މުޙައްމަދު މުޢިއްޒު އަކީ ވައްކަން ކުރާނެ ބޭފުޅެއް ނޫން: މުންދު

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަކީ ވައްކަން ކުރައްވާނެ ބޭފުޅެއް ނޫން ކަމަށް ސަރުކާރުގެ އިސް ތަރުޖަމާނު މުޙައްމަދު ޙުސެއިން ޝަރީފް (މުންދު) ވިދާޅުވެއްޖެ އެވެ.

ހޮނިހިރު ދުވަހު އޮތް ނޫސްވެރިންގެ ބައްދަލުވުމުގައި މުންދު އެހެން ވިދާޅުވީ ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ. އެގޮތުން ނޫމަޑި މައްސަލައިގައި ރައީސް މުޢިއްޒުގެ މައްޗަށް އުފުލި ދައުވާ ސާބިތު ނުވީ އެމަނިކުފާނު ރިޝްވަތު ހުށަހަޅުއްވައިގެން ކަމަށް، ކުރީގެ ކޮމިޝަނަރ އޮފް ޕޮލިސް ޙުސެއިން ވަޙީދު ތުހުމަތު ކުރައްވާފައިވާ ކަމަށް ނޫސްވެރިޔާ ސުވާލު ކުރި އެވެ. އެކަމާ ހުވާ ކުރައްވަން ވެސް ތައްޔާރަށް ހުންނެވި ކަމަށް ޙުސެއިން ވަޙީދު ވިދާޅުވެފައިވެ އެވެ.

އެކަމާ ގުޅޭ ގޮތުން މުންދު ވިދާޅުވީ، އެކަމުގައި ހުވާ ކުރައްވަން ޙުސެއިން ވަޙީދާ އެކު ވަޑައިގަންނަވަން ތައްޔާރު ކަމަށެވެ. އަދި އޭރު މުންދު އަކީ ރައީސް އޮފީހުގެ މިނިސްޓަރުގެ މަގާމުގައި ހުންނެވި ފަރާތް ކަމަށާއި، އެކަމުގައި ރައީސް މުޢިއްޒުގެ އެއްވެސް ކުށެއް ނޯންނާނެ ކަމުގެ ސާބިތު ހެކި އިނގޭ ކަމަށް ވެސް މުންދު ވިދާޅުވި އެވެ. ފަރުދީ ގޮތުން ވެސް އެކަން އެނގިވަޑައިގަންނަވާ ކަމަށް މުންދު ވިދާޅުވި އެވެ.

މީގެ އިތުރުން މުންދު ވިދާޅުވީ ރައީސް މުޢިއްޒުގެ ބޮލުގައި އެކަން އަޅުވަން ނިންމީ، އިކޮނޮމިކް ކައުންސިލް އިން ނިންމާފައިވާ ނިންމުމެއް ކަމަށް ބުނެ ކަމަށެވެ. ނަމަވެސް، ރައީސް މުޢިއްޒު އަކީ އިކޮނޮމިކް ކައުންސިލްގައި ހިމެނޭ ބޭފުޅެއް ނޫން ކަމަށާއި، އެ ކައުންސިލްގައި ނުހިމެނޭ މީހަކު އެ މައްސަލައިގައި ކުށްވެރި ނުވާނެ ކަމަށް މުންދު ވިދާޅުވި އެވެ. އަދި މުންދު ވިދާޅުވީ، ޙުސެއިން ވަޙީދު ވިދާޅުވި ފާހަގަ އަކީ ދޮގެއް ކަމަށެވެ. 

އެއާ އެކު މުންދު ވިދާޅުވީ މުޙައްމަދު މުޢިއްޒު އަކީ ވައްކަން ކުރައްވާނެ ބޭފުޅެއް ނޫން ކަމަށާއި، ޙުސެއިން ވަޙީދުގެ ގޮތެއް އެނގިވަޑައި ނުގަންނަވާ ކަމަށެވެ. 

ނޫމަޑި އަށް ބަދަލުގެ ގޮތުގައި 55 މިލިއަން އެމެރިކާ ޑޮލަރު، ނުވަތަ 848 މިލިއަން ދިވެހި ރުފިޔާ ދޭން ޖެހުނީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި އެއްބަސްވުން ބާތިލު ކުރުމުންނެވެ. މީގެ ކުރިން ރައީސް ޔާމީން ވެސް ވަނީ، ނޫމަޑި އަށް ބަދަލުގެ ގޮތުގައި ފައިސާ ދޭން ޖެހުނީ ރައީސް މުޢިއްޒުގެ ސަބަބުން ކަމަށް ވިދާޅުވެފައި އެވެ.