1.4 ބިލިއަން އާބާދީ އޮތް އިންޑިއާއަށް ފީފާ ވޯލްޑް ކަޕުން ފުރުސަތެއް ނުލިބެނީ ކީއްވެ؟

އިންޑިއާއަށް ދުނިޔޭގެ ފުޓްބޯޅަ މުބާރާތް، ފީފާ ވޯލްޑް ކަޕުން ފުރުސަތެއް ލިބިދާނެ ހެއްޔެވެ؟

ދުނިޔޭގެ އެންމެ ބޮޑު ކުޅިވަރު އީދު، ވޯލްޑް ކަޕް މިދިޔަ ހަފުތާގައި ފެށުމާއެކު، އިންޑިއާގެ ފުޓްބޯޅަ ސަޕޯޓަރުން އަބަދުވެސް ކުރަމުން އަންނަ ޝަކުވާތައް އަނެއްކާވެސް ވަނީ އާވެފައެވެ.

އިންޑިއާގެ ގައުމީ ފުޓްބޯޅަ ޓީމު ނުވަތަ "ބްލޫ ޓައިގާސް" ގެ ކާމިޔާބީތަކަށް ފާރަވެރިވާ ފަރާތްތަކަށް، މިއީ އާ ސުވާލެއް ނޫނެވެ. ސަބަބަކީ އޭޝިއާ ސަރަހައްދުގެ ކޮލިފައިންގެ ޕްރިލިމިނަރީ ބުރުން ކުރިއަށް ދިއުމަށް އިންޑިއާ އަދި މިހާތަނަށް ނުކުޅެދިފައިވާތީއެވެ.

ނަމަވެސް، ހައިރާންވާންޖެހޭ ކަމަކީ އިންޑިއާގެ ވެސްޓް ބެންގާލް، ކެރެލާ އަދި ގޯއާ ފަދަ ފުޓްބޯޅައަށް ފޯރި ހުންނަ ސްޓޭޓްތަކުގައި ވޯލްޑް ކަޕް ފާހަގަކުރާ ގޮތެވެ. އަދި އިންޑިއާގެ ޓީމެއް މުބާރާތުގައި ނެތް ނަމަވެސް، އެ ގައުމުގެ ގިނަ އަދަދެއްގެ ނޫސްވެރިން މުބާރާތް ކަވަރުކުރުމަށް އެކްރެޑިޓްވެގެން ދަނޑުމަތީގައި ހަރަކާތްތެރިވަމުންދާ ކަމެވެ.

"ޕްރެސް ބޮކްސްގައި އަހަރެމެންނާ ގިނައިން ކުރިމަތިވާ ސުވާލަކީ އިންޑިއާ މީހުން ފުޓްބޯޅަ ކުޅޭތޯ ކުރާ ސުވާލު. ގިނަ މީހުންނަށް އިންޑިއާ އެނގެނީ ކްރިކެޓް ކުޅޭ ގައުމެއްގެ ގޮތުގައި،" ހަތަރު ވޯލްޑް ކަޕެއް ކަވަރުކޮށްފައިވާ އިންޑިއާގެ ސީނިއާ ކުޅިވަރު ނޫސްވެރިއަކު މަޖާޒީ ގޮތަކަށް ބުންޏެވެ.

މިއީ ހަމައެކަނި އިންޑިއާއަށް ދިމާވެފައިވާ ހާލަތެއް ނޫނެވެ. ދުނިޔޭގެ ދެވަނައަށް އެންމެ އާބާދީ ބޮޑު ގައުމު ކަމަށްވާ އަވަށްޓެރި ޗައިނާއަށް ވެސް މިފަހަރުގެ ވޯލްޑް ކަޕުން ފުރުސަތެއް ނުލިބުނެވެ. ނަމަވެސް، ފީފާއިން ވަނީ މި ދެ ގައުމުގެ މާކެޓަކީ ކިހާ މުހިންމު މާކެޓެއްކަން ދެނެގަނެ، މެޗުތައް ވަގުތުން ދެއްކުމުގެ މީޑިއާ ރައިޓްސްގެ ކަންކަން އެންމެ ފަހު ވަގުތު ހަމަޖެއްސުމަށްޓަކައި ބާރުގަދަ ޓީމެއް އިންޑިއާއަށް ފޮނުވާފައެވެ.

