އަންގާރައިން އަންގާރައަށް... މިކަމެއް ނުވާނެ!
ދައުލަތުގެ އިދާރާތަކުން މައުލޫމާތު ހޯދުމުގައި ބޮޑެތި ގޮންޖެހުންތަކެއް ހުރިއިރު، މައުލޫމާތު ހާމަކުރުމުގެ ބަދަލުގައި އާ އިދާރާތައް އުފެއްދުމަކީ ހަގީގީ ހައްލެއް ނޫން. ގާނޫނުން ލާޒިމުކުރާ މައުލޫމާތު ދިނުމުގައި އިދާރާތަކުން އިހުމާލުވަމުންދާތީ، މިއީ މުއައްސަސާތައް މަދުވެގެން ދިމާވާ މައްސަލައެއް ނޫންކަން ހާމަވޭ. އެހެންކަމުން، މައުލޫމާތު ހާމަކުރުމުގެ ނިޔަތާއި ރޫހު ނެތި، "ސިޓިޒަންސް ކޮމްޕްލެއިންޓްސް ބިއުރޯ" ފަދަ ތަންތަނުން އާންމުންނާއި ނޫސްވެރިންނަށް އެދެވޭ ނަތީޖާއެއް ނުފެންނާނެ.
ރައީސް މުއިއްޒުގެ އާ ކެބިނެޓް ހުވާ ކުރެއްވުމަށް ރައީސް އޮފީހުގަ ބޭއްވި ރަސްމިއްޔާތުގެ ތެރެއިން | ރާއްޖެ އެމްވީ
މިހާރުގެ ރައީސުލްޖުމްހޫރިއްޔާ ޑރ މުޙައްމަދު މުއިއްޒު ގެންދަވަނީ ނޫސްވެރިންގެ ބައްދަލުވުންތަކުގައި ނޫސްވެރިންނަށް އަމާޒުކޮށް އެތައް ބަހުގެ ޙަމަލާތަކެއް ރައްދު ކުރައްވަމުންނެވެ. އަދި ޒިންމާދާރު ނޫސްވެރިކަމެއް ކުރާނެ ގޮތާއި، އެކަމަށްޓަކައި އިދާރާތަކުން މައުލޫމާތު ހޯދައިގެން ރިޕޯޓު ކުރުމުގެ މުހިއްމުކަމުގެ ވާހަކަ ރައީސް ގެންދަވަނީ ކެނޑިނޭޅި ދައްކަވަމުންނެވެ. ރައީސް ދައްކަވާ ވާހަކަފުޅުތަކުން ބައެއް ފަހަރު ހީވަނީ ނޫސްވެރިން ކަންކަން ރިޕޯޓު ކުރަނީވެސް ކަމުގެ ދެކޮޅު ނުބަލައި، ހިތަށް އައި ގޮތްކަށް ހެންނެވެ.
އެހެންނަމަވެސް ހަގީގަތަކީ އެއީއެއް ނޫނެވެ. ނޫސްވެރިންނަށް މައުލޫމާތު ދިނުމަށް އިދާރާތަކުން ނުކުޅެދުމަކީ އެ ނޫސްވެރިންނަށް އެހެނިހެން މަސްދަރުތަކުން އެ ކަންކަން ކަށަވަރުވާ ހިސާބަށް ދިއުމުންވެސް ރިޕޯޓު ނުކުރަންޖެހޭ ސަބަބެއް ނޫނެވެ. ނުވިތާކަށް ދައުލަތުގެ އިދާރާތަކުން މައުލޫމާތު ހޯދުމަށް ހުރި ގޮންޖެހުންތަކަށް ބަލާއިރު، ހަގީގަތުގައި އިދާރާގެ ބަހެއް ހިމަނައިގެން ނޫން ގޮތަކަށް ޚަބަރު ރިޕޯޓު ނުކުރެވޭކަމަށްވާނަމަ ރާއްޖޭގެ ގިނަ މީޑިއާތަކުން ތިބެންޖެހޭނީ ޚަބަރުވެސް ނުލިޔެއެވެ.
ބުނަން މި އުޅެނީ ދައުލަތުގެ އިދާރާތަކުން މައުލޫމާތު ހޯދުމަށް ހުރި ގޮންޖެހުންތަކުގެ ވާހަކައެވެ. އޭގެ ކުޑަކުޑަ މިސާލެއް ދަންނަވާލާނަމެވެ. ރާއްޖެއިން ނައްތާލެވިފައިވާ ހިމަބިހީގެ ކޭސްތައް އަލުން ފެތުރެން ފަށައި، އެކި ދިމަދިމާލުން ބަލީގެ ކޭސްތައް ފެންނަމުންދާއިރު، އެކަމުގެ އަދާހަމަ މައުލޫމާތު ހޯދާލުމަށް ދައުލަތުގެ ކަމާގުޅުންހުރި އިދާރާއަށް ގުޅާލުމުން ދިން ޖަވާބަކީ އެ މައުލޫމާތު އާންމުކުރާނީ ކޮންމެ އަންގާރައަކުން އަންގާރައަކަށް ކަމަށެވެ.
