ޕޫޓިންއަށް ފާޑުކިޔަމުންދިޔަ ރަޝިޔާގެ ކުރެހުންތެރިއަކު ޕޮލެންޑުގައި ބަޑިޖަހައި މަރާލައިފި

ރަޝިޔާގެ ރައީސް ވްލަޑިމިއަރ ޕޫޓިންގެ ސިޔާސަތުތަކަށް ވަރަށް ބޮޑަށް ފާޑުކިޔަމުންދިޔަ ރަޝިޔާގެ ކުރެހުންތެރިއަކު، ބަޑިޖަހައި ރަހުމުކުޑަގޮތަކަށް މަރާލި މައްސަލައެއް ޕޮލެންޑުގެ ފުލުހުން ތަހުގީގު ކުރަން ފަށައިފިއެވެ.

ޕޮލެންޑުގެ ޕްރޮސެކިއުޓަރުން ވިދާޅުވި ގޮތުގައި، "ސެމްޔޮން ސްކްރެޕެޓްސްކީ" ގެ ނަމުން މަޝްހޫރުވެފައިވާ އުމުރުން 44 އަހަރުގެ ރޮބަޓް ކޭ މަރާލާފައިވަނީ ހޯމަ ދުވަހުގެ ހެނދުނުގެ ވަގުތެއްގައެވެ. އޭނާ މަރާލާފައިވަނީ ބެލަރޫސްގެ ބޯޑަރާ ގާތްގަނޑަކަށް 40 ކިލޯމީޓަރު (25 މޭލު) ދުރުގައި އޮންނަ ޕޮލެންޑުގެ ސިޓީއެއް ކަމަށްވާ ބިއާލާ ޕޮޑްލާސްކާގައެވެ.

ބެލަރޫސްގެ ކޮންސިއުލޭޓާ ގާތްގަނޑަކަށް 600 މީޓަރު ދުރުގައި އޮންނަ އެ ސިޓީގެ ކާރު ޕާކެއްގެ ތެރޭގައި އޭނާ ގަޔަށް ބަޑިޖަހާފައިވާއިރު، އޭނާގެ ބޮލަށާއި، މޭމައްޗަށާއި އަދި ބުރަކަށީގެ އެކި ތަންތަނަށް ޖުމްލަ ފަސް ވަޒަން އަރާފައިވެއެވެ.

ސެމްޔޮން ސްކްރެޕެޓްސްކީ އަކީ ރޮބަޓް ކުޒޮވްކޯވް ބޭނުންކުރަމުންދިޔަ ވަގުތީ ނަމެކެވެ. އޭނާއަކީ ރަޝިޔާގެ ރައީސް ލަޑިމިއަރ ޕޫޓިން އާއި، ބެލަރޫސްގެ ލީޑަރު އެލެގްޒެންޑަރ ލުކަޝެންކޯ އަދި ޗެޗްނިޔާގެ ލީޑަރު ރަމްޒާން ކަދީރޯވް ފަދަ ސިޔާސީ ބޭފުޅުންގެ ކެރިކޭޗަރ ނުވަތަ ހަޖޫ އެކުލެވޭ ކުރެހުންތައް ކުރެހުމަށް މަޝްހޫރު މީހެކެވެ.

ލުބްލިންގެ ޑިސްޓްރިކްޓް ޕްރޮސެކިއުޓަރ އޮފީހުގެ ތަރުޖަމާނު މާސިން ކޮޒަކް ވިދާޅުވި ގޮތުގައި، ބަޑި ހިފައިގެން ހުރި ނޭނގޭ މީހަކު އެ ކުރެހުންތެރިޔާއާ ދިމާލަށް ގޮސް، ފުރަތަމަ ދެ ފަހަރު ބަޑިޖެހިއެވެ.

"އޭނާ ބިމަށް ވެއްޓުމުން، ހަމަލާދިން މީހާ އޭނާއާ ގާތަށް ގޮސް އިތުރު ތިން ފަހަރު ބަޑިޖެހުމަށްފަހު ވަރަށް އަވަހަށް އެ ސަރަހައްދު ދޫކޮށް ފިލައިގެން ދިޔައީ. ރޮބަޓް ކޭ މަރުވީ ހަމަލާދިން ތަނަށް," ތަރުޖަމާނު އިތުރަށް ވިދާޅުވިއެވެ.

މަރުވި މީހާގެ ހަށިގަނޑުގެ ޕޯސްޓްމޯޓަމް ހެދުމަށް ހަމަޖެހިފައިވަނީ އަންނަ ބުދަ ދުވަހުއެވެ.

މި ހާދިސާއާ ގުޅިގެން ފުލުހުން ވަނީ އެ ސިޓީގައި ހުންނަ ބެލަރޫސްގެ ކޮންސިއުލޭޓް ކައިރިން އުމުރުން 33 އަހަރާއި 37 އަހަރުގެ ބެލަރޫސްގެ ދެ ރައްޔިތަކު ހައްޔަރުކޮށްފައެވެ. މި މަރުގެ ހާދިސާގައި އެމީހުންގެ ދައުރަކީ ކޮބައިކަން ދެނެގަތުމުގެ މަސައްކަތް ކުރަމުންދާ ކަމަށް ކޮޒަކް ވިދާޅުވިއެވެ.

މީޑިއާ ރިޕޯޓްތައް ބުނާ ގޮތުގައި ސްކްރެޕެޓްސްކީ ބިއާލާ ޕޮޑްލާސްކާ އަށް ދިރިއުޅުން ބަދަލުކުރީ 2021 ވަނަ އަހަރުއެވެ.

"މަރުވި މީހާއަކީ އާންމުކޮށް ފަންނީ ހަރަކާތްތައް ހިންގާ މީހެއް. އޭނާ ބޭނުންކުރި ސެމްޔޮން ސްކްރެޕެޓްސްކީގެ ނަމުގައި ރަޝިޔާގެ ސަރުކާރުގެ މިހާރުގެ ސިޔާސަތުތަކަށް ވަރަށް ބޮޑަށް ފާޑުކިޔަމުންދިޔަ," ކޮޒަކް ވިދާޅުވިއެވެ.

މިދިޔަ ޖޫން މަހުގެ 12 ވަނަ ދުވަހު ބާލިންގައި ހުންނަ ރަޝިޔާގެ އެމްބަސީ ކުރިމަތީގައި ބޭއްވި "ރަޝިޔާ ޑޭ" އިހުތިޖާޖުގައި ސްކްރެޕެޓްސްކީ ބައިވެރިވާ މަންޒަރު ފެންނަ ވީޑިއޯއެއް ދާދި ފަހުން ސޯޝަލް މީޑިއާގައި ވަނީ އާންމުވެފައެވެ.

އެ އިހުތިޖާޖުގައި އޭނާ ހުރީ ސްޓާލިން އާއި ޕޫޓިން އަށް ހަޖޫ ޖަހާފައިވާ ކުރެހުމެއް ހިފައިގެންނެވެ. މީގެ އިތުރުން، އޭނާގެ ފަޓުލޫނުގައި ރަޝިޔާގެ ދިދައެއް އައްސާފައި އޮތްއިރު، އެ ދިދަ އޮތީ ބިންމަތީގައި ކޭއްތެމުންދާ ގޮތަށެވެ.