ސިއްރު ބައްދަލުވުމެއްގައި ޓްރަމްޕް އާއި ސެނެޓަރު ކެސިޑީއާ ދެމެދު ހޫނު ބަހުސެއް

އިރާން އާއެކު ކުރަމުންދާ ހަނގުރާމައިގެ ޚަރަދު ތަކަށް ބޭނުންވާ އެތައް ބިލިއަން ޑޮލަރެއް ހޯދުމަށް ކޮންގްރެސްގައި އެދުމުގެ ކުޑަ ވަގުތު ކޮޅެއް ކުރިން، އެމެރިކާގެ ރައީސް ޑޮނަލްޑް ޓްރަމްޕް އަށް އޭނާގެ ޕާޓީގެ ސެނެޓަރެއްގެ ފާޑު ކިޔުންތަކާ ކުރިމަތިލައްވަން ޖެހިވަޑައި ގެންފި އެވެ.

ބުދަ ދުވަހު ރިޕަބްލިކަން ޕާޓީގެ މެންބަރުންނާއެކު ބޭއްވި ސިއްރު ބައްދަލުވުމެއްގައި ޓްރަމްޕް ވަނީ ސެނެޓަރު ބިލް ކެސިޑީއާ ބަހުގެ ހަމަލާ ތަކެއް ބަދަލު ކުރައްވާފައި އެވެ. ސިއްރުން ކުރިއަށް ގެންދިޔަ އެ ބައްދަލުވުމުގައި ކެސިޑިީ ވަނީ، އީރާން އާއެކު އެމެރިކާ އިން ސޮއި ކުރި އެއްބަސްވުމާ ގުޅޭ ގޮތުން ސަރުކާރުން އިތުރު ތަފްސީލު ދޭން ޖެހޭނެ ކަމަށް ވިދާޅުވެފައި އެވެ.

މި އެއްބަސްވުމުގެ ދަށުން އީރާން އަށް މާލީ އިނާޔަތް ތަކެއް ލިބިގެންދާއިރު، މިއީ ހަނގުރާމަ ފެށުމުގެ ކުރިން ޓްރަމްޕް ކަނޑަ އެޅުއްވި ލަނޑު ދަނޑިތަކާ ފުށުއަރާ ކަމެއް ކަމަށް ކެސިޑީ ފާހަގަ ކުރެއްވި އެވެ. 

ނޫސްވެރިންނާ ވާހަކަ ދައްކަވަމުން ކެސިޑީ ވިދާޅުވީ، މިހާރު ސަރުކާރުން ހާމަ ކުރަމުންދާ މައުލޫމާތަށް ވުރެ އިތުރު ތަފްސީލު އެމެރިކާގެ ރައްޔިތުންނަށް އެނގެން ޖެހޭ ކަމަށެވެ. އަދި ކަންކަން ކުރިއަށް ދަނީ ބުނެފައިވަ ގޮތަށް ކަމަށް ޤަބޫލު ނުކުރެވޭ ކަމަށް ވެސް އޭނާ ވިދާޅުވި އެވެ. މި ބައްދަލުވުމަށް ފަހު ޓްރަމްޕް ރުއްސުމުގެ ގޮތުން، ސެނެޓުގެ ރިޕަބްލިކަން ލީޑަރު ވަނީ އީރާން އާއެކު އޮތް ދެކޮޅުވެރިކަން ނިމުމަކަށް ގެނައުމަށް ގޮވާ ޤަރާރެއް ހުއްޓުވުމަށް ދަންވަރުގެ ވަގުތެއްގައި ވޯޓެއް ނަގައިފަ އެވެ. 

ސެނެޓުގައި ނެގި މި ވޯޓުގައި، ހަނގުރާމަ ހުއްޓާލުމަށް ގޮވާލާ ގަރާރު ބޭރު ކޮށްލާފައި ވަނީ 50 ވޯޓު 47 ވޯޓުންނެވެ. މިއީ މައިގަނޑު ގޮތެއްގައި ޕާޓީގެ ރޫހުގައި ދެވުނު ވޯޓެކެވެ. މި ގަރާރަކީ މީގެ ކުރިން މެއި މަހުގެ ތެރޭގައި އިޖުރާއީ ވޯޓަކުން ކުރިއަށް ގެންދިއުމަށް ފާސް ކޮށްފައިވާ ގަރާރެކެވެ.

ބުދަ ދުވަހުގެ ރޭ ނެގި ވޯޓަށް ފަހު ސޯޝަލް މީޑިއާގައި ޓްރަމްޕް ވިދާޅުވީ، މި ވޯޓުގެ ސަބަބުން އީރާން އަށް ވަރުގަދަ އިންޒާރެއް ލިބިގެން ދާނެ ކަމަށެވެ. ނަމަވެސް މި ވޯޓުގެ ސަބަބުން ކުރިން ނަގާފައިވާ ވޯޓު ތަކަށް އެއްވެސް ބަދަލެއް ނާންނާނެ އެވެ. މި ހަމަ ނުޖެހުންތައް ފެންމަތިވެފައި ވަނީ އީރާންގެ ހަނގުރާމަ އަށް ބޭނުންވާ އެތައް ބިލިއަން ޑޮލަރެއްގެ ބަޖެޓެއް ހޯދުމަށް ސަރުކާރުން މަސައްކަތް ކުރަމުންދާ ދަނޑިވަޅެއްގައި އެވެ.