މިހާތަނަށް ހިމަބިއްސަށް 22 މީހަކު ޕޮޒިޓިވް، ވެކްސިން ދިނުމުގެ ޚާއްސަ ހަރަކާތެއް އެޗްޕީއޭ އިން ފަށައިފި
މި އަހަރުގެ މިހާތަނަށް ރާއްޖެއިން 22 މީހަކު ހިމަބިއްސަށް ޕޮޒިޓިވްވެފައިވާއިރު، މީގެ ތެރޭގައި ގިނައީ 18 އަހަރުން މަތީގެ ދިވެހިން ކަމަށް އެޗްޕީއޭއިން ބުނޭ. ބަލި ފެތުރުން ކޮންޓްރޯލް ކުރުމަށް ސިއްހީ ޚިދުމަތްތެރިންނާއި 18 އަހަރުން ދަށުގެ ކުދިންނަށް ވެކްސިން ދިނުމުގެ ޚާއްސަ ހަރަކާތެއް މި މަހުގެ 30 ގެ ނިޔަލަށް ކުރިއަށްދާނެ. މީގެ އިތުރުން، ބައްޔަށް ޕޮޒިޓިވްވި މީހުންނާ ބައްދަލުވި ފަރާތްތަކުގެ ތެރެއިން ވެކްސިން ފުރިހަމަނުކުރާ މީހުންނަށާއި 49 އަހަރުން ދަށުގެ މީހުންނަށް ވެކްސިން ދިނުމުގެ މަސައްކަތް ވެސް އެ އެޖެންސީން ދަނީ ކުރަމުން.
މީސަލްސް އިން ރައްކާތެރިވުމަށް ވެކްސިން ޖެހުމުގެ މަސައްކަތް ކުރަނީ. | ހެލްތު ޕްރޮޓެކްޝަން އެޖެންސީ
ދިވެހިރާއްޖޭގައި މި އަހަރުގެ މިހާތަނަށް ހިމަބިއްސަށް 22 މީހަކު ޕޮޒިޓިވް ވެފައިވާތީ، ވެކްސިން ދިނުމުގެ ޚާއްސަ ހަރަކާތްތަކެއް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ފަށައިފި އެވެ.
އެޗްޕީއޭއިން ބުނީ، ވޭތުވެދިޔަ ހަފްތާގައި ހިމަބިހީގެ އިތުރު 2 ކޭސް މާލެ ސަރަހައްދުން ފެނިފައިވާ ކަމަށާއި، މިއާއެކު މިއަހަރުގެ މިހާތަނަށް ހިމަބިހީގެ ޖުމްލަ 22 ކޭސް ރިޕޯޓް ކުރެވިފައިވާ ކަމަށެވެ.
ހިމަބިއްސަށް ޕޮޒިޓިވްވި މީހުންގެ ތެރެއިން ގިނައީ 18 އަހަރުން މަތީގެ މީހުން ކަމަށާއި، ބައްޔަށް ޕޮޒިޓިވްވި މީހުންގެ ތެރޭގައި ގިނައީ ދިވެހީން ކަމަށް އެޗްޕީއޭއިން ބުނެ އެވެ. އަދި ޖުމްލަ 543 ކޮންޓެކްޓުން ފާހަގަކުރެވިފައިވާ ކަމަށާއި، މީގެ ތެރެއިން އެކްޓިވް 173 ކޮންޓްކްޓުން ދަނީ މޮނިޓަރ ކުރެވެމުންދާ ކަމަށް އެޗްޕީއޭއިން ބުނެ އެވެ.
ބަލި ފެތުރުން ހުއްޓުވުމަށް ކަމާބެހޭ ފަރާތްތަކާ ގުޅިގެން މަސައްކަތް ކުރަމުންދާކަން ފާހަގަކޮށް އެޗްޕީއޭއިން ބުނީ، ވެކްސިން ދިނުމުގެ ޕްރޮގްރާމް ފަށާފައިވާ ކަަމަށެވެ.
އެޗްޕީއޭއިން ބުނީ، ފޭސްތަކަކަށް ބަހާލެވިގެން ކުރިއަށް ގެންދާ މި ޕްރޮގްރާމުގައި ފުރަތަމަ ވެކްސިން ދިނުމަށް ހަމަޖެހިފައި ވަނީ ސިއްހީ ހިދުމަތްތެރިންނަށާއި 18 އަހަރުން ދަށުގެ އުމުރުފުރާގެ ކުދިންނަށް ކަމަށެވެ. މި އުމުރު ފުރާއަށް ވެކްސިން ދިނުމަށް ހަމަޖެހިފައި ވަނީ 28 ޖޫން އިން 30 ޖޫން ގެ ނިޔަލަށް ކަމަށް އެޗްޕީއޭއިން ބުނެ އެވެ.
އެގޮތުން ޔޫޕީއެޗްސީސީގައި ހޮނިހިރު ދުވަހާއި، އާދިއްތަ ދުވަހުގެ ހެނދުނު 8:30ން މެންދުރު 12:00ށް، ހުޅުމާލެ ހޮސްޕިޓަލްގައި އާދިއްތަ، ހޯމަ އަދި އަންގާރަ ދުވަހުގެ ހެނދުނު 9:00ން 11:00ށް އަދި ބުދަ ދުވަހާއި ބުރާސްފަތި ދުވަހުގެ އިތުރުން ހޮނިހިރު ދުވަހުގެ މެންދުރުފަހު 1:00ން 3:00ށް ވެކްސިން ދިނުމުގެ ޚިދުމަތް ލިބޭނެ އެވެ. އަދި ސެނެހިޔާ މިލިޓަރީ ހޮސްޕިޓަލުގައި އާދިއްތަ ދުވާހައި ބުރާސްފަތި ދުވަހުގެ 10:00ން ހަވީރު 4:00ށް މި ޚިދުމަތްދޭއިރު، ވިލިމާލެ ހޮސްޕިޓަލްގައި އާދިއްތަ ދުވަހުން ބުރާސްފަތި ދުވަހުގެ މެންދުރުފަހު 1:30ން 3:30 ށް ވެކްސިންގެ ޚިދުމަތް ދޭނެ އެވެ.
މީގެ އިތުރުން އެޗްޕީއޭއިން ބުނީ، 49 އަހަރުން ދަށުގެ ވެކްސިން ފުރިހަމަ ނުކުރާ ފަރާތްތަކަށް ވެކްސިން ދިނުމުގެ ތިންވަނަ މަރުހަލާއެއް ކުރިއަށް ގެންދިއުމަށްވެސް ތައްޔާރުވަަމުންދާ ކަމަށެވެ. ބައްޔަށް ޕޮޒިޓިވްވި މީހުންގެ ކޮންޓެކްޓުންގެ ތެރެއިން ވެކްސިން ދެ ޑޯޒް ފުރިހަމަކޮށްފައިނުވާ ފަރާތްތަކަށް ވެކްސިން ދިނުމުގެ މަސައްކަތް ކުރަމުންދާ ކަމަށް އެޗްޕީއޭއިން ބުނެ އެވެ. އަދި މިހާތަނަށް 220 ކޮންޓެކްޓުންނަށް ވެކްސިން ދެވިފައިވާ ކަމަށް އެޗްޕީއޭއިން ބުނެ އެވެ.
އެޗްޕީއޭއިން ބުނީ، ފުރަންޓްލައިންގައި މަސައްކަތް ކުރާ ސިއްހީ ޚިދުމަތްތެރިންގެ ތެރެއިން 1537 ފަރާތަށް ވެކްސިން ދީފައިވާ ކަމަށެވެ.
