އެމެރިކާ އާއި އިޒްރޭލްގެ އަމަލުތައް ކުށްވެރި ކުރުމަށް، އީރާން އިން ބްރިކްސްގެ ޤައުމު ތަކަށް ގޮވާލައިފި

އެމެރިކާ އާއި އިޒްރޭލް އިން ބައިނަލްއަޤުވާމީ ޤާނޫނުތަކާ ޚިލާފަށް ހިންގަމުންދާ އަމަލުތައް ކުށްވެރި ކުރުމަށް، އީރާން އިން ބްރިކްސްގެ މެމްބަރު ޤައުމު ތަކަށް ގޮވާލައިފި އެވެ. 

އީރާންގެ ފޮރިން މިނިސްޓަރު އައްބާސް އަރާގްޗީ މިހެން ގޮވާލައްވާފައި ވަނީ، ބުރާސްފަތި ދުވަހު އޭނާގެ ރަސްމީ ޓެލެގްރާމް އެކައުންޓު މެދުވެރިކޮށް ނެރުނު ބަޔާނެއްގަ އެވެ. 

އެ ބަޔާނުގައި އަރާގްޗީ ވަނީ، ބައިނަލްއަޤުވާމީ މުއައްސަސާތައް ސިޔާސީ ހަތިޔާރަކަށް ހެދުނު ހުއްޓުވުމަށް ބްރިކްސްގެ ޤައުމު ތަކުން މަސައްކަތް ކުރުމަށް ބާރު އަޅުއްވައިފަ އެވެ. އަދި ހުޅަނގުގެ ޤައުމު ތަކުން ގެން ގުޅޭ، "އެމީހުންނަކީ އެންމެ މަތީ މީހުން ކަމަށް ދެކޭ ދެކުމާއި" އަދި ޤާނޫނު ތަކުން ބޭރުގައި އުޅެވޭނެ ކަމަށް ޤަބޫލު ކުރާ ކުރުން ހުރިހާ ޤައުމު ތަކުން ގުޅިގެން ނައްތާލަން ޖެހޭ ކަމަށް ވެސް އޭނާ ވިދާޅުވި އެވެ. 

އީރާންގެ ފޮރިން މިނިސްޓަރު އިތުރަށް ވިދާޅުވީ، ބައިނަލްއަޤުވާމީ ޤާނޫނުތަކާ ޚިލާފަށް އެމެރިކާ އާއި އިޒްރޭލް އިން ހިންގާ އަމަލު ތަކަށް ގޮންޖަހައި، އެކަންކަން ހުއްޓުވުމަށް ބްރިކްސްގެ މެމްބަރުން އިސް ނަގަން ޖެހޭ ކަމަށެވެ. މިއީ ދުނިޔޭގެ އިންސާފު ޤާއިމު ކުރުމަށްޓަކައި ކޮންމެހެން ކުރަން ޖެހޭ ކަމެއްގެ ގޮތުގައި އޭނާ ސިފަ ކުރެއްވި އެވެ. 

ބްރިކްސް އަކީ ދުނިޔޭގެ އިޤްތިޞާދީ ގޮތުން ކުރިއަރަމުން އަންނަ ބޮޑެތި ޤައުމުތައް ހިމެނޭ ޖަމާއަތެކެވެ. މި ޖަމާއަތުގައި ހިމެނޭ މެމްބަރު ޤައުމު ތަކަކީ ބްރެޒިލް، ރަޝިޔާ، އިންޑިއާ، ޗައިނާ، ދެކުނު އެފްރިކާ، މިޞްރު، އިތިއޯޕިއާ، އީރާން، ޔުނައިޓެޑު އަރަބް އެމިރޭޓްސް (ޔޫއޭއީ) އަދި އިންޑޮނޭޝިއާ އެވެ. 

މި ޖަމާއަތަކީ ހުޅަނގުގެ ބާރު ތަކުގެ ނުފޫޒު ކުޑަކޮށް، ދުނިޔޭގެ ސިޔާސީ އަދި އިޤްތިޞާދީ ނިޒާމަށް ބަދަލުތަކެއް ގެނައުމަށް މަސައްކަތް ކުރާ މުހިންމު ޕްލެޓްފޯމެއްގެ ގޮތުގައި ބެލެވެ އެވެ. އީރާން އިން މިފަދަ ގޮވާލުމެއް ނެރެފައި މި ވަނީ މެދު އިރުމަތީގެ މަސްރަހު ނުތަނަވަސްވެފައިވާ ވަގުތެއްގަ އެވެ.