ހަނގުރާމަ ފެށި ފަހުން ޗައިނާ އަށް ކުރައްވާ ފުރަތަމަ ދަތުރުފުޅުގައި އަރާގްޗީ އެ ޤައުމަށް ވަޑައިގެންފި

އެމެރިކާ އިން އީރާންއާ ދެކޮޅަށް ހަނގުރާމަ ފެށި ފަހުން، ޗައިނާ އަށް ކުރައްވާ ފުރަތަމަ ދަތުރުފުޅުގައި އީރާންގެ ފޮރިން މިނިސްޓަރު އައްބާސް އަރާގްޗީ އެ ޤައުމަށް ވަޑައިގެންފި އެވެ. 

އެމެރިކާާ އާއި އިޒްރޭލް އެކުވެގެން، މިއަހަރުގެ ފެބްރުވަރީ މަހުގެ 28 ވަނަ ދުވަހު އީރާންއާ ދެކޮޅަށް ހަނގުރާމަ ފެށި ފަހުން އެކި ފަހަރު މަތިން އަރާގްޗީ ވަނީ ޗައިނާގެ ފޮރިން މިނިސްޓަރު ވަންގް ޔީއާ ފޯނުން ގުޅުއްވައި މަޝްވަރާ ކުރައްވައިފަ އެވެ. އެގޮތުން މި ދެ ބޭފުޅުން ތިން ފަހަރެއްގެ މަތިން ފޯނުން ގުޅުއްވައި ވަނީ މަޝްވަރާ ކުރައްވައިފަ އެވެ. 

ބުދަ ދުވަހުގެ ވަގުތެއްގައި އަރާގްޗީ ޗައިނާ އަށް ވަޑައިގެންފައިވާއިރު، މި ދަތުރުފުޅުގެ އެޖެންޑާގައި އޮތީ މައިގަނޑު ދެ މައްސަލަ އެކެވެ. އެއީ ހަނގުރާމަ ހުއްޓާލުމަށް ވެފައިވާ އެއްބަސްވުން ދެމެހެއްޓުމާއި، ދުނިޔޭގެ ވިޔަފާރީގެ މުހިންމު މަގެއް ކަމަށްވާ ހޮރްމޫޒް ކަނޑު އޮޅި އަލުން ހުޅުވާލުމެވެ. މި ދެ މައްސަލަ އަކީ، ޗައިނާ އިން ވެސް ވަރަށް ބޮޑު އިސްކަމެއް ދީގެން، އަދި ޙައްލު ހޯދުމަށް ބާރު އަޅަމުން އަންނަ ދެ މައްސަލަ އެވެ. 

ހޮރްމޫޒް ކަނޑު އޮޅި ހުޅުވުމުގެ މައްސަލައިގައި ޗައިނާ އިން ވަނީ، އެމެރިކާ އިން އީރާންއާ ދެކޮޅަށް އަޅާފައިވާ ބްލޮކޭޑަށް ފާޑު ކިޔައިފަ އެވެ. ނަމަވެސް، އީރާން އިން ހޮރްމޫޒް ކަނޑު އޮޅި ބަންދު ކޮށްފައި އޮންނަ އޮތުމާއި، އެކަމުގެ ސަބަބުން ދިމާވަމުން އަންނަ ދަތިތަކާ މެދު ވެސް ޗައިނާ އިން ނުރުހޭ ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ. 

އީރާންގެ ފޮރިން މިނިސްޓަރު އަރާގްޗީ ޗައިނާ އަށް ވަޑައިގެންނެވިއިރު، އީރާން އިން އަލުން ހޮރްމޫޒް ކަނޑު އޮޅި ހުޅުވާލުމަށް އެއްބަސްވެއްޖެ ނަމަ، ޗައިނާ އިން ކިހާ ވަރަކަށް އެހީތެރިކަން ލިބިދާނެތޯ ދެނެގެތުމަކީ އީރާންގެ އެންމެ ބޮޑު ބޭނުން ކަމަށް ރިޕޯޓުތައް ބުނެ އެވެ. އަދި އެމެރިކާ އާއި އިޒްރޭލް އިން އީރާންއާ ދެކޮޅަށް ކުރާ ހަނގުރާމަ އާއި، އީރާންއާ ދެކޮޅަށް އިތުރު ފިޔަވަޅު ތަކެއް އެޅުމަށް ކުރަމުން އަންނަ މަސައްކަތުގައި ޗައިނާ އޮތީ އީރާންގެ ފަޅީގައިތޯ ޔަޤީން ކުރަން ބޭނުންވާ ކަމަށް ވެސް ފާހަގަ ކޮށްފައިވެ އެވެ. 

ބައިނަލްއަޤުވާމީ ގުޅުން ތަކުގެ ތަޖުރިބާާކާރުން ބުނާ ގޮތުގައި، މި ދަތުރަކީ އީރާން އާއި ޗައިނާގެ ދެމެދުގައި އޮންނަ ސިޔާސީ އަދި އިޤްތިޞާދީ ގުޅުމުގެ ބާރު މިނުގައި ބާއްވާ މުހިންމު މަޝްވަރާ ތަކެއްގެ ފުރުސަތަކަށް ވާނެ އެވެ. އީރާން އާއި ޗައިނާ އިން އަންނަނީ ދެ ޤައުމުގެ ދެ މެދުގައި އޮތް ގުޅުން އިތުރަށް ފުޅާ ކުރުމަށް ގިނަ މަސައްކަތް ތަކެއް ކުރަމުންނެވެ.