އައްޑޫ ލިންކްރޯޑާއި މަގުތައް ހެދުމުގެ ގާބިލުކަމެއް އާރްޑީސީ އަކު ނެތް: މެންބަރު ދީދީ

އައްޑޫ ސިޓީގެ ލިންކްރޯޑާއި އެހެނިހެން މަގުތައް ތަރައްޤީކުރުމުގެ އަމަލީ މަސައްކަތް ކުރިއަށް ނުދަނީ، އެ މަޝްރޫޢު ހަވާލުކޮށްފައިވާ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ އެ ގާބިލުކަން ނެތުމުން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.

ރާއްޖެ ޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުން ދީދީ ވިދާޅުވީ، އައްޑޫ ސިޓީގެ ލިންކް ރޯޑުގެ މައްސަލައަކީ ރައްޔިތުންގެ ވަރަށް ބޮޑު ކަންބޮޑުވުމެއް އޮތް ކަމެއް ކަމަށެވެ. އަދި މި މަޝްރޫޢަކީ މުޅި ރާއްޖެއިންވެސް އެންމެ އިސްކަންދޭ (ޕްރަޔޯރިޓީ) މަޝްރޫޢު ކަމަށް ސަރުކާރުގެ ވަޒީރުން ވިދާޅުވަމުންދާއިރު، އަމަލީ ގޮތުން އެ މަންޒަރު ނުފެންނަކަން އޭނާ ފާހަގަކުރެއްވި އެވެ.

މި މަޝްރޫޢަކީ 829 މިލިއަން ރުފިޔާގެ ބޮޑު މަޝްރޫޢެއްކަން ފާހަގަކުރައްވައި ދީދީ ވިދާޅުވީ، މަސައްކަތުގެ ދުވެއްޔާ ބެހޭގޮތުން ސުވާލުކުރުމުން ވެހިކަލްތައް ގެންނަ ވާހަކަ ސަރުކާރުން ބުނަމުންދާ ކަމަށެވެ. ނަމަވެސް، މިހާރު އައްޑޫ އަށް ގެންގޮސްފައިވާ ވެހިކަލްތަކަކީ އާދައިގެ ކުންފުންޏަކުން މަގު ކޮންނަންވެސް ބޭނުންކުރާނެ ފަދަ ވަސީލަތްތަކެއް ނޫން ކަމަށާއި، އެއީ މަގު ހެދުމުގެ "ނޯ ހައު" ނުވަތަ ފަންނީ ތަޖުރިބާ ނެތުމުގެ ނަތީޖާ ކަމަށް އޭނާ ތުހުމަތުކުރެއްވި އެވެ.

ރައްޔިތުންގެ އަގުބޮޑު މުދަލަށް މިދެންނެވި ވެހިކަލްތަކަށް ގެއްލުންވަމުންދާ، އަދި ފުރާނައަށްވެސް ގެއްލުންވާ ހާލަތުގަ އެކްސިޑެންޓް ޕްރޯން މަގެއްގެ ގޮތުގަ މިއޮންނަނީ އައްޑޫ ލިންކް ރޯޑް. އެހެންވީމަ އެކަން ހައްލުކުރުމަށްޓަކައި، މުޅި ދިވެހިރާއްޖޭގެ ސަރުކާރުން އެންމެ ޕްރަޔޯރިޓީ ދީގެން ހިންގާ ޕްރޮޖެކްޓު،  އެސެޓެއްނެތް، ގާބިލުކަމެއްނެތް، ކެޕޭސިޓީއެއްނެތް ބަޔަކާ ހަވާލުކުރީމަ ދެން މި ސަރުކާރުގެ ފެންވަރު އެބަ އެނގޭ. އަޅުގަނޑަށް މައުލޫމާތު ލިބެނީ މިހާރު ދެތިން ވެހިކަލް އެ އައްޑުއަށް ގެންގޮސްފި ކަމަށް. އެ ވެހިކަލް ތަކަކީ އާދައިގެ ކުންފުންޏަކުންވެސް މި މަގެއްގަ ވަޅެއް ކޮންނަންވެސް ބޭނުންނުކުރާ ވަރުގެ އެ އެއްޗެހި. އެހެންނަމަވެސް ދަންނަވަން މި އުޅޭ ވާހަކައަކީ މި ބޭފުޅުންނަށް ހަމަ "ނޯ ހައުއެއްވެސް" ނޭނގޭތީތާ މިސާލަކަށް 60 ކިލޯމީޓަރުގެ މަގެއް ހަދަން ކެޕޭސިޓީއެއްނެތް ކުންފުންޏަކަށް ހަވާލުކުރާނީ. ފަސްދޮޅަސް ކިލޯމީޓަރޭ މިދެންނެވި އައްޑޫސިޓީގެ ރަނގަޅު ފެންވަރަކަށް ނަހަދާ ހުރި އެހެން މަގުތަކާ އެއްކޮށް މި ބޭފުޅުން 829 މިލިއަން ރުފިޔާ އަށް ހަވާލުކުރީ އާރްޑީސީ އާ. ކެޕޭސިޓީ ނެތް ބަޔަކާ ހަވާލުކޮށްގެން މިހާރު ދެ އަހަރު ވެގެން މިދަނީ އެއްވެސް ކަމެއް ނުކުރެވި.

ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ 

ދީދީ އިތުރަށް ވިދާޅުވީ، އައްޑޫ ސިޓީގެ ފޭދޫ، މަރަދޫ އަދި ހިތަދޫން އަލަށް ހިއްކި ބިންތަކުގައި މީހުން ދިރިއުޅެން ގޯތި ދީފައިވާތާ ތިން ހަތަރު އަހަރު ވެފައިވީ ނަމަވެސް، އެ ތަންތަނުގައި ފެނާއި ނަރުދަމާ، ކަރަންޓު އަދި މަގު ހެދުން ފަދަ އަސާސީ އިންފްރާސްޓްރަކްޗަރގެ އެއްވެސް މަސައްކަތެއް ކުރިއަށް ނުދާ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންތިޚާބު ތެރޭގައި ވެވަޑައިގެންނެވި ވަޢުދުތަކަށް އިޝާރާތް ކުރައްވަމުން ދީދީ ވިދާޅުވީ، ފުރަތަމަ އަހަރުން ފެށިގެން ހުރިހާ މަސައްކަތެއް ބާރަށް ކުރިއަށް ގެންގޮސް ފަސް އަހަރު ތެރޭ ނިންމާނެ ކަމަށް ވިދާޅުވި ނަމަވެސް، މިހާރުވެސް ދެ އަހަރާ ބައި ތިން އަހަރު ބޭކާރުވެގެން ގޮސްފައިވާ ކަމަށެވެ. އަދި އިންތިޚާބާ ދިމާކޮށް ދެތިން ރުކެއް ކަނޑާލުން ފިޔަވައި،  އެއްވެސް މަސައްކަތެއް މި ސަރުކާރުން ކޮށްފައިނުވާކަމަށް އެނާ ވިދާޅުވި އެވެ. އަދި ރައީސް މުއިއްޒުގެ މި ފަސް އަހަރު ތެރޭގައި އައްޑޫ ސިޓީގެ ލިންކްރޯޑާއި އެހެނިހެން މަގުތައް ތަރައްޤީކުރުމުގެ މަޝްރޫއު އައްނިންމާލެވިދާނެ ކަމަށް ގަބޫލުނުކުރެއްވޭ ކަމަށްވެސް ދީދީ ވިދާޅުވި އެވެ.

 އައްޑޫ ލިންކްރޯޑް އަދި މަގުތައް ތަރައްޤީ ކުރުމުގެ މަޝްރޫޢު ސަރުކާރުން އާރްޑީސީ އާ ޙަވާލުކޮށްފައިވަނީ، މިދިޔަ އަހަރުގެ އޭޕްރީލް މަހުގެ 25 ވަނަ ދުވަހު އެވެ. ދައުލަތުގެ ބަޖެޓުން ޖުމްލަ 829 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިޔަށްގެންދާ މި މަޝްރޫއު ހަވާލުކޮށްފައިވަނީ 3 އަހަރާއި 11 މަސްދުވަހުގެ ތެރޭގައި މަސައްކަތް ނިންމާގޮތަށެވެ.