އީރާން އިން ކާގޯ ބޯޓަކަށް ހަމަލާ ދީފައިވާ ކަމަށް ބުނެ، ރައްދުގައި އެމެރިކާ އިން ހަމަލާ ދީފި

ހުރްމުޒް ކަނޑު އޮޅީގައި އީރާން އިން ކާގޯ ބޯޓަކަށް ޑްރޯން ހަމަލާއެއް ދިނުމުގެ ރައްދުގައި، އެމެރިކާގެ އަސްކަރިއްޔާ އިން ހުކުރު ދުވަހު އީރާން އަށް ހަމަލާތައް ދިނުމާއެކު އެއް ޤައުމު އަނެއް ޤައުމުން އެއްބަސްވުމާ ޚިލާފުވެފައިވާ ކަމުގެ ތުހުމަތު ކޮށްފި އެވެ.  

އެމެރިކާގެ މެދުތެރޭ ސަރަހައްދުގެ ސެންޓްރަލް ކޮމާންޑް އިން ބުނީ އެ ޤައުމުގެ ހަނގުރާމަ ބޯޓު ތަކުން މިސައިލް އަދި ޑްރޯން ރައްކާކުރާ ތަންތަނާއި، ކަނޑު ދަތުރު ފަތުރު ބަލާ ރަޑާރު ސައިޓު ތަކަށް ހަމަލާތައް ދިނުމަށް ފަހު އެ އޮޕަރޭޝަން ނިންމާލާފައިވާ ކަމަށެވެ. އެ ކޮމާންޑް އިން ފަހުން އާންމު ކޮށްފައިވާ ކަޅު އަދި ހުދު ކުލައިގެ ވީޑިއޯއެއްގައި ތަނެއްގައި ގޮވުމެއް ހިނގާ މަންޒަރު ފެނެ އެވެ. އެމެރިކާގެ އޮފިޝަލަކު ރިޕޯޓު ކޮށްފައިވާ ގޮތުގައި އެ އޮޕަރޭޝަން މިހާރު ވަނީ ނިމިފައި އެވެ. 

އީރާން އިން ބުނީ އެ ޤައުމުގެ ދެކުނުގައިވާ ސިރިކްގައި ހުންނަ ބަނދަރެއްގެ ސަރަހައްދަށް ހަމަލާއެއް ދިނުމާ އެކު، އީރާންގެ ސިފައިން ވަނީ އެ ސަރަހައްދުގައިވާ އެމެރިކާގެ އަސްކަރީ ލަނޑު ދަނޑި ތަކަށް ހަމަލާތައް ދީފައި ކަމަށެވެ. ނަމަވެސް އެ ހަމަލާ ތަކުގައި ބޭނުން ކޮށްފައިވާ ތަކެތި އަދި ލިބުނު ގެއްލުން ތަކުގެ ތަފްސީލު އީރާން އިން ހާމަ ކޮށްފައި ނުވެ އެވެ. 

މި ހަމަލާތައް ދިނުމުން ދެ ގައުމުގެ ދެމެދުގައި ފާއިތުވި ހަފްތާގައި އެއްބަސްވި ހަނގުރާމަ ހުއްޓުމުގެ އެއްބަސްވުން ހީނަރުވެފައިވާ ކަމަށް ބައެއް ފަރާތް ތަކުން އަންނަނީ ފާހަގަ ކުރަމުންނެވެ. ހުރްމުޒް ކަނޑު އޮޅި އަކީ ދުނިޔޭގެ ތެޔޮ ބޭނުން ކުރުމުގެ ވިޔަފާރީގައި ވަރަށް މުހިންމު ސަރަހައްދަކަށް ވުމުން، މި ސަރަހައްދުގައި ހަނގުރާމަ ހިނގުމަކީ ބައިނަލްއަގުވާމީ ވިޔަފާރި އަށް ބޮޑު ނުރައްކަލެއް ކަމަށް ބައިނަލްއަގުވާމީ ތަޖުރިބާކާރުން ބުނެ އެވެ.

އެމެރިކާ އާއި އީރާންއާ ދެމެދު އެކި ދުވަސްވަރު ހިނގާފައިވާ ހަމަ ނުޖެހުންތައް ހައްލު ކުރުމަށް ކުރިން ވެސް ވަނީ ގިނަ މަސައްކަތް ތަކެއް ކޮށްފައި އެވެ. ނަމަވެސް މި ފަހަރުގެ ހަނގުރާމަ ހުއްޓުމުގެ އެއްބަސްވުމާ ވެސް، ކުރު މުއްދަތެއްގެ ތެރޭގައި މި ވަނީ ޚިލާފުވެފައި އެވެ. މި ހަމަލާ ތަކުގެ ސަބަބުން މި ސަރަހައްދުގެ ހާލަތު އިތުރަށް ގޯސްވެދާނެ ކަމުގެ ބިރު އެބަ އޮތެވެ.