އީރާނުން ކަނޑައަޅާފައިވާ މަގުތަކުން ނޫނީ ހުރްމުޒް ކަނޑުއޮޅިން ދަތުރުކުރުމަކީ މަނާ ކަމެއް: އައިއާރުޖީސީ
ހުރްމުޒް ކަނޑުއޮޅިން ދަތުރުކުރާ އުޅަނދުފަހަރު އީރާނުގެ އައިއާރްޖީސީ ނޭވީއާ ވިލަރެސްކުރުން މަޖުބޫރުކޮށް، ކަނޑައެޅިފައިވާ މަގުތަކުން ބޭރުން ދަތުރުކުރުމަކީ މަނާކަމެއް ކަމަށް ބުނެ އެ ގައުމުން އިންޒާރުދީފި. އެމެރިކާއާއެކު ވެފައިވާ އެއްބަސްވުމެއްގެ ދަށުން ވިޔަފާރި އުޅަނދުތަކަށް ރައްކާތެރިކަން ދިނުމަށާއި ވަކި މުއްދަތަކަށް ފީ ނުނެގުމަށް ނިންމާފައިވީ ނަމަވެސް، އެ ސަރަހައްދުގެ ކޮންޓްރޯލް ދޫނުކުރާނެ ކަމަށް އީރާނުން ބުނޭ. މި ނިންމުމަކީ އެމެރިކާއިން އީރާނުގެ ބަނދަރުތަކަށް ކުރިމަތިކުރި ބްލޮކޭޑާ ގުޅިގެން ސަލާމަތީ ފިޔަވަޅުތައް ވަރުގަދަކުރުމުގެ ގޮތުން އެޅި ފިޔަވަޅެއް.
މި ފޮޓޯއިން ފެންނަނީ ޕާޝިއަން ގަލްފްގެ އައްސޭރިފަށުގައި ހުންނަ ކަނޑުގެ ސިފައިންގެ މަރުކަޒެއްގައި، އީރާނުގެ ސިފައިންގެ މީހަކު މެޝިން ބަޑިއެއް ހިފައިގެން ފޯރިމަރަމުންދާ މަންޒަރު. | ގެޓީ އިމޭޖަސް
ހުރްމުޒް ކަނޑުއޮޅިން ރައްކާތެރިކަމާއެކު ދަތުރުކުރެވޭނީ ހަމައެކަނި އީރާނުން ރަސްމީކޮށް ކަނޑައަޅާފައިވާ މަގުތަކުން އެކަނި ކަމަށް ބުނެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) ނޭވީން ވަރުގަދަ އިންޒާރެއް ދީފައެވެ.
ބުރާސްފަތި ދުވަހު ނެރުނު ބަޔާނެއްގައި އެ ފައުޖުން ބުނެފައިވަނީ، ކަނޑައެޅިފައިވާ މަގުތަކުގެ ބޭރުން ދަތުރުކުރުމަކީ "ބަލައިގަނެވޭނެ ކަމެއް ނޫން ކަމަށާއި އެއީ ނުރައްކާތެރި ކަމެއް" ކަމަށެވެ. އަދި އެ މަގުތަކުން ބޭރުން އުޅަނދުފަހަރު ދަތުރުކުރުމަކީ މަނާކަމެއް ކަމަށާއި، އަންގާފައިވާ މަގުތަކުން ބޭރުން އެއްވެސް އުޅަނދެއް ދަތުރު ނުކުރުމަށް އެ ބަޔާނުގައި ވަނީ އިންޒާރު ދީފައެވެ.
މީގެ އިތުރުން، އިސްތިރާތީޖީ ގޮތުން މުހިންމު އެ ކަނޑުއޮޅިން ދަތުރުކުރުމުގައި އައިއާރްޖީސީ ނޭވީއާ އެކު ވިލަރެސްކުރުމަކީ "މަޖުބޫރު" ކަމެއް ކަމަށް ވެސް އެ ބަޔާނުގައި ބަޔާންކޮށްފައިވެއެވެ.
