ރަޝިޔާއިން ބުނަނީ އެއް ރޭގެ މަތިން ޔޫކްރެއިނުގެ 660 ޑްރޯން ވައްޓާލި ކަމަށް

ޔޫކްރެއިނުން ރަޝިޔާގެ ވައިގެ ދިފާއީ ނިޒާމުތަކަށާއި ހަކަތަ އުފައްދާ ވަސީލަތްތަކަށް އަމާޒުކޮށް ވަރުގަދަ ހަމަލާތަކެއް ދެމުންދަނިކޮށް، އެއް ރޭގެ މަތިން ޔޫކްރެއިނުގެ 660 ޑްރޯން ވައްޓާލާފައިވާ ކަމަށް ރަޝިޔާއިން ރިޕޯޓްކޮށްފި އެވެ.

ރަޝިޔާގެ މިނިސްޓްރީ އޮފް ޑިފެންސުން ހުކުރު ދުވަހު ހާމަކުރި ގޮތުގައި، ވައްޓާލި ޑްރޯންތަކުގެ އަދަދަށް ބަލާއިރު، މިއީ ކީވްއިން ދުރު ރާސްތާގެ ހަމަލާތައް ދޭން ފެށި ފަހުން ދިން އެންމެ ބޮޑު އެއް ހަމަލާއެވެ. ޔޫކްރެއިނުން ރަޝިޔާގެ އެތެރެއަށާއި ކްރައިމިއާ ޕެނިންސިއުލާއަށް އަމާޒުކޮށް ދެމުންދާ ވަރުގަދަ ޑްރޯން ހަމަލާތަކުގެ ސަބަބުން ސަލާމަތީ ބިރުވެރިކަމާއި ތެލުގެ ދަތިކަން ވަނީ ކުރިމަތިވެފައެވެ. މީގެ ސަބަބުން، 2022 ވަނަ އަހަރުގެ ފެބްރުއަރީ މަހު ރަޝިޔާއިން ޔޫކްރެއިނަށް އަރައި ފެށި ހަނގުރާމައިގެ ތެރެއަށް، ރަޝިޔާގެ ބައިވެރިއެއް ކަމަށްވާ ބެލަރޫސް ވެސް ވައްދަން މޮސްކޯއިން މަސައްކަތް ކޮށްފާނެ ކަމުގެ ކަންބޮޑުވުން ވަނީ އިތުރުވެފަ އެވެ.

ޔޫކްރެއިނުން ދިން އެންމެ ފަހުގެ ޑްރޯން ހަމަލާތަކުގައި ރަޝިޔާގެ ވެރިރަށް މޮސްކޯއާއި، ރަޝިޔާއިން ގަވާއިދާ ހިލާފަށް އަތްގަދަކޮށްފައިވާ ކްރައިމިއާ ޕެނިންސިއުލާގެ އިތުރުން ބްލެކް ސީ އަދި އެޒޯވް ސީ ހިމެނޭހެން 13 ސަރަހައްދަކުން ޑްރޯންތައް ހުއްޓުވާފައިވާ ކަމަށް ރަޝިޔާއިން ބުނެ އެވެ.

މޮސްކޯގެ ދެކުނުން ގާތްގަނޑަކަށް 180 ކިލޯމީޓަރު (112 މޭލު) ދުރުގައި އޮންނަ ޓޫލާ ސަރަހައްދަށް އަމާޒުކޮށް ދިން "ވަރުގަދަ" ހަމަލާއެއްގައި ގެއަކަށް ގެއްލުންވެ، އަންހެނަކަށް އަނިޔާވެފައިވާ ކަމަށް އެ ސަރަހައްދުގެ ގަވަރުނަރު ޑިމިޓްރީ މިލްޔައޭވް ވިދާޅުވި އެވެ.

މީގެ އިތުރުން، މޮސްކޯގެ ދެކުނުން 200 ކިލޯމީޓަރު (125 މޭލު) ދުރުގައި އޮންނަ ނޮވޮމޮސްކޯވްސްކްގައި ހުންނަ ސިނާއީ މަރުކަޒަކަށް ވެސް ގެއްލުން ލިބިފައިވާ ކަމަށް މިލްޔައޭވް ވިދާޅުވި އެވެ.

ރަޝިޔާގެ މީޑިއާ އައުޓްލެޓެއް ކަމަށްވާ 'އަސްޓްރާ' އިން ރިޕޯޓްކޮށްފައިވާ ގޮތުގައި، ގެއްލުން ލިބުނު މަރުކަޒަކީ 'އަޒޮޓް' ޕްލާންޓެވެ. ޔޫކްރެއިނުގެ ރައީސް ވޮލޮޑިމިރު ޒެލެންސްކީ ސިފަކުރައްވާފައިވާ ގޮތުގައި އެއީ ރަޝިޔާއިން ގޮވާތަކެތި އުފެއްދުމަށް ބޭނުންކުރާ މުހިންމު މަރުކަޒެކެވެ. މި ހަމަލާތަކަކީ ރަޝިޔާގެ ހަނގުރާމައިގެ ޚަރަދުތައް ހަމަޖެއްސުމަށް ބޭނުންކުރާ މައިގަނޑު އާމްދަނީގެ ވަސީލަތް ކަމަށްވާ ހަކަތަ އުފައްދާ ވަސީލަތްތައް ހުއްޓުވުމަށް ޔޫކްރެއިނުން ވަރުގަދަ ކުރަމުންދާ ވައިގެ ހަމަލާތަކުގެ ތެރެއިން ދިން ހަމަލާތަކެކެވެ.

