އިސްރާއީލުގެ ޑްރޯން ހަމަލާއެއްގައި ލުބުނާނުގައި ދެ މީހަކު މަރު
އިސްރާއީލުގެ އަސްކަރިއްޔާއިން ބުނި ގޮތުގައި މި ހަމަލާ އަމާޒުކުރީ ނަބަޠިއްޔާ ސިޓީއާ ކައިރިން ފެނުނު ހިޒްބުاللهގެ ހަތިޔާރު އެޅި ދެ މީހަކަށް. އަދި ކުރިމަތިވާ ކޮންމެ ނުރައްކަލެއް ނައްތާލުމަށް ކުރަންޖެހޭ މަސައްކަތްތައް ކުރިއަށް ގެންދާނެ ކަމަށްވެސް އެ ގައުމުން ވަނީ ބުނެފައި.
ލުބުނާނުގެ ޓައިރް ޑިސްޓްރިކްޓްގެ ބާރިޝްގައި ހުރި ގެއަކަށް އިސްރާއީލުން ދިން ވައިގެ ހަމަލާއަކާ ގުޅިގެން، 2026 ޖޫން 20 ވަނަ ދުވަހު އެ ސަރަހައްދުގައި ހަރަކާތްތެރިވި ރެސްކިއު މަސައްކަތްތެރިއަކު އަނިޔާވި މީހުން އުފުލުމަށް ސްޓްރެޗަރެއް ތައްޔާރުކުރަނީ. | ރޮއިޓާސް
އިސްރާއީލުން ލުބުނާނުގެ ދެކުނުގައި އޮންނަ ސަރަހައްދެއްގައި ދުއްވާފައި ދިޔަ އުޅަނދަކަށް ދިން ހަމަލާއެއްގައި ބުދަ ދުވަހު ދެ މީހަކު މަރުވެފައިވާ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓުކޮށްފިއެވެ. މި ހަމަލާ ދީފައި މިވަނީ، އިސްރާއީލާއި ހިޒްބުاللهއާ ދެމެދު ވެފައިވާ ހަނގުރާމަ ހުއްޓާލުމުގެ އެއްބަސްވުމާ އިސްރާއީލުން ޚިލާފުވެފައިވާ ކަމަށް ބުނެ، އޭގެ ކުރީ ދުވަހު އިސްރާއީލުގެ ސިފައިން ދިން ބަޑީގެ ހަމަލާތަކެއްގައި ދެ މީހަކު މަރުވެފައި ވަނިކޮށެވެ.
ލުބުނާނުގެ ދައުލަތުގެ ނިއުސް އެޖެންސީ (އެން.އޭ.އެން) އިން ރިޕޯޓުކޮށްފައިވާ ގޮތުގައި، ކަފްރު ރޫމާން އަވަށާ ކައިރިން ދަތުރުކުރި އުޅަނދަކަށް އިސްރާއީލުގެ ޑްރޯންއަކުން ދިން މި ހަމަލާގައި ދެ މީހަކު ވަނީ މަރުވެފައެވެ.
މި ހަމަލާއާ ގުޅިގެން އިސްރާއީލުގެ އަސްކަރިއްޔާއިން ބުނީ، ނަބަޠިއްޔާ ސިޓީއާ ކައިރީގައި އޮންނަ އަލީ އަލް-ޠާހިރު ރިޖް ސަރަހައްދުން ފެނުނު ހިޒްބުاللهގެ ހަތިޔާރު އެޅި ދެ "ޓެރަރިސްޓުންނަށް" އަމާޒުކޮށް ހަމަލާދީފައިވާނެ ކަމަށެވެ. އަދި އެ މީހުންނަކީ ނުރައްކަލެއް ކަމަށް ބެލެވޭތީ ދިން މި ހަމަލާއަށްފަހު، ކުރިމަތިވާ މިފަދަ ކޮންމެ ނުރައްކަލެއް ނައްތާލުމަށް ކުރަންޖެހޭ މަސައްކަތްތައް ކުރިއަށް ގެންދާނެ ކަމަށްވެސް އިސްރާއީލުން ވަނީ ބުނެފައެވެ.
މަސްދަރު: އޭއެފްޕީ