މި އިންޒާރު ދީފައިވަނީ، އެމެރިކާއާއި އިޒްރޭލުން އިސްލާމީ ޖުމްހޫރިއްޔާއާ ދެކޮޅަށް އެއްވެސް އުދުވާނަކާ ނުލައި ހަމަލާދޭން ފެށި ފެބްރުއަރީ 28 ގެ ކުރިން އެ ކަނޑުއޮޅި އޮތް ހާލަތަށް ދެން އެ ސަރަހައްދު ނުދާނެ ކަމަށް އީރާނުގެ މަޖިލީހުގެ ރައީސް އަދި އިސް މަޝްވަރާވެރިޔާ މުހައްމަދު ބާގިރު ގާލީބާފް ވިދާޅުވިތާ މަދު ދުވަސްކޮޅެއްގެ ތެރޭގައެވެ. ގާލީބާފް ވިދާޅުވީ، ހުރްމުޒް ކަނޑުއޮޅި ބެލެހެއްޓުމުގެ ކަންކަން ހަނގުރާމައިގެ ކުރިން އޮތް ގޮތަށް ދުވަހަކުވެސް ބަދަލުނުވާނެކަން އެންމެންވެސް ދަންނަންޖެހޭނެ ކަމަށެވެ.
އީރާނުން އެ ކަނޑުއޮޅި ދުޝްމަނުންނަށާއި އެމީހުންގެ ބައިވެރިންނަށް ބަންދުކުރީ އެމީހުންގެ އުދުވާނަށް ރައްދު ދިނުމުގެ ގޮތުންނެވެ. އަދި ހަމަލާބަދަލުކުރުން ހުއްޓާލާފައި އޮތް ނަމަވެސް، އީރާނުގެ ބަނދަރުތަކާއި އުޅަނދުފަހަރު އެމެރިކާއިން ޣައިރު ގާނޫނީ ގޮތެއްގައި ބްލޮކޭޑްކޮށް ހިފަހައްޓަމުންދާތީ، އޭގެ ރައްދުގައި އީރާނުން ވަނީ އެ ސަރަހައްދުގެ ކޮންޓްރޯލް އިތުރަށް ވަރުގަދަކުރަން ފަށާފައެވެ.
މި ފަހުން ދެ ފަރާތުން ވަނީ މި އުދުވާނުގެ ސަބަބުން އުފެދިފައިވާ މައްސަލަތަކަށް ނިމުމެއް ގެނައުމަށްޓަކައި ފަހުމުނާމާއެއްގައި އެއްބަސްވެފައެވެ. މި ފަހުމުނާމާގައި އީރާނާއި އެމެރިކާގެ ރައީސުން ވަނީ ސޮއިކުރައްވާފައެވެ.
މި ފަހުމުނާމާގެ ދަށުން، އެއްބަސްވުމުގައި ސޮއިކުރުމާއެކު އީރާނުން ވިޔަފާރި އުޅަނދުފަހަރު ރައްކާތެރިކަމާއެކު ދަތުރުކުރުމުގެ އިންތިޒާމުތައް ހަމަޖައްސާނެއެވެ. އަދި ފާރިސީ ކަނޑުއޮޅިން ފެށިގެން އޮމާން ކަނޑާ ހަމައަށް އަދި އޮމާން ކަނޑުން ފާރިސީ ކަނޑުއޮޅިއަށް ދަތުރުކުރާ އުޅަނދުތަކުން 60 ދުވަހުގެ މުއްދަތަށް އެއްވެސް ފީއެއް ނުނަގާނެއެވެ.
ނަމަވެސް، އިސްލާމީ ޖުމްހޫރިއްޔާއިން ވަނީ އެ ސަރަހައްދުން ދަތުރުކުރެވޭނީ އީރާނުގެ ކަމާބެހޭ ފަރާތްތަކާ އެކު ކުރަންޖެހޭ ވިލަރެސްކުރުންތައް ފުރިހަމަކުރުމުން ކަމަށް ބުނެ ހަރުކަށި ޝަރުތުތަކެއް ކުރިމަތިކުރުވާފައެވެ.
