އެމެރިކާގެ އިޤްތިޞާދަށް ބޮޑެތި ގެއްލުން ތަކެއް ލިބޭނެ ކަމުގެ އިންޒާރު އީރާން އިން ދީފި

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އީރާންއާ ދެކޮޅަށް ފަށާފައިވާ ހަނގުރާމައިގެ ސަބަބުން އެމެރިކާގެ އިޤްތީޞާދަށް ބޮޑެތި ގެއްލުން ތަކެއް ލިބި، އޭގެ ބުރަ އެމެރިކާގެ ރައްޔިތުން އުފުލަން ޖެހޭނެ ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ.

އީރާންގެ ފޮރިން މިނިސްޓަރު އަރާގްޗީ މިފަދަ އިންޒާރެއް ދެއްވާފައި މި ވަނީ، އެމެރިކާ އާއި އިޒްރޭލް އިން އީރާންއާ ދެކޮޅަށް ފަށާފައިވާ ހަނގުރާމައިގެ ސަބަބުން، އެމެރިކާގެ މާލީ ބާޒާރަށް ކުރަމުންދާ ނޭދެވޭ އަސަރު ތަކަށް އިޝާރާތް ކުރައްވަމުންނެވެ. 

އަރާގްޗީ ވިދާޅުވީ އެމެރިކާގެ ޓްރެޒަރީ ޔީލްޑްސް، ނުވަތަ ދައުލަތުގެ ދަރަންޏަށް ދައްކަން ޖެހޭ އިންޓްރެސްޓް ރޭޓުތައް މަތިވަމުންދާ ކަަމަށާއި، މިއީ އެމެރިކާގެ މާލީ ޙާލަތު ގޯސްވަމުންދާ ކަމުގެ ހެއްކެއް ކަމަށެވެ. ވަކިން ޚާއްސަކޮށް ދެ އަހަރާއި، 10 އަހަރާއި، އަދި 30 އަހަރުގެ ޓްރެޒަރީ ޔީލްޑްސް މަތިވަމުންދާކަން އޭނާ ފާހަގަ ކުރެއްވި އެވެ. 

މީގެ ސަބަބުން އެމެރިކާގެ ދައުލަތުގެ ދަރަންޏާއި، ރައްޔިތުން ނަގާފައިވާ މޯގޭޖް ލޯނުތަކާއި، ކޮންސިއުމާ ލޯނު ތަކަށް ބޮޑެތި ޕްރެޝަރު ތަކެއް ކުރިމަތި ވާނެ ކަމަށް ވެސް އަރާގްޗީ ފާހަގަ ކުރެއްވި އެވެ. 

މީގެ އިތުރުން މި ހަނގުރާމައިގެ ސަބަބުން ދުނިޔޭގެ ބާޒާރުގައި ހަކަތައިގެ އަގުތައް އުފުލިގެން ދާނެ ކަމަށާއި، އެމެރިކާގެ އާންމު ގޭބެސީ ތަކަށް ކްރެޑިޓްގެ ސަބަބުން ކުރިމަތިވާ މާލީ ތާށިކަން އިތުރަށް ގޯސްވާނެ ކަމަށް އަރާގްޗީ ވިދާޅުވި އެވެ. އޭނާ ފާހަގަ ކުރެއްވި ގޮތުގައި މިއީ އެމެރިކާ އާއި އިޒްރޭލް އިން އަމިއްލަ އަށް އިޚްތިޔާރު ކޮށްގެން ފަށާފައިވާ ކަމަކަށް ވާއިރު، މިއީ މުޅިން ވެސް ސަލާމަތް ވެވެން އޮތް ކަމެއް ކަމަށް އަރާގްޗީ ވިދާޅުވި އެވެ. 

އީރާންގެ ފޮރިން މިނިސްޓަރު އަރާގްޗީގެ މި ވާހަކަތައް އައިސްފައި ވަނީ މެދު އިރުމަތީގެ މަސްރަހު ނުތަނަވަސްވެ، އެމެރިކާގެ ސަރުކާރުން އީރާންއާ މެދު ހަރުކަށި ސިޔާސަތު ތަކެއް ގެންގުޅެމުންދާ ވަގުތެއްގަ އެވެ. އަރާގްޗީ ވިދާޅުވީ، މި ހަނގުރާމައިގެ ސަބަބުން އެމެރިކާގެ އިޤްތިޞާދަށް ކުރިމަތި ވާނެ ގެއްލުން ތަކަކީ ޓްރަމްޕްގެ ސަރުކާރުން ނިންމި ނިންމުން ތަކެއްގެ ސަބަބުން ކުރިމަތި ވާނެ ނަތީޖާއެއް ކަމަށެވެ.