ސަރަހައްދީ ސަލާމަތާއި ރައްކާތެރިކަން ޤާއިމު ކުރުމުގައި އީރާން ބާކީ ނުކުރެވޭނެ: އީރާންގެ ފޮރިން މިނިސްޓަރު

މެދު އިރުމަތީގެ ސަރަހައްދުގައި އައު ސަލާމަތާއި ރައްކާތެރިކަން އެކުލަވާލުމަށް ކުރަމުން އަންނަ މަސައްކަތުގައި، ސަރަހައްދުގެ ހުރިހާ ޤައުމު ތަކެއް ބައިވެރިވުން މުހިންމު ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

އަރާގްޗީ ވިދާޅުވެފައި ވަނީ، ސަރަހައްދީ ސަލާމަތާއި ރައްކާތެރިކަން ހަމަޖެއްސުމުގައި އީރާން ވަކި ކުރުމަކުން ނުވަތަ އީރާން އަށް ސަމާލުކަން ނުދިނުމަކުން އެކަން ހާސިލު ކުރެވިދާނެ ކަމަކަށް ނުބެލެވޭ ކަމަށެވެ. އޭނާގެ ބަޔާނުގައި ވިދާޅުވެފައި ވަނީ، މެދު އިރުމަތީގެ ސަރަހައްދުގައި އައު ސަލާމަތީ ބައްޓަމެއް އެކުލަވާލުމަށް ހިނގަމުން އަންނަ މަސައްކަތް ތަކުގައި ހުރިހާ ގައުމު ތަކެއްގެ ބައިވެރިވުން ލިބިގެންވާނީ ހަމައެކަނި ޖަމާޢީ އެއްބާރުލުމާ އެކު ކަމަށެވެ.

ސަރަހައްދުގެ ގައުމު ތަކުން މިހާރު އަންނަނީ ހަގީގަތަށް އަރައި ގަންނަމުން ކަމަށާއި، ދެމެހެއްޓެނިވި ސަލާމަތާއި އިގްތިސާދީ ތަރައްގީ އާއި ސަރަހައްދީ ސުލްހަ އާއި އަމާންކަން ހާސިލު ކުރެވޭނީ ހަމައެކަނި އެއްބާރުލުމާއި އެއްބަސްވުން ތަކަށް އިޙުތިރާމް ކުރުމުގެ މައްޗަށް ކަމަށް އަރާގްޗީ ވިދާޅުވި އެވެ.

އެގޮތުން އަރާގްޗީ ވިދާޅުވެފައި ވަނީ، އީރާން ހިމެނޭހެން ސަރަހައްދުގެ ހުރިހާ ޤައުމު ތަކުގެ މަސްލަހަތު ތަކަށް ރިއާޔަތް ކޮށްގެން ކަންކަން ކުރިއަށް ގެންދިޔުމަކީ ވަރަށް މުހިންމު ކަމެއް ކަމަށެވެ. 

މެދު އިރުމަތީގެ ސަރަހައްދުގައި މިހާރު ހިނގަމުން އަންނަނީ ސިޔާސީ ބަދަލު ތަކެއް ކަމަށާއި، އެކަމުގައި އީރާންގެ ދައުރު ވަރަށް މުހިންމު ކަމަށް އަރާގްޗީ ފާހަގަ ކުރެއްވި އެވެ. އީރާން އަކީ ސަރަހައްދުގެ ސަލާމަތާއި ސުލްހަ އަމާން ކަމަށް މުހިންމު ދައުރެއް އަދާކުރާ ގައުމަކަށް ވާތީ، އެގައުމު ވަކި ކުރުމަކުން ސަރަހައްދީ މައްސަލަ ތަކަށް ހައްލު ލިބިދާނެ ކަމަށް ނުވަތަ ހައްލެއް ހޯދި ދާނެ ކަމަށް ނުބެލެވޭ ކަމަށް އޭނާ ވިދާޅުވި އެވެ.

ސަރަހައްދުގެ ގައުމުތަކާ ދެމެދު އެއްބާރުލުން ބަދަހި ކުރުމަށް އީރާން އިން ތައްޔާރަށް އޮތް ކަމަށާއި، ސަރަހައްދީ ސަލާމަތާއި ތަރައްގީގެ ކަންކަމުގައި ހުރިހާ ފަރާތްތަކާ އެކު މަސައްކަތް ކުރުމަށް އީރާން އިން ބޭނުންވާ ކަމަށް އަރާގްޗީ ވިދާޅުވި އެވެ.