ވީމާ، ވޯލްޑް ކަޕުން ޖާގައެއް ހޯދުމަކީ އިންޑިއާއަށް އަދިވެސް އަތްނުފޯރާ ފަށުގައި އޮތް ކަމެއް ހެއްޔެވެ؟

އިންޑިއާގެ ގައުމީ ޓީމުގެ ކުރީގެ ކެޕްޓަން އަދި އެ ގައުމުގެ ފުޓްބޯޅައިގެ އެންމެ ބޮޑު އެއް ނަން ކަމަށްވާ ބައިޗުންގް ބުޓިއާ ގަބޫލުކުރާ ގޮތުގައި، އެއީ ނުވާނެ ކަމެއް ނޫނެވެ. ނަމަވެސް އެކަމަށް އޮތް ކުރު މަގެއް ނެތެވެ.

"އާނ، އިންޑިއާއަށް ޔަގީނުން ވެސް ވޯލްޑް ކަޕް ކުޅެވިދާނެ. އެއްވެސް ކަމަކީ ނުވާނެ ކަމެއް ނޫން. 48 ޓީމު ކުޅޭ ގޮތަށް މުބާރާތުގެ ފޯމެޓް ބަދަލުވުމުން އޭޝިއާގެ ކޯޓާ ވަނީ އަށް ޓީމަށް އިތުރުވެފައި (ކޮންފެޑަރޭޝަން ޕްލޭ-އޮފް ކާމިޔާބުކުރި އިރާގާއެކު ނުވަ ޓީމު). މިހާރު އުޒްބެކިސްތާނާއި އުރުދުން ފަދަ ޓީމުތައް އެދަނީ ކުޅެމުން. އެކަމަކު އެ ހަރުފަތަށް ދިއުމަށް ވަރަށް ބުރަ މަސައްކަތް ބޭނުންވޭ،" ބުޓިއާ ބުންޏެވެ.

ބުޓިއާ އިތުރަށް ފާހަގަކުރި ގޮތުގައި އިންޑިއާ ފަދަ ބޮޑު ގައުމެއްގައި ހުނަރުވެރި ކުޅުންތެރިންގެ މަދެއް ނޫނެވެ.

"އަހަރެމެންގެ ކިބައިގައި މަދުވަނީ ރަނގަޅު ނިޒާމެއް. ދުރު ރާސްތާގެ ތަސައްވުރަކާއެކު ހިންގާ ސީރިއަސް ގްރާސްރޫޓް ޕްރޮގްރާމެއް ނެތް. ފުޓްބޯޅައަކީ ދުނިޔޭގައި އެންމެ މަގުބޫލު ކުޅިވަރު، އެހެންކަމުން ނަތީޖާ ފެނުމަށް ވަގުތު ނަގާނެ،" އޭނާ ބުންޏެވެ.

1970 ވަނަ އަހަރުގެ އޭޝިއަން ގޭމްސްއިން އިންޑިއާއަށް ލޯ މެޑަލް ހޯދައިދިނުމުގައި އެހީތެރިވި، އުމުރުން 78 އަހަރުގެ ޝާމް ތާޕާ ވެސް ބާރުއެޅީ ދެމެހެއްޓެނިވި ގްރާސްރޫޓް ޕްރޮގްރާމެއްގެ މުހިންމުކަމުގެ މައްޗަށެވެ. އޭނާ ބުނި ގޮތުގައި އެންމެ މުހިންމު ކަމަކީ ގިނަ އަދަދެއްގެ ކުޑަކުދިން ފުޓްބޯޅައިގެ ތެރެއަށް ވެއްދުމެވެ.

އޭނާގެ ވާހަކައިގައި ހިތްހަމަނުޖެހުމުގެ އަސަރު ހުއްޓެވެ. ބައިސްކަލް ކިކް ގޯލުތަކަށް މަޝްހޫރު ތާޕާ ކަންބޮޑުވުން ފާޅުކުރީ، މެދުފަންތީގެ އަދި މުއްސަނދި އާއިލާތަކުން އެމީހުންގެ ދަރިން ފުޓްބޯޅައާ ދުރުކޮށް ކްރިކެޓަށް ބާރުއަޅަމުންދާތީއެވެ.

"އަހަރެން އަމިއްލައަށް ވެސް އެތައް އަހަރަކު ޔޫތު އެކަޑަމީއެއް ހިންގިން. އަހަންނަށް ޔަގީންކަމާއެކު ބުނަން ކެރިދާނެ، ގިނަ ކުދިން ފުޓްބޯޅަ ކުޅެން ފެށިވަރަކަށް ހުނަރުވެރި ކުޅުންތެރިން ފެނުމުގެ ފުރުސަތު ބޮޑުވާނެކަން. އެކަމަކު އޯލް އިންޑިއާ ފުޓްބޯލް ފެޑަރޭޝަން (އޭއައިއެފްއެފް) އިން އެފަދަ ނިޒާމެއް ގާއިމުކުރަން ކުރީ ކޮން ކަމެއް؟"

އޭނާ އިތުރަށް ބުނީ، ގިނަ ބެލެނިވެރިން އެމީހުންގެ ދަރިން ކްރިކެޓް ކޯޗިން ކޭމްޕްތަކަށް ފޮނުވަނީ، އިންޑިއަން ޕްރިމިއާ ލީގު (އައިޕީއެލް) ފަދަ ބޮޑު އާމްދަނީއެއް ލިބޭ މުބާރާތަކުން ފުރުސަތު ލިބޭނެ ކަމުގެ އުންމީދުގައި ކަމަށެވެ.

