތަކެއް ލިބިފަ އެވެ. 

މި ހަނގުރާމަ ނިމުމަކަށް ގެނެސް، ރަޝިޔާ އާއި ޔޫކްރެެއިންއާ ދެމެދު އެއްބަސްވުމެއް ޤާއިމު ކުރުމަށް އެންމެ ބޮޑަށް ބާރު އަޅަމުން އަންނަނީ އެމެރިކާ އިންނެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް އިސް ހުންނަވައި ފެއްޓެވި މަސައްކަތުގައި މިހާތަނަށް ކާމިޔާބީއަކާ ހަމައަށް ދެވިފައި ނުވެ އެވެ. 

މީގެ ކުރިން ރަޝިޔާ އާއި ޔޫކްރެއިންއާ ދެމެދު ބާއްވަމުން އަންނަ މަޝްވަރާ ތަކުގެ ބައްދަލުވުމެއް އަބޫދާބީގައި ވެސް ވަނީ ކުރިއަށް ގެންގޮސްފަ އެވެ. ނަމަވެސް، އެ މަޝްވަރާ ތަކުގައި ވެސް އެއްވެސް ކުރިއެރުމެއް ލިބިފައި ނުވާއިރު، މައްސަލަ އަށް ޙައްލު ހޯދޭނެ ކަމުގެ އުންމީދެއް ވެސް ފެނިފައި ނުވެ އެވެ. 

ރަޝިޔާގެ ވަފުދާ ގާތް ގުޅުމެއް އޮތް މަސްދަރަކުން އޭއެފްޕީ އަށް މައުލޫމާތު ދެމުން ބުނެފައި ވަނީ، މި ފަހުގެ މަޝްވަރާ ތަކަކީ ވަރަށް އުނދަގޫ މަޝްވަރާ ތަކެއް ކަމަށެވެ. އަންގާރަ ދުވަހު ކުރިއަށް ގެންދިޔަ ބައްދަލުވުމަށް އިޝާރާތްކޮށް އެ މަސްދަރުން ބުނެފައި ވަނީ، މަޝްވަރާތައް ހަ ގަޑިއިރަށް ދެމިގެން ދިޔަ ކަމަށާއި، މަޝްވަރާތައް ފެނުނީ ވަރަށް އުނދަގޫކޮށް ކަމަށެވެ. 

އަންގާރަ ދުވަހުގެ ރޭ ދެއްވި ބަޔާނެއްގައި ޔޫކްރެއިންގެ ރައީސް ވޮލޮޑިމީރް ޒެލެންސްކީ ވިދާޅުވެފައި ވަނީ، ހަނގުރާމަ ނިންމުމަށް ބޭނުންވާ ރަނގަޅު އެއްބަސްވުމަކަށް ދިޔުމަށް އޭނާ ހުންނެވީ ތައްޔާރަސް ކަމަށެވެ. ނަމަވެސް، ސުލްޙަ ހޯދުމަށް ރަޝިޔާ އިން ކުރަމުން އަންނަނީ ކޮން މަސައްކަތެއްތޯ ޒެލެންސްކީ ވަނީ ސުވާލު ކުރައްވައިފަ އެވެ. 

ރަޝިޔާ އިން ބޭނުން ވަނީ ކޮން ކަމެއްތޯ އައްސަވަމުން ޒެލެންސްކީ ވިދާޅުވީ، ސިޔާސީ މަސައްކަތް ކުރުމަށް ވުރެ ބޮޑަށް ރަޝިޔާ އިން ބޭނުން ވަނީ މިސައިލް ހަމަލާ ތަކަށް އިސްކަން ދިނުމަށް ކަމަށެވެ. މީގެ ކުރިން ވެސް ޒެލެންސްކީ ވަނީ، ހަނގުރާމަ ނިންމުމަށް ބޭނުންާވާ ހެޔޮ ނިޔަތް ރަޝިޔާގެ ކިބައިގައި ނެތް ކަމަށް ވިދާޅުވެފަ އެވެ.