ބެއިޖިންގެ އެންމެ އުސް އިމާރާތުގައި މަތިންދާ ބޯޓެއް ޖެހި އެކްސިޑެންޓް ވެއްޖެ

ބެއިޖިންގެ އެންމެ އުސް އިމާރާތް ކަމަށްވާ 109 ބުރީގެ ސީ.އައި.ޓީ.އައި.ސީ (ސިޓިކް) ޓަވަރުގައި ކުޑަ ބޯޓެއް ޖެހި އެކްސިޑެންޓް ވުމާ ގުޅިގެން، އެ އިމާރާތުން މީހުން ހުސްކުރުމުގެ މަސައްކަތް ކޮށްފި ކަމަށް މީޑިއާ ރިޕޯޓުތައް ބުނެފިއެވެ.

"ޗައިނާ ޒުން" ގެ ނަމުން ވެސް މަޝްހޫރުވެފައިވާ 528 މީޓަރު (1,732 ފޫޓު) އުސް މި އިމާރާތަކީ ޗައިނާގެ ވެރިރަށް ބެއިޖިންގެ މަރުކަޒީ ވިޔަފާރި ސަރަހައްދުގައި ހުންނަ އެންމެ ފާހަގަކޮށްލެވޭ ބިނާއެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ހުކުރު ދުވަހުގެ އިރުއޮއްސި 5:40 އެހާކަންހާއިރު މި ކުޑަ ބޯޓު އިމާރާތުގެ މަތީ ބައިގައި ޖެހުމާއެކު، ބޯޓުގެ ބައިތައް ބިމަށް ފައިބަމުންދިޔައެވެ.

ރޮއިޓާސްއިން ރިޕޯޓުކޮށްފައިވާ ގޮތުގައި، ބޯޓު ޖެހުމުގެ ސަބަބުން ޓަވަރުގެ މަތީ ބުރިއެއްގެ ދެ ބިއްލޫރިގަނޑު ވަނީ ތަޅައިގެން ގޮސްފައެވެ. ނަމަވެސް، މި ހާދިސާގައި މީހަކު މަރުވި ކަމެއް ނުވަތަ އަނިޔާވި ކަމެއް އަދި، ބޯޓު ވެއްޓެން މެދުވެރިވި ސަބަބު ޗައިނާގެ ކަމާބެހޭ އިދާރާތަކުން އަދި ހާމަކޮށްފައެއް ނުވެ އެވެ.

ހާދިސާ ހިނގި ސަރަހައްދުގައި ކަމާބެހޭ ފަރާތްތަކުން މިހާރު ދަނީ ހަރަކާތްތެރިވަމުންނެވެ. އެގޮތުން، އިމާރާތް ހިމެނޭ ސަރަހައްދަށް ގިނަ އަދަދެއްގެ އެމްބިއުލާންސްތައް ގޮސްފައިވާއިރު، ފުލުހުން ވަނީ އެ ސަރަހައްދު ބަންދުކޮށް، އެއްވެފައި ތިބި މީހުން ދުރަށް ޖައްސާފަ އެވެ.

އެ އިމާރާތުގައި މަސައްކަތްކުރާ އަންހެނަކު "ސައުތު ޗައިނާ މޯނިންގ ޕޯސްޓް" ނޫހަށް މައުލޫމާތު ދެމުން ބުނީ، ހާދިސާ ހިނގުމާއެކު ވަރަށް އަވަހަށް އިމާރާތުން މީހުން ހުސްކުރަން ފެށި ކަމަށެވެ.

"އަހަރެން އިމާރާތުން ބޭރަށް ނުކުތީ އައިޑީ ކާޑާއި ދަބަސް ވެސް ނުލައި، ވަރަށް އަވަސްއަރުވާލައިގެން،" އޭނާ ކިޔައިދިނެވެ.

މި ހާދިސާ ހިނގިއިރު ބޯޓުގައި ތިބި އެއްވެސް މީހަކު ސަލާމަތްވިކަން ނުވަތަ ނޫންކަން ކަމާބެހޭ ފަރާތްތަކުން އަދި ރަސްމީކޮށް ހާމަކޮށްފައެއް ނުވެ އެވެ.