"އެމީހުން ގަބޫލުކުރަންޖެހޭ ކަމަކީ ފުޓްބޯޅައިން ކުރިއަށް ދިޔަސް ރަނގަޅު އާމްދަނީއެއް ހޯދިދާނެކަން،" އޭނާ ބުންޏެވެ.

މިފަހަރުގެ ވޯލްޑް ކަޕަށް ކޮލިފައިވި އޭޝިއާ ބައްރުގެ ނުވަ ޓީމަށް ބަލާލުމުން، އިންޑިއާގެ ކުރިމަތީގައި އޮތް ގޮންޖެހުމުގެ ބޮޑުމިން ވަޒަންކޮށްލެވެއެވެ.

އެ ޓީމުތަކަކީ އޮސްޓްރޭލިއާ، އީރާން، ޖަޕާން، އުރުދުން، ދެކުނު ކޮރެއާ، އުޒްބެކިސްތާން، ގަތަރު، ސައުދީ އަރަބިއްޔާ އަދި އިރާގު އެވެ. މީގެ ތެރެއިން އުރުދުން އާއި އުޒްބެކިސްތާނަކީ އަލަށް ވޯލްޑް ކަޕްގައި ވާދަކުރާ ދެ ގައުމެވެ.

މި ދެ ގައުމަކީ ވެސް ފީފާ ރޭންކިންގައި އިންޑިއާއަށް ވުރެ މާ ކުރީގައި އުޅޭ ދެ ގައުމެވެ.

އުޒްބެކިސްތާން ދުނިޔޭގެ ރޭންކިންގެ 52 ވަނައިގައި އޮތްއިރު، އުރުދުން އޮތީ 63 ވަނައިގައެވެ. ނަމަވެސް ފާއިތުވި 18 މަސްދުވަހުގެ ތެރޭގައި އިންޑިއާގެ ފެންވަރު ދަށްވެ، އެ ގައުމު ވަނީ ރޭންކިންގެ 136 ވަނައަށް ވެއްޓިފައެވެ.

މި ރޭންކިންތަކުން ހާމަވަނީ އިންޑިއާގެ ފުޓްބޯޅައަށް އޮތް ގޮންޖެހުމުގެ ބޮޑުކަމެވެ. 2022 ވަނަ އަހަރު އޭއައިއެފްއެފްގެ ރައީސްކަމާ ހަވާލުވި ފުރަތަމަ ކުރީގެ ކުޅުންތެރިޔާ ކަލްޔާން ޗައުބޭ ވިދާޅުވީ، "އަށް އަހަރު ތެރޭގައި އިންޑިއާ ވޯލްޑް ކަޕް ކުޅޭނެ ކަމުގެ ހުވަފެންތަކެއް އަހަރެން ނުދައްކާނަން. އޭގެ ބަދަލުގައި އަހަރެން ބުނާނީ މިހާރު އޮތް ހާލަތުން އިންޑިއާގެ ފުޓްބޯޅަ ކުރިއަށް ގެންދާނެ ވާހަކަ،" ކަމަށެވެ.

އޭގެ ގާތްގަނޑަކަށް ހަތަރު އަހަރު ފަހުން މިއަދު އުފެދޭ ސުވާލަކީ، އޭނާ އަށް އެކަން ކާމިޔާބު ކުރެވުނު ހެއްޔެވެ؟

އިންޑިއާގެ ފުޓްބޯޅަ ކުރިއެރުވުމުގެ ބަދަލުގައި، ފާއިތުވި ތިން އަހަރުގެ ތެރޭގައި އޭއައިއެފްއެފް ވެފައިވަނީ މީހުންގެ މަލާމާތް ރައްދުވާ ތަނަކަށް ކަމަށް ގިނަ ބަޔަކު ގަބޫލުކުރެއެވެ.

