ހޫނުގަދަވުމުގެ ސަބަބުން 2050 އާ ހަމައަށް ދެކުނު އޭޝިއާގެ އިގްތިސާދަށް 7 އިންސައްތައިގެ ގެއްލުމެއް: ވޯލްޑް ބޭންކް

އިންތިހާއަށް ހޫނުމިން އިތުރުވުމުގެ ސަބަބުން 2050 ވަނަ އަހަރާ ހަމައަށް ދާއިރު ދެކުނު އޭޝިއާގެ އިގްތިސާދުން ގާތްގަނޑަކަށް 7 އިންސައްތަ އުނިވާނެ ކަމަށް ވޯލްޑް ބޭންކުން ބުދަ ދުވަހު އާންމުކުރި އާ ރިޕޯޓެއްގައިވާ ގޮތުން ލަފާކޮށްފި އެވެ. އަދި މިހާރުވެސް މި ސަރަހައްދުގައި ހޫނުގަދަވުމުގެ ސަބަބުން އަހަރަކު ގާތްގަނޑަކަށް 31 މިލިއަން ފުލްޓައިމް ވަޒީފާއާ އެއްވަރުގެ ގެއްލުން ލިބެމުންދާ ކަމަށް އެ ރިޕޯޓުގައި ފާހަގަކޮށްފައިވެ އެވެ. މީގެ އިތުރުން، 2050 ވަނަ އަހަރާ ހަމައަށް ދާއިރު މި ސަރަހައްދުގެ މަސައްކަތްކުރާ އުމުރުފުރާގެ އާބާދީއަށް 280 މިލިއަން މީހުން އިތުރުވާނެ ކަމަށް ބެލެވޭއިރު، އިތުރުވަމުންދާ ހޫނުމިނުގެ ސަބަބުން ވަޒީފާތަކަށާއި، އުފެއްދުންތެރިކަމަށާއި، ދިގުމުއްދަތުގެ އިގްތިސާދީ ކުރިއެރުމަށް ބޮޑެތި ގޮންޖެހުންތަކެއް ކުރިމަތިވާނެ އެވެ. ވޯލްޑް ބޭންކުގެ ދެކުނު އޭޝިއާ ސަރަހައްދުގައި ހިމެނެނީ ދިވެހިރާއްޖޭގެ އިތުރުން ބަންގްލަދޭޝް، ބޫޓާން، އިންޑިއާ، ނޭޕާލް އަދި ސްރީލަންކާ އެވެ.

"އަ ލިވަބަލް ފިއުޗަރ: ޕްރޮޓެކްޓިންގ ޖޮބްސް އެންޑް ގްރޯތު ފްރޮމް އެކްސްޓްރީމް ހީޓް އިން ސައުތު އޭޝިއާސް ސިޓީސް" ގެ ނަމުގައި ޝާއިއުކުރި މި ރިޕޯޓުން ދައްކާގޮތުގައި، 2070 ވަނަ އަހަރާ ހަމައަށް ދާއިރު ދެކުނު އޭޝިއާގެ ގާތްގަނޑަކަށް 520 މިލިއަން މީހުންނަށް އަހަރަކު މަދުވެގެން އެއް މަސް ދުވަހު ނުރައްކާތެރި މިންވަރަކަށް ހޫނުގަދަވުމުގެ ތަޖުރިބާ ކުރަންޖެހޭނެ އެވެ. މިއީ މިހާރު މިފަދަ ހާލަތްތައް މެދުވެރިވާ މިންވަރަށްވުރެ ހަތަރު ގުނަ އިތުރު އަދަދެކެވެ. އިންތިހާއަށް ހޫނުގަދަވުމުގެ ސަބަބުން މިހާރުވެސް މަސައްކަތްތެރިންގެ އުފެއްދުންތެރިކަން ދަށްވެ، ވިޔަފާރިތަކަށް ހުރަސް އެޅި، ދެކުނު އޭޝިއާގެ ސިޓީތަކުގެ ވާދަވެރިކަން ދަނީ ކުޑަވަމުންނެވެ. ހަމައެއާއެކު، ސިއްހީ ނިޒާމަށާއި މުހިންމު އުމްރާނީ ވަސީލަތްތަކަށް އޮތް ބާރުވެސް ދަނީ ބޮޑުވަމުންނެވެ. މިކަމުގެ ނޭދެވޭ އަސަރު އެންމެ ބޮޑަށް ކުރަނީ އާމްދަނީ މަދުން ލިބޭ އާއިލާތަކަށާއި، ނުރަސްމީ ދާއިރާތަކުގައި މަސައްކަތްކުރާ މީހުންނާއި، އަންހެނުންނާއި، އުމުރުން ދުވަސްވީ މީހުންގެ އިތުރުން ކުޑަކުދިންނަށެވެ.

