މިދިޔަ މަހު މުޅިރާއްޖޭގައި ރޯގާގެ ގޮތުގައި ފެތުރޭ ބަލިތައް އިތުރުވެ، ޑެންގީ ހުން ވަރަށް ގިނަ މީހުންނަށް ޖެހިފައިވޭ: އެޗްޕީއޭ
ނިމިދިޔަ މެއި މަހު ރާއްޖޭގައި ޑެންގީ ހުމާއި، އަރިދަފުސް ރޯގާގެ އިތުރުން ބޭރަށް ހިންގުން ޖެހިގެން ރިޕޯޓުކުރި މިންވަރު އޭޕްރީލް މަހާ އަޅާބަލާއިރު ވަރަށް ބޮޑަށް އިތުރުވެފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކާ. މި ބަލިތައް ރާއްޖޭގެ ގިނަ އަތޮޅުތަކެއްގައި ފެތުރެމުންދާތީ، މަދިރިން ރައްކާތެރިވުމަށާއި ސާފުތާހިރުކަމަށް ސަމާލުކަން ދިނުމަށް އެ އިދާރާއިން ވަނީ އިލްތިމާސްކޮށްފައި. ބަލިތައް ކޮންޓްރޯލް ކުރުމަށް އާންމުންގެ އެއްބާރުލުން ބޭނުންވާކަން ފާހަގަކޮށް، ރޯގާ ޖެހިއްޖެނަމަ މީހުން އެއްވެ އުޅޭ ތަންތަނަށް ނުދިއުމަށްވެސް އެޗްޕީއޭއިން ވަނީ ނަސޭހަތްތެރިވެފައި.
އެޗްޑީސީން ކުރިއަށް ގެންދިޔަ ހެލްތް ސްކްރީނިންގ ޕްރޮގްރާމެއްގެ ތެރެއިން ބިދޭސީއެއް ޑޮކްޓަރަށް ދައްކަނީ. | ހައުސިންގް ޑިވެލޮޕްމަންޓް ކޯޕޮރޭޝަން
މިދިޔަ މަހު މުޅިރާއްޖޭގައި ރޯގާގެ ގޮތުގައި ފެތުރޭ ބަލިތައް އިތުރުވެ، ޑެންގީ ހުން ވަރަށް ގިނަ މީހުންނަށް ޖެހުނު ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
ހޯމަ ދުވަހު އެޗްޕީއޭއިން ބުނީ، މިއަހަރުގެ އޭޕްރީލް މަހާއި އަޅާބަލާއިރު، މިއަހަރުގެ މެއި މަހު ޑެންގީ ހުން ޖެހިގެން ރިޕޯޓު ކުރެވުނު އަދަދު އިތުރުވެފައިވާ ކަމަށެވެ. އަދި ރާއްޖޭގެ ގިނަ އަތޮޅުތަކުގައި ޑެންގީ ހުން އިތުރުވެފައިވާ ކަމަށް އެޗްޕީއޭއިން ބުނެ އެވެ.
އެޗްޕީއޭއިން ބުނީ، އޭޕްރީލް މަހު ޑެންގީ ހުމުގެ 648 ކޭސް ރިޕޯޓު ކޮށްފައިވާއިރު، މެއި މަހު 778 ކޭސް ރިޕޯޓު ކޮށްފައިވާ ކަމަށެވެ.
އޭޗްޕީއޭއިން އާއްމުކޮށްފައިވާ ތަފާސްހިސާބުތައް ދައްކާ ގޮތުން، ރޯގާގެ ގޮތުގައި ފެތުރޭ ބަލިތައް ފެތުރޭ މިންވަރު ވަނީ އިތުވެފަ އެވެ. އަދި ވައިރަލް ހުން ހއ، އަދި ގދ އަތޮޅު ފިޔަވައި ރާއްޖޭގެ ހުރިހާ އަތޮޅެއްގައި އިތުރުވެފައިވާ ކަމަށް އެޗްޕީއޭއިން ބުނެ އެވެ.
އެޗްޕީއޭއިން ބުނީ، އަރިދަފުސްރޯގާ ރާއްޖޭގެ ގިނަ އަތޮޅުތަކުގައި އިތުރުވެފައިވާ ކަމަށާއި، އަރިދަފުސް ރޯގާ ޖެހިގެން މިއަހަރުގެ އޭޕްރީލް މަހު 24221 ކޭސް، މެއި މަހު 40457 ކޭސް ރިޕޯޓު ކޮށްފައިވާ ކަމަށެވެ.
މީގެ އިތުރުން އެޗްޕީއޭއިން ބުނީ، މިއަހަރުގެ އޭޕްރީލް މަހާ އަޅާބަލާއިރު، މިއަހަރުގެ މޭ މަހު ބޭރަށް ހިންގުން ޖެހިގެން ރިޕޯޓު ކުރެވުނު އަދަދު ވެސް އިތުރުވެފައިވާ ކަމަށެވެ.
އެގޮތުން އޭޕްރީލް މަހު ބޭރަށް ހިންގުމުގެ 3993 ކޭސް، މެއި މަހު 4726 ކޭސް ރިޕޯޓު ކޮށްފައިވެ އެވެ. އަދި ބޭރަށްހިންގުން އިތުރުވެފައިވަނީ މާލެ ސަރަހައްދުގެ އިތުރުން ބ، ކ ، އއ ، ފ އަދި ޏ އަތޮޅުގައި ކަމަށް އެޗްޕީއޭއިން ބުނެ އެވެ.
ރޯގާގެ ގޮތުގައި ފެތުރޭ ބަލިތައް އިތުރުވެފައިވާއިރު، އިންފްލުއެންޒާއަށް މި އަހަރުގެ މިހާތަނަށް ޓެސްޓު ކުރެވުނު 2240 ސާމްޕަލްގެ ތެރެއިން 856 ސާމްޕަލްއެއް ޕޮޒިޓިވްވެފައިވާ ކަމަށް އެޗްޕީއޭއިން ބުނެ އެވެ.
އެޗްޕީއޭއިން ބުނީ ރާއްޖޭގައި ބަލި ފެތުރޭ މިންވަރު ކޮންޓްރޯލް ކުރުމާއި، ބަލިން ރައްކާތެރިވުމަށް ހުރިހާ ރައްޔިތުންގެ އެއްބާރުލުން ބޭނުންވާ ކަމަށެވެ. އަދި ރޯގާ ޖެހިއްޖެނަމަ އާއްމުވެ އެއްވެ އުޅޭ ތަންތަނަށް ނުދިއުމަށާއި، މަދިރީގެ ޒަރިއްޔާއިން ޖެހޭ ބަލިތައް މަދު ކުރުމަށްޓަކައި ވެސް ރަށުތެރެ ސާފުކޮށް، ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފައިވެ އެވެ.
