އިންޑިއާއިން ރާއްޖެއަށް 20،000 ޑޯސްގެ ހިމަބިހީގެ ވެކްސިން ހަދިޔާކޮށްފި
ރާއްޖޭގައި ހިމަބިހި ފެތުރުން ހުއްޓުވުމަށް ކުރާ މަސައްކަތްތަކަށް އިންޑިއާއިން ފޯރުކޮށްދިން މި އެހީގެ ސަބަބުން، ބަލި ދެނެގަތުމުގެ ގާބިލުކަން އިތުރަށް ވަރުގަދަވެގެންދާނެ ކަމަށް މިނިސްޓަރު ގީލާ އަލީ ވިދާޅުވި.
އިންޑިއާއިން ރާއްޖެއަށް 20،000 ޑޯސްގެ ހިމަބިހީގެ ވެކްސިން ހަދިޔާކުރުން | ހެލްތު މިނިސްޓްރީ
ރާއްޖޭގައި މިހާރު ފެތުރެމުންދާ ހިމަބިއްސާ ދެކޮޅަށް ކުރާ މަސައްކަތްތައް ހަލުވިކުރުމަށްޓަކައި، އިންޑިއާގެ ސަރުކާރުގެ ހިލޭ އެހީގެ ދަށުން ރާއްޖެއަށް ބޭނުންވާ މުހިންމު ސިއްހީ ސާމާނުތަކެއް ހަދިޔާކޮށްފިއެވެ.
މި އެހީގެ ދަށުން އިންޑިއާއިން ވަނީ 20،000 ޑޯސްގެ މީސަލްސް ވެކްސިން ނުވަތަ ހިމަބިހީގެ ވެކްސިނާއި، 3 ޓަނުގެ ސިއްހީ އެކި އާލާތްތައް ރާއްޖެއަށް ފޯރުކޮށްދީފައެވެ.
މި ތަކެތި ހަވާލުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ގީލާ އަލީ ވިދާޅުވީ، މިއީ ރާއްޖޭގައި ހިމަބިހި ފެތުރުން ހުއްޓުވުމަށާއި އާންމު ސިއްހަތަށް ކުރިމަތިވެދާނެ ނުރައްކާތަކުން ރައްކާތެރިވުމަށް ގައުމީ ފެންވަރުގައި ކުރަމުންދާ މަސައްކަތްތައް ވަރުގަދަ ކުރަމުންދާ މުހިންމު ދަނޑިވަޅެއްގައި ލިބުނު ބޮޑު އެހީއެއް ކަމަށެވެ. އަދި މި އެހީގެ ސަބަބުން ބަލިތަކުން ރައްކާތެރިވުމާއި، ބަލި ދެނެގަތުމުގެ ގާބިލުކަން އިތުރަށް ވަރުގަދަވެގެންދާނެކަން މިނިސްޓަރު ފާހަގަކުރެއްވިއެވެ.
ދިވެހިރާއްޖެ އާއި އިންޑިއާއާ ދެމެދު އޮތް ގުޅުމުގެ މައްޗަށް އަލިއަޅުއްވާލައްވަމުން މިނިސްޓަރު ގީލާ ވިދާޅުވީ، ދެ ގައުމަކީ ޒަމާންވީ ގާތް ގުޅުމެއް އޮންނަ ދެ ގައުމު ކަމަށެވެ. އަދި ވޭތުވެދިޔަ އަހަރުތަކުގައި ރާއްޖެއަށް އެހީތެރިކަން ބޭނުންވި ކޮންމެ ދަނޑިވަޅެއްގައި ވެސް އިންޑިއާ އިން އެ އެހީތެރިކަން ފޯރުކޮށްދީފައިވާކަން މިނިސްޓަރު ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވީ، މިފަހަރު ލިބުނު އެހީއަކީ ދެ ގައުމުގެ ދެމެދުގައި އޮތް އެކުވެރިކަމާއި، އެއްބައިވަންތަކަމުގެ އިތުރުން އެއްބާރުލުން ރަމްޒުކޮށްދޭ އިތުރު ހެއްކެއް ކަމަށެވެ. އިންޑިއާއިން ހަދިޔާކުރި މި ސާމާނުތަކަކީ ރާއްޖޭގެ ސިއްހީ ދާއިރާގެ އުމްރާނީ އަދި ފަންނީ ގާބިލުކަން އިތުރުކުރުމަށް ލިބުނު މުހިންމު ބާރެއްގެ ގޮތުގައި ސަރުކާރުން ދެކެއެވެ.
ރާއްޖޭގައި ހިމަބިހި ފެތުރެމުންދާތީ، އެ ބަލިން ރައްކާތެރިވުމަށްޓަކައި ސަރުކާރުން ދަނީ ހާއްސަ ވެކްސިން ކެމްޕޭނެއްވެސް ކުރިއަށް ގެންދަމުންނެވެ. އިންޑިއާއިން މި ފޯރުކޮށްދިން 20،000 ޑޯސްގެ ވެކްސިނާއެކު، ވެކްސިން ޖެހުމުގެ މަސައްކަތް އިތުރަށް ހަލުވިވެ، ބަލި ކޮންޓްރޯލް ކުރުމަށް ކުރާ މަސައްކަތަށް ބޮޑު ކުރިއެރުމެއް ލިބޭނެ ކަމަށް ސިއްހީ ވުޒާރާއިން މައުލޫމާތުދެއެވެ.