އެފަދަ ބަލިތަކަކީ ދުރާލާ ބަލި ފެތުރެމުންދާ މިންވަރު އާންމުންނަށްވެސް އެނގުން މުހިއްމު ޒާތުގެ ބަލިތަކަށް ވާއިރު، "އަންގާރައިން އަންގާރައަށް" ނޫން ގޮތަކަށް އެ މައުލޫމާތުވެސް ލިބޭނެ ގޮތެއް ނެތެވެ. ވީއިރު، އެކަން ރިޕޯޓު ކުރުމަކީ ނޫސްވެރިން އަދާކުރަންޖެހޭ ޒިންމާ އަދާނުކުރުންކަމަށް ރައީސަށް ވިދާޅުވެވޭނެތޯއެވެ؟
މައުލޫމާތު ހޯދައި ލިބިގަތުމަށް ޚާއްސަ ޤާނޫނެއް އޮންނައިރު، އެ ޤާނޫނަށް ދައުލަތުގެ އިދާރާތަކުން އަމަލުކުރާ މިންވަރު އޮތީ ހާމައަށް ފެންނާށެވެ. އެކަމަކީ ދެބަސްވެވެން ނެތް ހަގީގަތެކެވެ. ޤާނޫނުން ލާޒިމުކުރާ އެންމެ އަސާސީ، އެންމެ ކުޑަ މިންވަރުގެ މައުލޫމާތުވެސް އެ ހާމަކުރަމުންދަނީ ޤާނޫނުގައި ބުނާ މުއްދަތުތައް ފާއިތުވެ ގޮސް، އެތައް ދުވަހެއް ފަހުންނެވެ.
މި ހުރިހާ ކަމެއް މިހެން ހުރިނަމަވެސް، ދައުލަތުގެ އިދާރާތަކުގައި މަދުނުވާވަރަށް މުވައްޒަފުން އެބަތިއްބެވެ. ނުވިތާކަށް އެކިއެކި ނަންނަމުގައި އިދާރާތައް ހަދައި، ބޮޑެތި މުސާރައިގައިވެސް މީހުން އައްޔަނު ކުރަމުން ދިއުން އަދިވެސް ހަމަ ދަނީ ބާރަށް ކުރިއަށެވެ. އެންމެ ފަހުން އުފެއްދީ 24 ގަޑިއިރުގެ ޚިދުމަތް ދިނުމަށް "ސިޓިޒަންސް ކޮމްޕްލެއިންޓްސް ބިއުރޯ" އެވެ.
މި އިދާރާގެ މަޤްސަދަކީ އާންމުންގެ ފަރާތުން ހުށަހެޅޭ ޝަކުވާތަކާ ގުޅިގެން ސަރުކާރުގެ ކަމާބެހޭ އިދާރާތަކުން ހޯދަންޖެހޭ މަޢުލޫމާތު ހޯދައި، އެ ޝަކުވާތަކަށް އަވަސް މިނެއްގައި ޖަވާބުދާރީވުމެވެ.
އެހެންނަމަވެސް ހަގީގަތަކީ މި އުޅެނީ އިދާރާތައް ނެތިގެންނެއް ނޫނެވެ. ނެތީ މައުލޫމާތު ދިނުމުގެ ރޫޙެވެ. މައުލޫމާތު ހާމަ ކުރުމުގެ ނިޔަތެވެ. މި އުޅެނީ ޤާނޫނުން ލާޒިމުކުރާ ގޮތަށް މައުލޫމާތު ހާމަ ނުކުރެވިގެންނެވެ. ނޫސްވެރިކަމުގެ މިނިވަންކަން ލާޒިމުކުރާ ގޮތަށް ނޫސްވެރިންނަށް މައުލޫމާތު ނުދެވިގެންނެވެ. ވީއިރު ސިޓިޒަންސް ކޮމްޕްލެއިން ބިއުރޯއެއް ހަދައިގެން ވަކި ދެވޭނީ ކޮން މައުލޫމާތެއްތޯއެވެ؟ އަންގާރައިން އަންގާރައަށް މަސައްކަތް ކުރުމުގެ ވިސްނުން ބަހައްޓައިގެން ތިޔަ ކަމެއް ނުވާނެއެވެ.