ޔޫކްރެއިނުގެ މި ހަމަލާތަކުގެ ސަބަބުން ރަޝިޔާއަށް ތެލުގެ ދަތިކަން ކުރިމަތިވެ، ރަޝިޔާ ސިފައިންނަށް ބޭނުންވާ ތަކެތި ފޯރުކޮށްދޭ މަގުތަކަށް ހުރަސް އެޅި، ހަތަރު އަހަރަށްވުރެ ގިނަ ދުވަސްވީ ހަނގުރާމައިގެ މަސައްކަތްތަކަށް ވަނީ މަޑުޖެހުމެއް އައިސްފަ އެވެ.

ޔޫކްރެއިނުގެ އިރުމަތީ ފްރަންޓްލައިންގައި ކުރިއަށް ދިއުމަށާއި، ގައުމުގެ އެތެރެއަށް އަމާޒުވާ ޑްރޯން ހަމަލާތަކުން ދިފާއުވުމަށް މޮސްކޯގެ ސިފައިންނަށް ދަތިތަކާ ކުރިމަތިވަމުންދާއިރު، ޔޫކްރެއިނުގެ ރައީސް ވޮލޮޑިމިރު ޒެލެންސްކީ ވަނީ އަވަށްޓެރި ބެލަރޫސްގެ އެހީތެރިކަން ހޯދުމަށް މޮސްކޯއިން މަސައްކަތް ކުރަމުންދާ ކަމަށް ތުހުމަތު ކުރައްވާފަ އެވެ.

ޔޫކްރެއިނުގެ ބޯޑަރު ކައިރީގައި އަސްކަރީ ބޭނުންތަކަށް ބެލަރޫސްއިން އިންފްރާސްޓްރަކްޗަރާއި ތަކެތި ރައްކާކުރާ ގުދަންތައް ބިނާކުރަމުންދާ ކަމުގެ އިންޓެލިޖެންސް މައުލޫމާތު ލިބިފައިވާ ކަމަށް ބުރާސްފަތި ދުވަހު ޒެލެންސްކީ ވިދާޅުވި އެވެ.

އޭނާ ވިދާޅުވި ގޮތުގައި މި ފިޔަވަޅުތައް އަޅަމުންދަނީ "ރަޝިޔާގެ ސީދާ ނުފޫޒުގެ ދަށުން، ޔޫކްރެއިނާ ދެކޮޅަށް ދޭ ހަމަލާތައް އިތުރަށް ފުޅާކުރުމަށް ތައްޔާރުވުމުގެ ގޮތުން" ނެވެ.

ޒެލެންސްކީ ލިޔުއްވާފައިވާ ގޮތުގައި، "ސުލްހައަށްޓަކައި ބެލަރޫސްއިން އަޅަންޖެހޭ ފިޔަވަޅުތައް އެ ގައުމަށް އެނގޭނެއެވެ. ބެލަރޫސް މެދުވެރިކޮށް ޔޫކްރެއިނަށް ހަމަލާދިނުމަށް ބޯޑަރުގައި ބިނާކުރާ އިންފްރާސްޓްރަކްޗަރުތައް ހުއްޓުވަން ޖެހެއެވެ."

މި ވާހަކަތައް ދައްކަވާފައިވަނީ، ޔޫކްރެއިނަށް ދޭ ހަމަލާތައް ވަރުގަދަކުރުމަށްޓަކައި ބެލަރޫސްގެ ބިން ބޭނުންކުރުމުގެ ހުއްދަ ހޯދުމަށް، މާލީ އެހީތެރިކަން ހިމެނޭހެން އެކި ގޮތްގޮތުން ރަޝިޔާއިން ބެލަރޫސްއަށް ފިއްތުންތައް ކުރިމަތިކުރަމުންދާ ކަމަށް އެމެރިކާގެ މީޑިއާތަކުން ރިޕޯޓްކޮށްފައިވާ ދަނޑިވަޅެއްގަ އެވެ.

ބެލަރޫސްއިން އަލުން ހަނގުރާމައިގެ ތެރެއަށް ވަންނަ ވާހަކަތައް ދޮގުކުރުން

ރަޝިޔާއިން ވެސް ވަނީ އެ ރިޕޯޓްތައް ދޮގުކޮށްފައެވެ. ކްރެމްލިންގެ ތަރުޖަމާނު ޑިމިޓްރީ ޕެސްކޯވް ވިދާޅުވީ އެ ވާހަކަތަކަކީ "ހަގީގަތާ ޚިލާފު" ވާހަކަތަކެއް ކަމަށެވެ.

