ހުރްމުޒް ކަނޑު އޮޅި އަކީ ވަކި ބައެއްގެ ތަނެއް ކަމަށް އެމެރިކާ އިން ބަލައި ނުގަންނާނެ: ރޫބިއޯ

ހުރްމުޒް ކަނޑު އޮޅި އަކީ ވަކި ގައުމެއްގެ މިލްކެއް ކަމަށް ބުނެ ކުރާ ދައުވާތައް އެމެރިކާ އިން ބަލައި ނުގަންނާނެ ކަމަށް އެ ގައުމުގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

ރޫބިއޯ މިހެން ވިދާޅުވީ ބަހްރެއިންގެ މަނާމާގައި އެ ގައުމުގެ އިސް ވެރިންނާއެކު ބޭއްވެވި ބައްދަލު ކުރެއްވުމެއްގައި އެވެ.

ބަހްރެއިން އަށް ކުރެއްވި ރަސްމީ ދަތުރުފުޅުގައި ވާހަކަ ދައްކަވަމުން ރޫބިއޯ ވިދާޅުވީ، ހުރްމުޒް ކަނޑު އޮޅިން ދަތުރުކުރާ އުޅަނދު ފަހަރުގެ އަތުން ފީއެއް ނުވަތަ ޓެކްސްއެއް ނެގުމަށް ބައެއް ފަރާތް ތަކުން މަސައްކަތް ކުރި ނަމަވެސް، އެއީ ކޮންމެ ނަމެއް ކިޔަސް ބަލައި ގަނެވޭނެ ކަމެއް ނޫން ކަމަށެވެ. އަދި އެފަދަ ކަންކަމަކީ ބައިނަލްއަގުވާމީ އުސޫލުތަކާ ޚިލާފު ކަންކަން ކަމަށް ވެސް އޭނާ ފާހަގަ ކުރެއްވި އެވެ.

އީރާން އާއެކު އޮތް ގުޅުމާ ގުޅޭ ގޮތުން ވާހަކަ ދައްކަވަމުން ރޫބިއޯ ވިދާޅުވީ، އެމެރިކާ އިން އީރާން އާއެކު އެއްބަސްވުމަކަށް އަންނަން ބޭނުންވާ ކަމަށެވެ. ނަމަވެސް އެއީ ކޮންމެ ފަދަ އަގަކަށް، ނުވަތަ ކޮންމެ ފަދަ ދޫ ތަކެއް ދީގެން ކުރާނެ ކަމެއް ނޫން ކަމަށް އޭނާ ވިދާޅުވި އެވެ. އެމެރިކާގެ މަސްލަހަތާއި ބައިނަލްއަގުވާމީ ސަލާމަތަށް ނުރައްކާވާ ފަދަ އެއްވެސް ކަމަކަށް އެމެރިކާ އިން އެއްބަސް ނުވާނެ ކަމުގެ ޔަގީންކަން އޭނާ ވަނީ ދެއްވާފައި އެވެ.

މީގެ އިތުރުން ރޫބިއޯ ވިދާޅުވީ، ކަނޑު އޮޅިން ދަތުރުކުރާ އުޅަނދު ފަހަރުގެ އަތުން ނަގާ ފީ އަށް "ޓޯލް" ނުވަތަ "ފީ" އެއްގެ ނަން ދިން ކަމުގައި ވިޔަސް، އެއީ ހަމައެކަނި ބަހުގައި ބޭނުން ކުރާ ގޮތް ބަދަލު ކޮށްލުން ކަމަށެވެ. އަދި އެފަދަ ކަންކަމުގެ އަސްލު މަގްސަދަކީ ބައިނަލްއަގުވާމީ ކަނޑުގެ ދަތުރު ފަތުރަށް ހުރަސް އެޅުން ކަމަށް ވެސް އޭނާ ތުހުމަތު ކުރެއް ވިއެވެ.

ރޫބިއޯ ބަހްރެއިން އަށް ކުރެއްވި މި ދަތުރުފުޅަކީ މެދު އިރުމަތީގެ ސަލާމަތީ ކަންކަމާއި، ޚާއްސަކޮށް ކަނޑުގެ ސަލާމަތާއި ރައްކާތެރިކަމާ ގުޅޭ ގޮތުން އެ ސަރަހައްދުގެ ގައުމުތަކާ އެކު މަޝްވަރާ ކުރެއްވުމަށް ކުރެއްވި ދަތުރުފުޅެކެވެ. މި ބައްދަލުވުން ތަކުގައި އެމެރިކާ އިން ވަނީ ސަރަހައްދީ ހަމަޖެހުން ގާއިމު ކުރުމަށް ބަހްރެއިން އިން ކުރަމުންދާ މަސައްކަތް ތަކަށް ތައުރީފު ކޮށްފައި އެވެ.