ޔޫކްރެއިނުގެ 55،000 ސިފައިން ހަނގުރާމައިގައި މަރުވެއްޖެ: ޒެލެންސްކީ
ފްރާންސްގެ މީޑިއާއަކަށް ދެއްވި ބަސްދީގަތުމެއްގައި ޒެލެންސްކީ ވިދާޅުވީ، މަރުވި މީހުންގެ ތެރޭގައި ޕްރޮފެޝަނަލް ސިފައިންނާއި އަލަށް ސިފައިންގެ ޚިދުމަތަށް ނެރުނު މީހުން ހިމެނޭއިރު، ވީނުވީއެއް ނޭނގި ގެއްލިފައިވާ މީހުންގެ އަދަދުވެސް އިތުރުވަމުންދާ ކަމަށް ވިދާޅުވި. މިއީ މީގެ ކުރިން ހާމަކުރި ހިސާބުތަކާ އަޅާބަލާއިރު ބޮޑު އިތުރުވުމެއް.
ރަޝިއާ އިން ޔޫކްރެއިނަށް ދެމުންދާ ހަމަލާތަކާ ގުޅިގެން، ޔޫކްރެއިނުގެ ޒަޕޮރީޒިއާ ސަރަހައްދުގެ ކުރީސަފުގެ ހަނގުރާމަ ހިނގަމުންދާ ސަރަހައްދެއްގެ ކައިރީގައި ހުރި ތަމްރީނު މައިދާނެއްގައި، އެ ގައުމުގެ އަސްކަރިއްޔާއިން ކުރިއަށްގެންދާ އަސްކަރީ ތަމްރީނުތަކެއްގައި ސިފައިން ބައިވެރިވަނީ - ޖެނުއަރީ 1، 2026. | ރޮއިޓާސް
ރަޝިޔާއާއި ޔޫކްރެއިނާ ދެމެދު ކުރަމުންދާ ހަނގުރާމައިގައި، މަރުވި ޔޫކްރެއިނުގެ ސިފައިންގެ އަދަދު ގާތްގަނޑަކަށް 55،000 އަށް އަރާފައިވާ ކަމަށް އެ ގައުމުގެ ރައީސް ވޮލޮޑިމީރް ޒެލެންސްކީ ވިދާޅުވެއްޖެ އެވެ. ޒެލެންސްކީ މިހެން ވިދާޅުވީ ބުދަ ދުވަހު ފްރާންސް 2 ޓީވީއަށް ދެއްވި ބަސްދީގަތުމެއްގަ އެވެ.
ބުދަ ދުވަހު ދެއްކި، ކުރިން ރެކޯޑުކޮށްފައިވާ މި ބަސްދީގަތުމުގައި ޒެލެންސްކީ ވިދާޅުވީ، ޔޫކްރެއިނުގެ ރަސްމީ ހިސާބުތަކުން ދައްކާ ގޮތުގައި ހަނގުރާމައިގެ މައިދާނުގައި މަރުވި ސިފައިންގެ އަދަދަކީ 55،000 ކަމަށެވެ. މީގެ ތެރޭގައި ޕްރޮފެޝަނަލް ސިފައިންނާއި، ސިފައިންގެ ޚިދުމަތަށް އަލަށް ނެރުނު މީހުންވެސް ހިމެނޭ ކަމަށް އޭނާ ފާހަގަކުރެއްވި އެވެ.
ޒެލެންސްކީ އިތުރަށް ވިދާޅުވީ، މަރުވި މީހުންގެ އިތުރުން، ރަސްމީކޮށް ވީނުވީއެއް ނޭނގި ގެއްލިފައިވާ މީހުންގެ ގޮތުގައި ބޮޑު އަދަދެއް ފާހަގަކުރެވިފައިވާ ކަމަށެވެ.
މީގެ ކުރިން 2025 ވަނަ އަހަރުގެ ފެބްރުއަރީ މަހު އެމެރިކާގެ އެން.ބީ.ސީ ޓީވީ ނެޓްވޯކަށް ދެއްވި ބަސްދީގަތުމެއްގައި ވެސް ޒެލެންސްކީ ވަނީ ހަނގުރާމައިގައި މަރުވި ސިފައިންގެ އަދަދު ހާމަކުރައްވާފަ އެވެ. އެ ފަހަރު އޭނާ ވިދާޅުވެފައި ވަނީ ހަނގުރާމައިގެ މައިދާނުގައި ޔޫކްރެއިނުގެ 46،000 އަށްވުރެ ގިނަ ސިފައިން މަރުވެފައިވާ ކަމަށެވެ.
މަސްދަރު: ރޮއިޓާސް