ވޯލްޑް ބޭންކުން ދެކުނު އޭޝިއާއަށް ކަނޑައަޅާފައި ހުންނަވާ ވައިސް ޕްރެޒިޑެންޓް ޖޮހަނަސް ޒުޓް ވިދާޅުވި ގޮތުގައި، ދެކުނު އޭޝިއާގެ ސިޓީތަކަކީ އެ ސަރަހައްދުގެ މުސްތަގުބަލާ ގުޅިފައިވާ މުހިންމު ތަންތަން ކަމަށް ވީނަމަވެސް، އިތުރުވަމުންދާ ހޫނުމިނުގެ ސަބަބުން ވަޒީފާތަކާއި، ދިރިއުޅުމުގެ ފެންވަރާއި، އިގްތިސާދީ ކުރިއެރުން މިވަނީ ނުރައްކަލެއްގެ ތެރޭގައެވެ. މި ނުރައްކާތަކުން ސަލާމަތްވުމަށްޓަކައި ދެމެހެއްޓެނިވި ފިނިކުރުމުގެ ނިޒާމުތަކަށާއި، އަރބަން ޕްލޭނިންގ ނުވަތަ ސިޓީތައް ފަރުމާކުރުމަށާއި، އިޖުތިމާއީ ރައްކާތެރިކަމަށް އިންވެސްޓްކުރުމަށް ވޯލްޑް ބޭންކުން ވަނީ ލަފާދީފައެވެ. މި ރިޕޯޓުގައި ފާހަގަކޮށްފައިވާ ގޮތުގައި، މޫސުމަށް އަންނަ ބަދަލުތަކުގެ ނުރައްކާ ބޮޑު ދިވެހިރާއްޖެ ފަދަ ގައުމުތަކަށް، އިންތިހާއަށް ހޫނުގަދަވުމުގެ ސަބަބުން ކުރާ އިގްތިސާދީ އަސަރުތައް ހަމައެކަނި އުފެއްދުންތެރިކަން ދަށްވުމަކުން ނުނިމެ އެވެ. އޭގެ ބަދަލުގައި މުޅި އިންވެސްޓްމަންޓް މާހައުލަށާއި ދައުލަތުގެ މާލީ ހަމަޖެހުމަށްވެސް މީގެ ސަބަބުން އަސަރުކުރެ އެވެ. އެހެންކަމުން، އިމާރާތްކުރުމާއި، އުފެއްދުންތެރިކަމާއި، ޚިދުމަތްތަކުގެ ދާއިރާ ހިމެނޭހެން އެންމެ ބޮޑަށް އަސަރުކުރާ ދާއިރާތަކަށް އެހީތެރިވުމަށްޓަކައި، ސަރަހައްދީ އެއްބާރުލުން އިތުރުކުރުމަށާއި މޫސުމީ ބަދަލުތަކަށް ހޭނުމަށް ބޭނުންވާ ފައިސާ ހޯދުމަށް މި ރިޕޯޓުގައި ވަނީ ގޮވާލާފަ އެވެ.