ސަރުކާރުގެ ސިޔާސީ މަގާމުތައް ވަކި އަދަދަކަށް ތިރިކުރެވޭތޯ މަސައްކަތް އެބަކުރަން: މުންދު
ސަރުކާރުގެ ސިޔާސީ މަގާމުތައް ވަޒަންކުރުމުގެ މަރުހަލާ ނިމުމަކަށް އައިސްފައިވާއިރު، ކުރިއަށް އޮތީ އެ މަގާމުތައް މަދުކުރުމުގެ އަމަލީ މަސައްކަތް ކަމަށް ރައީސް އޮފީހުގެ ތަރުޖަމާނު ވިދާޅުވެއްޖެ. ނަމަވެސް، ސަރުކާރުން ސިޔާސީ މަގާމުތައް އިތުރުކުރަމުންދާ ކަމަށާއި ކުންފުނިތަކުން ސިޔާސީ ބޭނުމަށް ވަޒީފާ ދެމުންދާ ކަމުގެ ތުހުމަތުތަކާއެކު އާންމުންގެ ކަންބޮޑުވުން ވަނީ އިތުރުވެފަ. އިގްތިސާދީ ހާލަތަށް ރިއާޔަތްކޮށް ސިޔާސީ މަގާމުތަކުގެ އަދަދު މަދުކުރުމަކީ ރައްޔިތުންގެ ބޮޑު އެދުމެއް.
ސަރުކާރުގެ ތަރުޖަމާނު މުޙައްމަދު ހުސައިން ޝަރީފް (މުންދު) | ރާއްޖެ އެމްވީ
ސަރުކާރުގެ ސިޔާސީ މަގާމުތައް ވަކި އަދަދަކަށް މަދުކުރުމަށްޓަކައި ކުރަންޖެހޭ މަސައްކަތްތައް ކުރަމުންދާ ކަމަށް ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުހައްމަދު ހުސައިން ޝަރީފް (މުންދު) ވިދާޅުވެއްޖެ އެވެ.
މުންދު މިހެން ވިދާޅުވީ، ރައީސް އޮފީހުން ކުރިއަށްގެންދާ "ޕްރެސަރ ވިތު ދަ ސްޕޮކްސް" ސިލްސިލާގެ ތެރެއިން ހޮނިހިރު ދުވަހު ބޭއްވި ބައްދަލުވުމުގައި، ސަރުކާރުގެ ސިޔާސީ މަގާމުތައް އިތުރުވަމުންދާ މައްސަލައާ ގުޅޭގޮތުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.
ތަރުޖަމާނު ވިދާޅުވީ، ސިޔާސީ މަގާމުތަކުގެ އިވެލުއޭޝަން ނުވަތަ ވަޒަންކުރުމުގެ މަރުހަލާ މިހާރު އޮތީ ގާތްގަނޑަކަށް ނިމުމަކަށް އައިސްފައި ކަމަށެވެ. އަދި ދެން އޮތީ އެ އިވެލުއޭޝަނަށް ބިނާކޮށް އަޅަންޖެހޭ ފިޔަވަޅުތައް އެޅުމުގެ މަރުހަލާ ކަމަށް އޭނާ ފާހަގަކުރެއްވި އެވެ.
އެ މަރުހަލާއަށް މިހާރު އެ އޮތީ ގޮސްފަ. އޭގެ މާނައަކީ "އިވެލުއޭޓް" ކުރަނީ ކީއްކުރަން، "އިވެލުއޭޓް" ކުރަނީ ހަޤީގަތުގައި "ނީޑެޑް ކެޕޭސިޓީ" އަށް ގެނައުމުގެ ނިޔަތުގައި. މިސާލަކަށް އެސްއޯއީ ތަކެއްގައި އަޅުގަނޑުމެންނަށް އޮންނާނެ "ވަން ތާޑް" ކަމަށް އަޅުގަނޑަށް ގަބޫލް ކުރެވެނީ މަދުކުރަން އުނިކުރަން. ސަރުކާރުގެ ސިޔާސީ މަގާމުތަކުން ވަކި އަދަދަކަށް އަޅުގަނޑުމެން މި ތިރިކުރެވޭތޯ މަސައްކަތް ކުރަނީރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުހައްމަދު ހުސައިން ޝަރީފް (މުންދު)
މުންދު އިތުރަށް ވިދާޅުވީ ކުރިއަށް އޮތް ތަނުގައި ފެނިގެންދާނީ އެއްކުރެވުނު މައުލޫމާތުގެ އަލީގައި ތަންފީޒީ މަސައްކަތްތަކެއް ކުރެވޭ ތަން ކަމަށެވެ.
ސަރުކާރުން މިފަދައިން ބުނި ނަމަވެސް، ރައީސް ޑރ. މުހައްމަދު މުއިއްޒުގެ މި ސަރުކާރުން އެއްވެސް އުސޫލެއް ނެތި ސިޔާސީ މަގާމުތައް އުފައްދައި ބަހަމުންދާ ކަމަށް އިދިކޮޅު ފަރާތްތަކުންނާއި އާންމުންގެ ބައެއް ފަރާތްތަކުން ދަނީ ތުހުމަތު ކުރަމުންނެވެ. ދާދި ފަހުން ކެބިނެޓަށް ގެނައި ބަދަލުތަކާއެކު ބައެއް ވަޒީރުން ވަކިކުރި ނަމަވެސް، އެ ބޭފުޅުންނަށް އެހެން ނަންނަމުގައި ބޮޑެތި މުސާރަ ލިބޭ ސިޔާސީ މަގާމުތައް ދީފައިވާކަން ގިނަ ބަޔަކު ފާހަގަކުރެ އެވެ.
މީގެ އިތުރުން، ސަރުކާރު ހިއްސާވާ ކުންފުނިތަކުން (އެސްއޯއީ) ސިޔާސީ ބޭނުމަށް ގިނަ އަދަދެއްގެ ބަޔަކަށް ވަޒީފާ ދެމުންދާ ކަމުގެ ކަންބޮޑުވުމާއި، ސަރުކާރަށް ތާއީދު ނުކުރާ މުވައްޒަފުން ވަޒީފާ އިން ވަކިކުރަމުންދާ ކަމުގެ ޝަކުވާތައް ވެސް ވަނީ ބޮޑުވެފަ އެވެ. ސަރުކާރަށް 3 އަހަރު ފުރެން ކައިރިވެފައިވާއިރު، އިގްތިސާދީ ހާލަތަށް ރިއާޔަތްކޮށް ސިޔާސީ މަގާމުތައް މަދުކުރުމަކީ ރައްޔިތުންގެ ބޮޑު އެދުމެކެވެ.