ހަތަރު އަހަރަށްވުރެ ގިނަ ދުވަސް ކުރިން ޔޫކްރެއިނަށް އެންމެ ފުރަތަމަ އަރައިގަތްއިރު، ބެލަރޫސްގެ ދެކުނު ބޯޑަރު ހުރަސްކޮށް ޔޫކްރެއިނަށް ވަނުމަށް ރަޝިޔާ ސިފައިން އެ ގައުމުގައި ޖަމާވުމުގެ ފުރުސަތު ބެލަރޫސްއިން ދީފައިވެއެވެ. ނަމަވެސް، މިހާރު ބެލަރޫސްއިން ތުހުމަތުކުރާ ގޮތުގައި ޔޫކްރެއިނާއި ހުޅަނގުގެ ގައުމުތަކުން ދަނީ މަސްލަހަތު ގޯސްކޮށް، އެ ގައުމު ހަނގުރާމައިގެ ތެރެއަށް ވެއްދުމަށް މަސައްކަތް ކުރަމުންނެވެ.

ބެލަރޫސްގެ ރައީސް އެލެގްޒެންޑަރ ލުކަޝެންކޯ ބުރާސްފަތި ދުވަހު ވިދާޅުވީ، ބެލަރޫސް ހަނގުރާމައިގެ ތެރެއަށް ވެއްދުމަށް ކީވްއިން މަސައްކަތް ނުކުރުމަށް، އެ ގައުމަށް ޒިޔާރަތްކުރި ޔޫކްރެއިނުގެ އޮފިޝަލުންނަށް އިންޒާރު ދެއްވާފައިވާނެ ކަމަށެވެ.

ޔޫކްރެއިނާ ހަނގުރާމަ ކުރުމުގެ އެއްވެސް ނިޔަތެއް ބެލަރޫސްގެ ނެތް ކަމަށް ވިދާޅުވެ، އޭނާ ބޭނުންވަނީ "އެއްބަސްވުމަކަށް" އަންނަން ކަމަށް ލުކަޝެންކޯ ތަކުރާރުކޮށް ވިދާޅުވި އެވެ.

ޓީވީ މެދުވެރިކޮށް ދެއްވި ބަޔާނެއްގައި ލުކަޝެންކޯ ވިދާޅުވީ، "އަޅުގަނޑު އެ ބޭފުޅުންނަށް ސީދާ ބުނިން: ތިޔަބޭފުޅުންގެ ރައީސް ގާތު ބުނާށޭ، އަޅުގަނޑުމެންނާ އެގޮތަށް ވާހަކަދެއްކޭނެ ކަމަށް ނުވަތަ ހަނގުރާމައިގެ ތެރެއަށް އަޅުގަނޑުމެން ވެއްދޭނެ ކަމަށް އެމަނިކުފާނު ހީފުޅުކުރައްވާނަމަ، ހަނގުރާމައިގެ ސިފަ ވަގުތުން ބަދަލުވެގެންދާނެކަން އެމަނިކުފާނު ދަންނަންޖެހޭނެ އެވެ."

ލުކަޝެންކޯ އިތުރަށް ވިދާޅުވީ، "އަޅުގަނޑުމެންނަށް ޖަވާބު ލިބުނު: ރައީސާއި އޭނާގެ ޓީމަށް މިކަން ވިސްނޭ ކަމަށް. އެހެންވީމާ، އެއްބަސްވުމަކަށް އަންނަމާ ހިނގާ. އަޅުގަނޑުމެން ބޭނުންވަނީ މާނަހުރި އެއްބަސްވުމަކަށް އަންނަން."

ރަޝިޔާއާ ގުޅިގެން ހަނގުރާމަ ކުރުމަށް ލުކަޝެންކޯ ބެލަރޫސްގެ ސިފައިން ފޮނުވާފައި ނުވި ނަމަވެސް، 2022 ވަނަ އަހަރު ޔޫކްރެއިނަށް އެރުމަށް ބެލަރޫސްގެ ބިން ބޭނުންކުރުމުގެ ހުއްދަ ދިނުމުގެ އިތުރުން، ރަޝިޔާގެ ޓެކްޓިކަލް ނިއުކްލިއާ މިސައިލްތައް ބެލަރޫސްގައި ބެހެއްޓުމަށް އޭނާ ވަނީ އެއްބަސްވެފަ އެވެ.

މީގެ އިތުރުން، ބެލަރޫސްއިން ދަނީ ރަޝިޔާއާ ގުޅިގެން ގަވާއިދުން އަސްކަރީ ތަމްރީނުތައް ބާއްވަމުންނެވެ. އަދި ރަޝިޔާގެ އަސްކަރީ މަރުކަޒުތަކާއި ތަމްރީނުދޭ ތަންތަން ބޭނުންކުރުމުގެ ހުއްދަ ވެސް މޮސްކޯއަށް ވަނީ ދީފަ އެވެ.