2014 ވަނަ އަހަރު، ވިޔަފާވެރިންނާއި ބޮލީވުޑް އަދި ކްރިކެޓްގެ މަޝްހޫރު ފަރާތްތަކުގެ އެހީތެރިކަމާއެކު ވަރަށް ކުލަގަދަކޮށް ފެށި އިންޑިއަން ސުޕަ ލީގު (އައިއެސްއެލް) އަކީ ޕްރޮފެޝަނަލްކޮށް ހިންގި، ބޭރުގެ މޮޅު ކުޅުންތެރިން ގެނައި މުބާރާތެކެވެ. ނަމަވެސް މިއަދު އެ މުބާރާތުގެ މުސްތަގުބަލާ މެދު ވަނީ ސުވާލު އުފެދިފައެވެ.

މިފަހަރުގެ އައިއެސްއެލް ސީޒަން ފެށުން ވަރަށް ބޮޑަށް ލަސްވީ، މުބާރާތުގެ ކޮމާޝަލް ޕާޓްނަރަކު ހޯދުމަށް އޭއައިއެފްއެފް އިން ކުރި މަސައްކަތް ނާކާމިޔާބުވުމުންނެވެ. މީގެ ސަބަބުން އެތައް ސަތޭކަ ކުޅުންތެރިންގެ މުސްތަގުބަލާ މެދު ބިރުވެރިކަން އުފެދި، ފެޑަރޭޝަނަށް ބޮޑެތި ފާޑުކިޔުންތަކެއް އަމާޒުވިއެވެ.

އެންމެ ފަހުން، އެއްވެސް ކޮމާޝަލް ޕާޓްނަރަކާ ނުލައި މުބާރާތް ކުރުކޮށްލަން ފެޑަރޭޝަނަށް މަޖުބޫރުވިއެވެ. އަދި އަންނަ ސީޒަނަށް އަލުން ރޭވުންތައް ކުރުމަށް މިހާރު ވަނީ މަޖުބޫރުވެފައެވެ.

މި ހާލަތުގައި، 35 މިލިއަން ކުދިން ފުޓްބޯޅައިގެ ތެރެއަށް ވެއްދުމަށް ޗައުބޭ ވައުދުވި "ވިޝަން 2047" އަކީ ހަމައެކަނި ކެމްޕޭން ވައުދެއްގެ ގޮތުގައި މިހާރު ވަނީ ބެލެވިފައެވެ. އަދި ކަނޑައަޅާފައިވާ އުންމީދީ ލަނޑުދަނޑިތަކާއި ދަނޑުމަތިން ފެންނަ ނަތީޖާއާ ދެމެދު އޮތް ފަރަގު ދަނީ ބޮޑުވަމުންނެވެ.

2023 ވަނަ އަހަރު އިންޑިއާގެ ގައުމީ ޓީމުން ކޮންމެވެސް ވަރެއްގެ ކުރިއެރުމެއް ދެއްކިއެވެ. އިންވިޓޭޝަނަލް މުބާރާތަކާއި ސާފް ޗެމްޕިއަންޝިޕް ކާމިޔާބުކޮށް، ފީފާ ރޭންކިންގެ ގަދަ 100 ގެ ތެރެއަށް ވަނެވެ. ނަމަވެސް އޭގެ ފަހުން އެ ހުރިހާ ކުރިއެރުމެއް ވަނީ ގެއްލިފައެވެ.

2026 ވަނަ އަހަރުގެ ވޯލްޑް ކަޕް ކޮލިފައިންގެ ތިންވަނަ ބުރަށް ފުރަތަމަ ފަހަރަށް ދިއުމުގެ އުންމީދު އާވި ނަމަވެސް، އިންޑިއާއަށް އެކަން ކާމިޔާބެއް ނުވިއެވެ. އަދި އަންނަ އަހަރު އޮންނަ އޭޝިއަން ކަޕަށް ކޮލިފައިވުމުގައި ވެސް އިންޑިއާ ވަނީ ވަރަށް ބޮޑަށް ނާކާމިޔާބުވެފައެވެ.

ކުރިއަށް އޮތް ތަނުގައި އިންޑިއާގެ އެންމެ ބޮޑު އިސްކަމެއް ދޭންޖެހިފައިވަނީ، އޭޝިއާގެ އެންމެ މޮޅު 24 ޓީމު ވާދަކުރާ އޭޝިއަން ކަޕުން ޖާގައެއް ހޯދުމަށެވެ.

މީގެ އަހަރުތަކެއް ކުރިން މީޑިއާއާ ވާހަކަދައްކަމުން، 2025 ވަނަ އަހަރު ރިޓަޔާމަންޓުން އެނބުރި އައި ކުރީގެ ކެޕްޓަން ސުނިލް ޗެތުރީ ބުނީ، ހަގީގަތާ އެއްގޮތް ލަނޑުދަނޑިތަކެއް ކަނޑައަޅަންޖެހޭ ކަމަށެވެ.

