އަރާގްޗީ އިރާޤަށް ވަޑައިގެންނެވީ ދެ ޤައުމުގެ ގުޅުން ވަރުގަދަ ކުރުމުގެ އިތުރުން، ޚާމަނާާއީގެ ޖަނާޒާގެ ކަންކަން ތަރުތީބު ކުރެއްވުމަށް

އިރާޤަށް ކުރައްވަމުން ގެންދަވާ ދަތުރުފުޅަކީ ދެ ޤައުމުގެ ދެ މެދުގައި އޮތް ގުޅުން އިތުރަށް ބަދަހި ކުރުމުގެ އިތުރުން، އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީގެ ޖަނާޒާގެ ކަންކަން ތަރުތީބު ކުރެއްވުމަށް ކަމަށް، އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

އިރާޤުގެ ވެރި ރަށް ބަޣްދާދުގައި ނޫސްވެރިންނާ ވާހަކަ ދައްކަވަމުން އަރާގްޗީ ވިދާޅުވީ، އެ ދަތުރުފުޅުގެ މައިގަނޑު އެއް ބޭނުމަކީ ކުރީގެ ރޫހީ ލީޑަރު ޚާމަނާއީގެ ޖަނާޒާގެ ކަންކަމަށް ތައްޔާރުވުމާއި، އެކަމާ ގުޅޭ އިންތިޒާމުތައް ހަމަޖެއްސުން ކަމަށެވެ. މީގެ އިތުރުން ދެ ޤައުމުގެ ދެ މެދުގައި އޮތް ގުޅުމާއި، ސަރަހައްދީ މުހިންމު ކަންކަމާ ގުޅޭ ގޮތުން އިރާޤުގެ އިސްވެރިންނާ އެކު މަޝްވަރާ ކުރެއްވުމަށް ކަމަށް ވެސް އަރާގްޗީ ވިދާޅުވި އެވެ. 

އަރާގްޗީ ވިދާޅުވި ގޮތުގައި، އީރާން އާއި އިރާޤަކީ އަބަދު ވެސް ގާތް ގުޅުމެއް ބާއްވަމުން އަންނަ ދެ ޤައުމު ކަމަށްވާއިރު، މި ދަނޑިވަޅުގައި ސަރަހައްދީ ހަމަޖެހުމާއި ދެ ޤައުމުގެ މަސްލަޙަތު ހިމެނޭ ކަންކަމުގައި ވާހަކަ ދެއްކުމަކީ ކޮންމެހެން ބޭނުންތެރި ކަމެކެވެ. މި ދަތުރުފުޅުގައި އިރާޤުގެ ސަރުކާރުގެ އިސް ބޭފުޅުންނާ ބައްދަލު ކުރައްވައު، ސަރަހައްދީ ސަލާމަތާއި ރައްކާތެރިކަމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ވެސް ކުރައްވާނެ އެވެ. 

އީރާންގެ އެންމެ ނުފޫޒު ގަދަ ލީޑަރުގެ ގޮތުގައި ވެސް ފާހަގަ ވެފައިވާ ޚާމަނާއީ އަވަހާރަވެފައި ވަނީ، އެމެރިކާ އާއި އިޒްރޭލް އިން އީރާން އަށް ދިން ހަމަލާ ތަކެއްގައި އެވެ. އެއީ އީރާންގެ އިތުރުން މުޅި ދުނިޔެ އަށް ވެސް ސިހުން ގެނުވި ހާދިސާ އެކެވެ. އީރާން އިން އަންނަނީ ޚާމަނާއީގެ ޖަނާޒާ އަށް ވަރަށް ބޮޑަށް ތައްޔާރު ވަމުންނެވެ. 

އިރާޤަށް ކުރައްވާ ދަތުރުފުޅުގެ ތެރެއިން އަރާގްޗީ ވަނީ އެ ޤައުމުގެ ފޮރިން މިނިސްޓަރު ފުއާދު ޙުސެއިންއާ ބައްދަލު ކުރައްވައި، ގިނަ ކަންތައްތަކާާ ގުޅޭ ގޮތުން މަޝްވަރާ ކުރައްވައިފަ އެވެ. އޭގެ ތެރޭގައި އެމެރިކާ އާއެކު ޤާއިމު ކޮށްފައިވާ ހަނގުރާމަ ހުއްޓާލުމުގެ އެއްބަސްވުމާއި، ހުރްމުޒް ކަނޑު އޮޅީގެ މައްސަލައާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރައްވާފައިވެ އެވެ.