ކްރައިމިއާއަށް ޔޫކްރޭނުން ދިން ހަމަލާގައި 4 މަރު، އެތައް ބަޔަކު ޒަޚަމްވެއްޖެ
ޔޫކްރޭނުން ރަޝިއާގެ ކްރަސްނޯޑާގައި ހުރި ތެޔޮ ޓާމިނަލަކަށް ދިން ޑްރޯން ހަމަލާތަކާ ގުޅިގެން އެ ސަރަހައްދުގެ ފެރީގެ ޚިދުމަތް މެދުކަނޑާލައި، ކްރައިމިއާގެ ބައެއް ހިސާބުތަކުން ކަރަންޓު ކެނޑިއްޖެ. މި ހަމަލާތަކުގެ ސަބަބުން ކްރައިމިއާގައި ތެލުގެ ދަތިކަން ބޮޑުވެ، އާންމުންނަށް ތެޔޮ ވިއްކުން ވަގުތީ ގޮތުން ހުއްޓާލާފައިވާއިރު، ރަޝިއާގެ އަސްކަރިއްޔާއިން ވަނީ ޔޫކްރޭނުގެ 239 ޑްރޯން ވައްޓާލާފައިވާ ކަމަށް ބުނެފައި. މި ހަމަލާތަކުގެ ސަބަބުން ދަތުރުފަތުރަށް ބޮޑެތި ބުރޫތަކެއް އަރައި، ރޭލު ދަތުރުތައް ވެސް ވަނީ ވަރަށް ބޮޑަށް ލަސްވެފައި.
ޔޫކްރެއިނުން ކާޗްގައި ހުންނަ ތެޔޮ ގުދަނަކަށާއި، ކަވްކާޒް ބަނދަރަށް ވަރުގަދަ ހަމަލާތަކެއް ދީފިއެވެ. މީގެ އިތުރުން، ކާޗް ކަނޑުއޮޅިން ދަތުރުކުރަމުންދިޔަ ފެރީއަކަށްވެސް ޔޫކްރެއިނުން ވަނީ ހަމަލާދީފައި. | އެކްސް
ރަޝިއާގެ ބާރުގެ ދަށުގައި އޮންނަ ކްރައިމިއާ ޕެނިންސިއުލާއަށް ޔޫކްރޭނުން ދިން ޑްރޯން ހަމަލާތަކެއްގައި ހަތަރު މީހުން މަރުވެ، 28 މީހުން ޒަޚަމްވެފައިވާ ކަމަށް ރަޝިއާއިން އެ ސަރަހައްދަށް ކަނޑައަޅާފައި ހުންނަވާ ގަވަރުނަރު ވިދާޅުވެއްޖެއެވެ.
މީގެ އިތުރުން، ރަޝިއާގެ ކްރަސްނޯޑާ ސަރަހައްދުގައި ހުންނަ ތެޔޮ އުފުލާ މަރުކަޒަކަށް ޔޫކްރޭނުން ދިން ޑްރޯން ހަމަލާއެއްގައި ފެރީއެއްގައި ހުރި މީހަކު މަރުވެ، ތެޔޮ ޓާމިނަލެއްގައި ރޯވެފައިވާ ކަމަށް އެ ސަރަހައްދުގެ ކަމާބެހޭ އިދާރާތަކުން ވަނީ ބުނެފައެވެ. ޔޫކްރޭނުގެ ރައީސް ވޮލޮޑިމީރް ޒެލެންސްކީ ވެސް ވަނީ މި ހަމަލާ ދިންކަން ކަށަވަރުކޮށްދެއްވާފައެވެ.
ރަޝިއާގެ ޑިފެންސް މިނިސްޓްރީން ހާމަކޮށްފައިވާ ގޮތުގައި، ރޭގަނޑުގެ ވަގުތެއްގައި ޔޫކްރޭނުން ފޮނުވާލި 239 ޑްރޯން ރަޝިއާގެ އަސްކަރިއްޔާއިން ވަނީ ވައްޓާލާފައެވެ.
ކްރައިމިއާގެ ގަވަރުނަރު ސަރްގޭ އަކްސިއޮނޯވް ވިދާޅުވީ، މި ހަމަލާތަކާ ގުޅިގެން މުޅި ޕެނިންސިއުލާގެ ފިއުލް ސްޓޭޝަންތަކުން އާންމުންނަށާއި ވިޔަފާރިތަކަށް ތެޔޮ ވިއްކުން މެދުކަނޑާލާފައިވާ ކަމަށެވެ. އަދި މިވަގުތު ތެޔޮ ދޫކުރަމުންދަނީ ހަމައެކަނި އަސާސީ ޚިދުމަތްތައް ދޭ ސަރުކާރުގެ އިދާރާތަކަށާއި ސަލާމަތީ ބާރުތަކަށް އެކަނި ކަމަށް އޭނާ ވިދާޅުވިއެވެ.
ރަޝިއާގެ ބްލެކް ސީ ފްލީޓް ނުވަތަ ކަނޑުގެ ސިފައިންގެ މަރުކަޒު ހުންނަ ކްރައިމިއާއަށް ޔޫކްރޭނުން ދޭ ޑްރޯން ހަމަލާތައް ފަހަކަށް އައިސް ވަނީ ވަރަށް ބޮޑަށް އިތުރުކޮށްފައެވެ. ޗުއްޓީ މޫސުން ފެށުނު ދަނޑިވަޅުގައި ދިން މި ހަމަލާތަކުގައި އަމާޒުކޮށްފައިވަނީ އެ ސަރަހައްދަށް ތަކެތި ފޯރުކޮށްދޭ މަގުތަކަށް ކަމަށްވާއިރު، މީގެ ސަބަބުން އެ ސަރަހައްދުގައި ތެލުގެ ދަތިކަން ވަނީ ބޮޑުވެފައެވެ.
އެ ސަރަހައްދުގެ ކަރަންޓުގެ ޚިދުމަތްދޭ ކުންފުނިން ބުނި ގޮތުގައި، ކަރަންޓު ނެޓްވޯކްތަކަށް ލިބުނު ގެއްލުންތަކާ ގުޅިގެން ބައެއް ސަރަހައްދުތަކުން ވަނީ ކަރަންޓު ކެނޑިފައެވެ. އަދި ކްރައިމިއާ އާއި ކްރަސްނޯޑާ ސަރަހައްދު ގުޅުވައިދޭ ކާޗް ސްޓްރެއިޓް ހުރަސްކޮށް ދަތުރުކުރާ ފެރީގެ ޚިދުމަތް ވެސް ވަނީ ވަގުތީ ގޮތުން މެދުކަނޑާލާފައެވެ.
މީގެ އިތުރުން، ކްރައިމިއާ އާއި ރަޝިއާގެ ކްރަސްނޯޑާ ގުޅުވައިދޭ ބްރިޖުގެ ޓްރެފިކް ކަމާބެހޭ ފަރާތްތަކުން ނުވަ ގަޑިއިރަށް ވުރެ ގިނަ އިރަށް ހުއްޓުވާފައިވުމުގެ ސަބަބުން، 11 ރޭލެއްގެ ދަތުރުތައް ވަނީ ތާވަލަށް ވުރެ ލަސްވެފައެވެ.
މަސްދަރު: ރޮއިޓާސް