"އަހަރެމެން ޖެހޭނީ ފަހަރަކު ފިޔަވަޅެއް އަޅަން. މިވަގުތު އަހަރެމެންގެ އަމާޒަކަށް ވާންޖެހޭނީ ހުރިހާ އޭޝިއަން ކަޕަކަށް ކޮލިފައިވުން. އޭރުން ވަރުގަދަ ޓީމުތަކާ ދެކޮޅަށް ކުޅުމުގެ ފުރުސަތު ލިބޭނެ. އޭޝިއާގެ ގަދަ 15 ނުވަތަ 20 ގައުމުގެ ތެރޭގައި ހިމެނުމުން ނޫނީ ވޯލްޑް ކަޕްގެ ވާހަކަ ދެއްކުމުގެ މާނައެއް ނެތް،" އޭނާ ބުންޏެވެ.

މިވަގުތަށް ބަލާއިރު އިންޑިއާގެ ފުޓްބޯޅައިގެ ކުރިމަގު ފެންނަނީ ބަނަކޮށެވެ. ނަމަވެސް އޭއައިއެފްއެފްގެ ލީޑަޝިޕުން ދަނީ އިންޑިއާއިން ބޭރުގައި ދިރިއުޅޭ އިންޑިއާ ދަރިކޮޅުގެ މީހުންނަށް (އޯސީއައި ކާޑު އޮންނަ ފަރާތްތަކަށް) ގައުމީ ޓީމަށް ކުޅުމުގެ ފުރުސަތު ދިނުމަށް ސިޔާސަތު ބަދަލުކުރަން މަސައްކަތް ކުރަމުންނެވެ.

މިހާރު އޮންނަ ގޮތުން، ބޭރު ގައުމެއްގެ ޕާސްޕޯޓް އޮންނަ އިންޑިއާ ދަރިކޮޅުގެ ކުޅުންތެރިއަކު ގައުމީ ޓީމަށް ކުޅެން ބޭނުންނަމަ، އެ ގައުމެއްގެ ސިޓީޒަންޝިޕް ދޫކޮށްލަންޖެހެއެވެ. އޮސްޓްރޭލިއާއަށް އުފަން ރަޔަން ވިލިއަމްސް އެގޮތަށް އަމަލުކޮށް، އިންޑިއާ ޓީމުގައި އޭނާގެ މުހިންމުކަން މިހާރު ވަނީ ސާބިތުކޮށްދީފައެވެ.

މި ސިޔާސަތު ބަދަލުވެއްޖެނަމަ، އިންޑިއާގެ ޓީމަށް ބޮޑު ބަދަލެއް އަތުވެދާނެއެވެ.

މިފަހަރުގެ ވޯލްޑް ކަޕްގައި އެކަނި ވެސް އިންޑިއާ ދަރިކޮޅުގެ ހަތަރު ކުޅުންތެރިއަކު އެހެން ގައުމުތަކަށް ކުޅެއެވެ. އެއީ ގަތަރުގެ ތަހްސީން މުހައްމަދު، އޮސްޓްރޭލިއާގެ ނިޝާން ވެލޫޕިލޭ، ނިއުޒީލެންޑްގެ ސަރްޕްރީތު ސިންގް އަދި ކޮންގޯގެ ސެމިއުލް މުޓޫސާމީއެވެ.

ނަމަވެސް، މި ހުރިހާ ކަމަކީ އަދިވެސް ހަމައެކަނި އުންމީދުތަކެކެވެ.

އެ ދުވަސް އަންނަންދެން، އިންޑިއާގެ ސަޕޯޓަރުން ތިބޭނީ ދުރުގައި ތިބެގެން މެސީ އާއި ރޮނާލްޑޯ އަދި ނޭމާ ފަދަ ކުޅުންތެރިންނަށް ސަޕޯޓްކުރުމުގައެވެ. އަދި ވޯލްޑް ކަޕަށް ކޮލިފައިވި އެންމެ ކުޑަ ގައުމު ކަމަށްވާ ކުރަސާއޯ ފަދަ ގައުމުތަކުގެ ކާމިޔާބީއަށް ބަލައި ހައިރާންވުމުގައެވެ.

އަދި އަބަދުވެސް ކުރެވޭ ސުވާލު އޮންނާނެއެވެ: ކުރަސާއޯ ފަދަ ކުޑަ ގައުމަކަށް އެކަން ކުރެވުނުއިރު، އިންޑިއާއަށް އެކަން ނުވަނީ ކީއްވެ ހެއްޔެވެ؟