އެމެރިކާގެ އަސްކަރީ ބޮންއަޅާ ބޯޓެއް ވެއްޓިއްޖެ
އެމެރިކާގެ ކެލިފޯނިއާގައި ހިނގި މި ހާދިސާގައި ބޯޓު ވެއްޓުމާއެކު ބޮޑު ސަރަހައްދެއްގައި އަލިފާން ރޯވެ ދުންގަނޑު ފެތުރިފައިވީ ނަމަވެސް، އެއްވެސް މީހަކަށް އަނިޔާވިކަމުގެ ރިޕޯޓެއް އަދި ލިބިފައެއް ނުވޭ. ނިއުކްލިއާ ހަތިޔާރު އުފުލުމުގެ ގާބިލުކަން ލިބިފައިވާ މި ބިޔަ ބޯޓު ވެއްޓުނު ސަބަބު ދެނެގަތުމަށް ކަމާބެހޭ ފަރާތްތަކުން މިހާރު ދަނީ ހާދިސާ ހިނގި ސަރަހައްދުގައި ހަރަކާތްތެރިވަމުން. ބީ-52 މަރުކާގެ މި ބޯޓުތަކަކީ ދުރު ރާސްތާގެ ހަމަލާތަކުގައި އެމެރިކާގެ އަސްކަރިއްޔާއިން 1950 ގެ އަހަރުތަކުން ފެށިގެން ބޭނުންކުރަމުން އަންނަ މުހިންމު ވަސީލަތެއް.
މި ފޮޓޯއިން ފެންނަނީ އެމެރިކާގެ ވައިގެ ސިފައިންގެ ބީ-52 ސްޓްރެޓޯފޯޓްރެސް މަރުކާގެ ބަރު ބޮންއަޅާ ބޯޓަކުން ބޮން އަޅާ މަންޒަރު. | ގެޓީ އިމޭޖަސް
އެމެރިކާގެ ކެލިފޯނިއާގެ ދެކުނުގައި އޮންނަ އެޑްވާޑްސް އެއާފޯސް ބޭސް އިން ފުރިތާ ކުޑަވަގުތުކޮޅެއްގެ ތެރޭގައި، އެމެރިކާގެ ވައިގެ ސިފައިންގެ ބީ-52 ސްޓްރެޓޯފޯޓްރެސް މަރުކާގެ ބޮން އަޅާ ބޯޓެއް ވެއްޓިއްޖެ ކަމަށް އެ ބޭސް އިން ނެރުނު ބަޔާނެއްގައި ބުނެފިއެވެ.
މި ހާދިސާ ހިނގާފައިވަނީ އެ ގައުމުގެ ގަޑިން ހެނދުނު 11:20 (ޖީއެމްޓީން 19:20) ގައެވެ. ބޯޓު ވެއްޓުމާ ގުޅިގެން އެތައް މޭލަކަށް ފެންނަ ވަރަށް ކަޅު ދުންގަނޑެއް މައްޗަށް އަރާފައިވާއިރު، މި ހާދިސާގައި އެއްވެސް މީހަކަށް އަނިޔާވިކަމެއް އެއާފޯސް ބޭސް އިން ހާމަކޮށްފައެއް ނުވެއެވެ.
އެޑްވާޑްސް އެއާފޯސް ބޭސް އިން ބުނީ، ހާދިސާ ހިނގި ސަރަހައްދުގައި ކުއްލި ހާލަތްތަކުގައި ހަރަކާތްތެރިވާ ޓީމުތަކުން ވަގުތުން މަސައްކަތް ފަށާފައިވާ ކަމަށާއި، މިކަމާ ގުޅޭ އިތުރު ތަފްސީލު ލިބެމުންދާ ވަރަކަށް ހާމަކުރަމުންދާނެ ކަމަށެވެ.
ބޮއިންގް ކުންފުނިން އުފައްދާފައިވާ ބީ-52 ސްޓްރެޓޯފޯޓްރެސް މަރުކާގެ ބޯޓުތަކަކީ 1950 ގެ އަހަރުތަކުން ފެށިގެން އެމެރިކާގެ އަސްކަރިއްޔާއިން ބޭނުންކުރަމުން އަންނަ ބޯޓުތަކެކެވެ. މި ބޯޓަށް ކުރުކޮށް "ދަ ބަފް" (ބިގް އަގްލީ ފެޓް) ގެ ނަމުން ނިސްބަތްކުރެއެވެ.
ވައިގެ މަގުން ނަގާފައިވާ މަންޒަރުތަކުން ފެންނަ ގޮތުގައި، ބޯޓު ވެއްޓުނު ސަރަހައްދު އޮތީ އަނދައި ކަޅުވެ، ދުން އަރާ ހާލަތެއްގައެވެ.
ބީ-52 އަކީ ދުރު ރާސްތާއަށް ދަތުރުކުރުމުގެ ގާބިލުކަން ލިބިފައިވާ ސްޓްރެޓީޖިކް ބޮން އަޅާ ބޯޓެކެވެ. މި ބޯޓުތަކަކީ އެމެރިކާ އާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައިގައި އީރާނަށް ބޮން އެޅުމަށް ބޭނުންކުރަމުންދާ ބޯޓުތަކެކެވެ.
އާންމު ފަސިންޖަރުން އުފުލާ ބޯޓުތައް 35،000 ފޫޓު އުސްމިނުގައި ދަތުރުކުރާއިރު، މި ބޯޓަށް 50،000 ފޫޓު އުސްމިނުގައި ދަތުރުކުރުމުގެ ގާބިލުކަން ލިބިގެންވެއެވެ. ބިޔަ ބޮޑު މި ބޯޓަށް 70،000 ޕައުންޑުގެ ހަތިޔާރު އުފުލޭއިރު، އޭގެ ތެރޭގައި އާންމުކޮށް ބޭނުންކުރާ އެތައް ސަތޭކަ ބޮމަކާއި، ނިއުކްލިއާ ވޯހެޑް ހަރުކޮށްފައިވާ 32 ކްރޫޒް މިސައިލް ހިމެނެއެވެ.
މި ބޯޓަށް ވައިގެ ތެރޭގައި އޮވެގެން ތެޔޮ އެޅޭތީ، މެދުކެނޑުމެއް ނެތް ރާސްތާއެއްގައި ހަމަލާދިނުމުގެ ގާބިލުކަން ލިބިގެންވެއެވެ. މިއީ ފިނި ހަނގުރާމައިގެ ދުވަސްވަރު އެމެރިކާއަށް "ނިއުކްލިއާ އަމްބްރެއްލާ" ނުވަތަ ނިއުކްލިއާ ރައްކާތެރިކަން ފޯރުކޮށްދިނުމަށް ބޭނުންކުރި މުހިންމު ވަސީލަތެކެވެ.
މި ބޯޓުތަކުގައި އާންމުކޮށް ފަސް ފަޅުވެރިން ތިބެއެވެ. އެއީ އެއާކްރާފްޓް ކޮމާންޑަރަކާއި، ޕައިލެޓަކާއި، ރާޑާ ނެވިގޭޓަރަކާއި، ނެވިގޭޓަރެއްގެ އިތުރުން އިލެކްޓްރޯނިކް ވޯފެއާ އޮފިސަރެކެވެ.
