އީރާން އަކީ ބާރުގަދަ އަދި ކަރާމާތްތެރި ޤައުމެއްގެ ގޮތުގައި މުޅި ދުނިޔެ ބަލައިގެންފި: އީރާންގެ ރައީސް ޕެޒެޝްކިއާން

އިރާނުގެ ހަތިޔާރު އެޅި ފައުޖު ތަކުން އެމެރިކާ އާއި އިޒްރޭލްގެ ހަމަލާ ތަކަށް ރައްދު ދީފައި ވަނީ، އެ ދެ ގައުމަށް ތަސައްވަރު ވެސް ނުކުރެވޭ ފަދަ ވަރުގަދަ ގޮތަކަށް ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.

ބުދަ ދުވަހު ވާހަކަފުޅު ދައްކަވަމުން ޕެޒްޝްކިއާން ވިދާޅުވީ، މިއަދު އީރާން އަކީ ބާރުގަދަ އަދި ކަރާމާތްތެރި ޤައުމެއް ކަމަށް މުޅި ދުނިޔެ ވެސް ބަލައިގެންފައިވާ ކަމަށެވެ. އަދި އީރާންގެ ދުޝްމަނުން ތިބީ ތިން ދުވަސް ތެރޭގައި އެ ޤައުމަށް ނިމުން ގެނެސް، އެމީހުން ބޭނުންވާ ބަޔަކު ވެރިކަމަށް އިސް ކުރެވޭނެ ކަމަށް ދެކިގެން ކަމަށް ވެސް ޕެޒެޝްކިއާން ވިދާޅުވި އެވެ. 

ނަމަވެސް، އީރާންގެ ސިފައިން ދެއްކި ހިތްވަރާ އެކު، ދުޝްމަނުން ދުވަހަކު ވެސް އުންމީދު ނުކުރާ ފަދަ ވަރުގަދަ ލެގަސީއެއް ނުވަތަ ތާރީޚީ ކާމިޔާބީއެއް އީރާން އިން ގާއިމު ކޮށްފައިވާ ކަމަށް ޕެޒެޝްކިއާން ވިދާޅުވި އެވެ. މީގެ އިތުރުން އޭނާ ވިދާޅުވީ އީރާންގެ އަސްކަރިއްޔާ އިން ވަނީ ގައުމުގެ ދިފާއުގައި ނަމޫނާ ދައްކާފައި ކަމަށެވެ.

މި ހަމަނުޖެހުންތައް ފެށުނުއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާން އެއްކޮށް އަމާން ދިނުމަށް ގޮވާލައްވާފައި އެވެ. އެހެން ނަމަވެސް، މަސްރަހަށް އައި ބަދަލުތަ ކާއެކު މިހާރު ދެ ގައުމުގެ މެދުގައި ޑިޕްލޮމެޓިކް މަޝްވަރާތައް ކުރިއަށްދާކަން ފާހަގަ ކުރެވެ އެވެ.

އީރާންގެ ރައީސްގެ މި ވާހަކަފުޅުތައް އައިސްފައި ވަނީ ސަރަހައްދީ މަސްރަހު ނުތަނަވަސްވެފައިވާ ދަނޑިވަޅެއްގައި އެވެ. ޕެޒެޝްކިއާން އިތުރަށް ވިދާޅުވީ، އީރާން އިން އަބަދުވެސް މަސައްކަތް ކުރާނީ ގައުމުގެ މިނިވަންކަމާއި އިސްތިގުލާލު ހިމާޔަތް ކުރުމަށް ކަމަށާއި، ބޭރުގެ އެއްވެސް ބާރަކަށް އީރާންގެ ދާޚިލީ ކަންކަމުގެ ތެރެއަށް ނުފޫޒު ފޯރުވުމުގެ ފުރުސަތު ނުދޭނެ ކަމަށެވެ.