އީރާންގެ ފޮރިން މިނިސްޓަރު އަރާގްޗީ ޗައިނާ އަށް

އީރާންގެ ފޮރިން މިނިސްޓަރު އައްބާސް އަރާގްޗީ ރަސްމީ ދަތުރުފުޅެއްގައި ޗައިނާ އަށް ވަޑައިގަންނަވާ ގޮތަށް ހަމަޖެހިއްޖެ އެވެ.

އީރާންގެ ފޮރިން މިނިސްޓްރީ އިން ބުނެފައިވާ ގޮތުގައި، އަންގާރަ ދުވަހުގެ ވަގުތެއްގައި އަރާގްޗީ ޗައިނާ އަށް ވަޑައިގަންނަވާނެ އެވެ. މިއީ އެމެރިކާާ އާއި އީރާންއާ ދެމެދު އޮތް ނުތަނަވަސްކަން ކުޑަ ކުރުމަށް ކުރަމުން އަންނަ މަޝްވަރާތައް ހުއްޓިފައި އޮތް ވަގުތެއްގައި އަރާގްޗީ ކުރައްވާ ދަތުރުފުޅެކެވެ. 

އީރާނުގެ ފޮރިން މިނިސްޓްރީ އިން ނެރުނު ކުރު ބަޔާނެއްގައި ބުނެފައި ވަނީ، ފޮރިން މިނިސްޓަރު އަރާގްޗީގެ މި ދަތުރުގައި ޗައިނާގެ ފޮރިން މިނިސްޓަރު ވަންގް ޔީއާ ބައްދަލު ކުރައްވާނެ ކަމަށެވެ. މި ބައްދަލު ކުރެއްވުމުގައި ދެ ޤައުމުގެ ދެ މެދުގައިވާ ގުޅުން ތަކާއި، ސަރަހައްދީ އަދި ބައިނަލްއަޤުވާމީ ކަންކަމާ ބެހޭ ގޮތުން މަޝްވަރާ ކުރައްވާނެ ކަމަށް ވެސް ބަޔާނުގައި ބުނެފައިވެ އެވެ. 

ޗައިނާ އާއި އީރާންއާ ދެމެދު އޮންނަނީ ވަރަށް ބާރު ގަދަ ސިޔާސީ އަދި އިޤްތިޞާދީ ގުޅުމެކެވެ. ޗައިނާ އަކީ އީރާާންގެ ވަރަށް މުހިންމު ވިޔަފާރީގެ ބައިވެރި އެކެވެ. އީރާން އިން އުފައްދާ ތެލުގެ ވަރަށް ބޮޑު ބައެއް ގަންނަނީ ޗައިނާ އިންނެވެ. އަދި ދެ ޤައުމުން ވަނީ ސިޔާސީ އަދި އިޤްތިޞާދީ ގުޅުން އިތުރަށް ބަދަހި ކުރުމަށް އެކި ފަހަރު މަތިން އެއްބަސްވުންތައް އެކުލަވާލައިފަ އެވެ. 

ބައިނަލްއަޤުވާމީ ކަންކަމުގައި ޗައިނާ އާއި އީރާން އަކީ ގާތް ބައިވެރިންނެވެ. ދެ ޤައުމުން ވެސް ބައިނަލްއަޤުވާމީ ކަންކަމުގައި އެމެރިކާގެ ނުފޫޒު ކުޑަ ކުރުމަށް މަސައްކަތް ކުރެ އެވެ. މި ދަތުރުގައި މެެދު އިރުމަތީގެ ޙާލަތާއި، އީރާންގެ ނިއުކްލިއާ ޕްރޮގްރާމް އާއި، ސަރަހައްދީ ސުލްޙަ އާއި ސަލާމަތާ ބެހޭ ގޮތުން މަޝްވަރާ ކުރައްވާނެ ކަމަށް ބެލެވެ އެވެ. 

އީރާންގެ ފޮރިން މިނިސްޓަރުގެ މި ދަތުރުފުޅަކީ މެދު އިރުމަތީގެ ޙާލަތު ޙައްލު ކުރުމަށް ސަރަހައްދީ އަދި ބައިނަލްއަޤުވާމީ ފެންވަރުގައި ކުރަމުން އަންނަ މަސައްކަތް ތަކުގެ ބައެއް ކަމަށް ރިޕޯޓު ތަކުގައި ވަނީ ފާހަގަ ކޮށްފަ އެވެ.