80 އަހަރުގެ އަންހެނަކު 60 އަހަރު ވަންދެން ކޮންމެ ދުވަހަކު ވެއްޔާއި ހިލަ ކައިފި
އުމުރުން 15 އަހަރުން ފެށިގެން ކޮންމެ ދުވަހަކު ވެއްޔާއި ހިލަ ކަމުން އަންނަ އިންޑިއާގެ އުމުރުން ދުވަސްވީ އަންހެނަކު، އޭނާގެ ދުޅަހެޔޮ ސިއްހަތުގެ ސިއްރަކީ އެ ތަކެތި ކެއުން ކަމަށް ދައުވާކޮށްފިއެވެ. ބަނޑުގެ ބައްޔަކަށް ފަރުވާއެއްގެ ގޮތުން މިކަން ފެށި ކުސްމާ ވަޓީ ބުނާ ގޮތުގައި، މި އާދައިގެ ސަބަބުން އޭނާގެ ދަތްތައް ވަރުގަދަވެ، ވޭތުވެދިޔަ 63 އަހަރު ތެރޭގައި ސިއްހީ އެއްވެސް މައްސަލައެއް ކުރިމަތިވެފައެއް ނުވެއެވެ. އާއިލާއިން މިކަން ހުއްޓުވަން މަސައްކަތް ކުރި ނަމަވެސް، މިއީ ހަށިގަނޑަށް ފައިދާހުރި ކަމެއް ކަމަށް ގަބޫލުކޮށް އޭނާ ދަނީ މި އާދަ ދަމަހައްޓަމުންނެވެ.
އަންހެނަކު އޭނާގެ ކޮންމެ ދުވަހެއްގެ ކެއުމުގައި ވެލި ހިމަނާ ކަމަށް ވަނީ ބުނެފައި. | ނިއުސްފްލެއަރ
އިންޑިއާގެ ވަރަނާސީއަށް ނިސްބަތްވާ އުމުރުން 80 އަހަރުގެ ކުސްމާ ވަތީ ބުނާ ގޮތުގައި، ވޭތުވެދިޔަ 60 އަހަރު ދުވަހު އޭނާ ކޮންމެ ދުވަހަކު ކާބޯތަކެތީގެ ގޮތުގައި ވެއްޔާއި ހިލަ ބޭނުންކުރެއެވެ.
މި އުމުރުން ދުވަސްވީ އަންހެންމީހާ ބުނާ ގޮތުގައި، އޭނާގެ ދުޅަހެޔޮ ސިއްހަތުގެ ސިއްރަކީ އާންމު އުސޫލުތަކާ ޚިލާފަށް އޭނާ ގެންގުޅޭ މި ކެއުމުގެ އާދައެވެ.
ޔާހޫ ނިއުސް ޔޫކޭއިން ރިޕޯޓްކޮށްފައިވާ ގޮތުގައި ކުސްމާ ބުނެފައިވަނީ، އޭނާ ވެއްޔާއި ހިލަ ކާތާ މިހާރު 63 އަހަރު ވެފައިވާ ކަމަށެވެ. އަދި އެ ތަކެތި ކެއުމަށް އޭނާ ވަރަށް ލޯބިކުރާ ކަމަށާއި، އޭގެ ސަބަބުން ސިއްހަތަށް އެއްވެސް ގެއްލުމެއް ލިބޭ ކަމަށް ގަބޫލުނުކުރާ ކަމަށްވެސް އޭނާ ބުންޏެވެ.
ކުސްމާ ބުނާ ގޮތުގައި އޭނާ އެންމެ ފުރަތަމަ ކެއުމުގެ ތެރޭގައި ވެލި ބޭނުންކުރަން ފެށީ އުމުރުން 15 އަހަރުގައެވެ. އެއީ ބަނޑަށް ދިމާވި އުނދަގޫތަކަކަށް ފަރުވާއެއްގެ ގޮތުން ކަމަށާއި، އޭގެ ފަހުން އެކަމަށް އޭނާ ދެވިހިފާފައިވާ ކަމަށް އޭނާ ބުންޏެވެ. އަދި މިކަމުގެ ސަބަބުން މިހާތަނަށް އެއްވެސް ނޭދެވޭ އަސަރެއް ކޮށްފައިނުވާ ކަމަށް އޭނާ ދައުވާކުރެއެވެ.
"އަހަރެންގެ ބަނޑަށާއި އަނގަޔަށް އެއްވެސް ކަހަލަ އުނދަގުލެއް ނުވޭ، އަދި އަހަރެންގެ ދަތްތައްވެސް ހުރީ ވަރަށް ސަލާމަތުން،" އޭނާ ބުންޏެވެ. "މިކަމުގެ ސަބަބުން ދަތްތައް ވަނީ ކުރިއަށްވުރެ ވަރުގަދަވެފައި. ކިތަންމެ ހަރު ހިލަގަނޑެއްގައިވެސް އެއްވެސް އުނދަގުލަކާ ނުލައި އަހަންނަށް ދަތްއެޅިދާނެ."
ކުސްމާ އިތުރަށް ބުނި ގޮތުގައި، ޑޮކްޓަރަކަށް ދައްކަންޖެހޭ ފަދަ އެއްވެސް ކަމެއް ދިމާނުވާތީ އޭނާ ދުވަހަކުވެސް ޑޮކްޓަރަކަށް ދައްކާފައެއް ނުވެއެވެ. އަދި ހަނދާން ހުންނަން ފެށީއްސުރެ އޭނާގެ ހާލު ވަރަށް ރަނގަޅު ކަމަށްވެސް އޭނާ ބުންޏެވެ.
ކުސްމާ ކެއުމަށް ވެލި ތައްޔާރު ކުރަނީ މަށި ތަށިތަކަކަށް އަޅައި، އަވީގައި ބަހައްޓައިގެން ރަނގަޅަށް ހިއްކައިގެންނެވެ. އޭގެ ފަހުން އެ ތަކެތި ކެއުމުގައި ބޭނުންކުރާ ގޮތަކީ ވަރަށް އާދައިގެ ކަމެކެވެ.
ކުސްމާގެ މި ކެއުމުގެ އާދައަށް އެންމެން ތާއީދެއް ނުކުރެއެވެ. ޚާއްސަކޮށް އޭނާގެ މާމަ ދަރިން ގެންދަނީ މި އާދަ ވަގުތުން ހުއްޓާލުމަށް އޭނާއަށް ބާރުއަޅަމުންނެވެ.
އެހެންނަމަވެސް، މާމަ ދަރިން ދައްކާ އެއްވެސް ވާހަކައެއް އަޑުއެހުމުގެ ވިސްނުމެއް ކުސްމާގެ ނެތެވެ.
"މިކަމުން ސަލާމަތްވުމަށްޓަކައި ޑޮކްޓަރީ އެހީތެރިކަން ހޯދުމަށް އަހަރެންގެ މާމަ ދަރިން ބާރުއަޅާ،" އޭނާ ބުންޏެވެ. "ނަމަވެސް އެފަދަ އެއްވެސް ކަމެއް ކުރަންޖެހޭ ސަބަބެއް އަހަންނަކަށް ނުފެނޭ."
