އެމެރިކާ އާއި އީރާން އިން ހަނގުރާމަ ހުއްޓާލުމަށް، ރަޝިޔާާ އާއި ޗައިނާ އިން ގޮވާލައިފި

އެމެރިކާ އާއި އީރާން އިން ހަނގުރާމަ ހުއްޓާލުމަށް، ރަޝިޔާ އާއި ޗައިނާ އިން ގޮވާލައިފި އެވެ.

ރަޝިޔާ އާއި ޗައިނާ އިން މިހެން ގޮވާލާފައި ވަނީ، އެމެރިކާ އާއި އީރާން އިން މިފަހުން ހަމަލާ ތަކެއް ބަދަލު ކޮށްފައި ވަނިކޮށެވެ. މިއީ އޭޕްރީލް މަހުގެ ތެރޭގައި އެކުލަވާލި ހަނގުރާމަ މެދު ކަނޑާލުމުގެ އެއްބަސްވުމަށް ފަހު، ދެ ޤައުމުން މިފަދަ ގޮތެއްގައި ހަމަލާ ބަދަލު ކުރި ފުރަތަމަ ފަހަރެވެ. 

ރަޝިޔާގެ ފޮރިން މިނިސްޓްރީގެ ތަރުޖަމާނު މާރިއާ ޒަކަރޯވާ ނޫސްވެރިންނާ ވާހަކަ ދައްކަވަމުން ވިދާޅުވީ، އެމެރިކާ އާއި އީރާންއާ ދެމެދު ހިނގު އައު ބުރުގެ ހަނގުރާމައިގެ ކުރިމަތިލުންތަކާ ގުޅިގެން ރަޝިޔާ އިން ވަރަށް ބޮޑަށް ކަންބޮޑުވާ ކަމަށެވެ. އޭނާ ވިދާޅުވީ އީރާންއާ ދެކޮޅަށް އެމެރިކާ އާއި އިޒްރޭލް އިން ދިން ހަމަލާ ތަކުގެ ސަބަބުން، ވަރުގަދަ ހަނގުރާމައެއް ފެށިފައިވާ ކަމަށެވެ. އޭނާ ވިދާޅުވީ ހަނގުރާމައިގެ އަމަލުތައް ހުއްޓާލުމަށް ރަޝިޔާ އިން ދެ ޤައުމަށް ވެސް ގޮވާލާ ކަމަށެވެ. 

މީގެ އިތުރުން ޗައިނާ އިން ބުދަ ދުވަހު ބުނީ، މެދު އިރުމަތީގެ ހަނގުރާމަ ވަރުގަދަވުމާ ގުޅިގެން އެ ޤައުމުން ވެސް ވަރަށް ކަންބޮޑުވާ ކަމަށެވެ. އެމެރިކާގެ ހެލިކޮޕްޓަރެއް ހޮރްމޫޒް ކަނޑު އޮޅި ކައިރިން ވެއްޓުމާ ގުޅިގެން، އެމެރިކާ އިން އީރާން އަށް ހަމަލާ ދީފައިވާއިރު، ޗައިނާ އިން ވަނީ އެ ހަމަނުޖެހުންތައް ހުއްޓާލުމަށް ގޮވާލައިފަ އެވެ. އެމެރިކާގެ ހަަމަލާ ތަކުގެ ރައްދުގައި އީރާން އިން ވެސް ހަމަލާ ތަކެއް ދީފައިވެ އެވެ.

ޗައިނާގެ ފޮރިން މިނިސްޓްރީގެ ތަރުޖަމާނު ލިން ޖިއަން ނޫސްވެރިންނާ ވާހަކަ ދައްކަވަމުން ވިދާޅުވީ، މި މައްސަލައާ ގުޅުންހުރި ހުރިހާ ފަރާތް ތަކަކުން ގޮތް ދޫކޮށް، ހަނގުރާމަ ހުއްޓާލުމަށް ޗައިނާ އިން ގޮވާލާ ކަމަށެވެ. އެގޮތުން ހަނގުރާމައިގެ ސަބަބުން ޙާލަތު އިތުރަށް ގޯސްވެގެން ދިޔުމަކީ ޗައިނާ އިން ބޭނުންވާ ގޮތެއް ނޫން ކަމަށް ވެސް އޭނާ ވަނީ ވިދާޅުވެފައި އެވެ. އެކަން ކުރުމަށްޓަކައި އަމަލީ ގޮތުން ފިޔަވަޅު ތަކެއް އެޅުމަކީ ވަރަށް މުހިންމު ކަމެއް ކަމަށް އޭނާ ވިދާޅުވި އެވެ.