މަތިންދާ ބޯޓުގައި އަލިފާނުގެ ހާދިސާ ހިނގުމަށް އޮތް އެންމެ ބޮޑު ސަބަބުތަކުގެ ތެރޭގައި ޕަވަރ ބޭންކާއި ވޭޕް

އޭވިއޭޝަން ރެގިއުލޭޓަރުން ހާމަކުރާ ގޮތުގައި، ލިތިއަމް ބެޓެރީގެ ސަބަބުން ކުރިމަތިވެދާނެ އަލިފާނުގެ ހާދިސާތަކަކީ މިހާރު ބޯޓުފަހަރަށް އޮތް އެންމެ ބޮޑު ނުރައްކަލެވެ. މީގެ އިތުރުން، ފޮށިތަކުގެ ތެރެއިން މިފަދަ ތަކެތި ފެންނަ މިންވަރު އެއް އަހަރު ތެރޭގައި ވަނީ ދެގުނައަށް އިތުރުވެފައި ކަމަށް ރިޕޯޓުތައް ބުނެ އެވެ.

އިނގިރޭސިވިލާތުގެ ސިވިލް އޭވިއޭޝަން އޮތޯރިޓީ (ސީއޭއޭ) އިން ބުނާ ގޮތުގައި، މިހާރު އެވްރެޖްކޮށް ކޮންމެ ފަސިންޖަރަކުވެސް ދަތުރުމަތީގައި ލިތިއަމް ބެޓެރީ ބޭނުންކުރާ ހަތަރު ތަފާތު އާލާތް ގެންގުޅެއެވެ.

މަތިންދާބޯޓު ދަތުރުކުރާ މީހުން މިފަދަ އިލެކްޓްރޯނިކް ސާމާނު ފޮށްޓަށް ނުލައި، އަތްދަބަހުގައި ބޯޓުގެ ކެބިންއަށް ލުމަށް ކަމާބެހޭ ފަރާތްތަކުން ހަނދާންކޮށްދެއެވެ.

މި ބެޓެރީތަކަކީ ކުޑަ ޖާގައެއްގައި ގިނަ އަދަދަކަށް ހަކަތަ ރައްކާކުރެވޭ އެއްޗެހި ކަމުން، ލެޕްޓޮޕް، ވޭޕް، ޕަވަރ ބޭންކް، މޯބައިލް ފޯނު އަދި ސްމާޓް ވޮޗް ފަދަ ގިނަ އާލާތްތަކުގައި މިހާރު އާންމުކޮށް ބޭނުންކުރެވެއެވެ.

މިއީ ވަރަށް ބޭނުންތެރި އަދި ފަސޭހަ އެއްޗަކަށް ވީނަމަވެސް، ބެޓެރީ މާބޮޑަށް ހޫނުވުން ނުވަތަ އޭގައި އުނިކަމެއް ހުރުމުގެ ސަބަބުން އަލިފާން ރޯވެ، ވަރަށް ހަލުވިކަމާއެކު ފެތުރި، ކޮންޓްރޯލް ކުރަން އުނދަގޫ ހާލަތަކަށް ދެއެވެ.

2024 ވަނަ އަހަރު ޔޫކޭގެ ކަމާބެހޭ ފަރާތްތަކަށް ރިޕޯޓްކޮށްފައިވާ ގޮތުގައި، ބޯޓުގެ ޗެކް-އިން ފޮށިތަކުން ލިތިއަމް ބެޓެރީ ހުރި ތަކެތި ފެނިގެން 316 ހާދިސާއެއް ހިނގާފައިވެއެވެ. ނަމަވެސް 2025 ވަނަ އަހަރު މި އަދަދު ވަނީ 643 އަށް އިތުރުވެފައެވެ.

އާލާތްތައް މާބޮޑަށް ހޫނުވުން ނުވަތަ މައްސަލަ ޖެހިގެން ރިޕޯޓްކުރި އަދަދުވެސް އެ އަހަރު ވަނީ 123 އިން 206 އަށް، ގާތްގަނޑަކަށް ދެގުނަ އިތުރުވެފައެވެ.

މިފަދަ ގިނަ ހާދިސާތައް ހިނގަނީ ބޯޓުގެ ކެބިން ތެރޭގައި ކަމަށްވާތީ، ފްލައިޓް އެޓެންޑެންޓުންނަށް އެކަން ހައްލުކުރުމުގެ ފުރުސަތު އޮވެއެވެ. ނަމަވެސް ކަންބޮޑުވުމަކީ، ބޯޓުގެ އަޑީގައި ހުންނަ ފޮށިތަކުގެ ތެރޭގައި މިފަދަ ކަމެއް ހިނގައިފިނަމަ، އެކަން ކޮންޓްރޯލް ނުކުރެވޭ ވަރުވުމުގެ ކުރިން ނޭނގިދާނެތީއެވެ. ސީއޭއޭ އިން ހާމަކުރާ ގޮތުގައި މިހާރު ކޮންމެ ހަފުތާއަކުވެސް ލިތިއަމް ބެޓެރީއާ ގުޅުންހުރި ގާތްގަނޑަކަށް ދެ ހާދިސާ ހިނގައެވެ.

އަލިފާނުގެ ނުރައްކަލުގެ އިތުރުން، ބޯޓުގެ އަޑިން ފޮށިތައް ނަގަން ޖެހުމުގެ ސަބަބުން ދަތުރުތައް ލަސްވުމުގެ މައްސަލަވެސް ކުރިމަތިވެއެވެ.

ބައެއް ހާލަތްތަކުގައި ބޯޓުގެ މިސްރާބު ބަދަލުކޮށް އެހެން އެއާޕޯޓްތަކަށް ޖައްސަންވެސް ޖެހެއެވެ. މިދިޔަ މަހު އީޒީޖެޓްގެ ފްލައިޓެއް ރޯމަށް ޖައްސަން ޖެހުނީ، ބޯޓުގެ އަޑީގައި އޮތް ފޮށްޓެއްގައި ޕަވަރ ބޭންކެއް އޮތްކަން އެނގުމާ ގުޅިގެންނެވެ.

މީގެ އިތުރުން، މިދިޔަ އޮކްޓޯބަރު މަހު އެއާ ޗައިނާގެ ފްލައިޓެއްގެ ކަޅިވަތަކުން އަލިފާން ރޯވެ ފެތުރޭ މަންޒަރު ފެންނަ ވީޑިއޯއެއް އާންމުވެފައިވާއިރު، ރިޕޯޓްތައް ބުނާ ގޮތުގައި އެއީވެސް ލިތިއަމް ބެޓެރީއެއްގެ ސަބަބުން ދިމާވި ކަމެކެވެ.

'ބޮޑުވަމުންދާ ގޮންޖެހުމެއް'

ސީއޭއޭ އިން ގަބޫލުކުރާ ގޮތުގައި ގިނަ ފަސިންޖަރުންނަށް އަދިވެސް މި އުސޫލުތަކެއް ނޭނގެއެވެ. އެހެންކަމުން ފަސިންޖަރުންނަށް އަންނަނިވި ކަންކަން ހަނދާންކޮށްދެއެވެ:

• މޯބައިލް ފޯނު، ވޭޕް އަދި ޕަވަރ ބޭންކް ފަދަ ތަކެތި ބޯޓުގެ ކެބިންއަށް ގެންނަ އަތްދަބަހަށްލުން.

• ކޮންމެ ފަސިންޖަރަކަށް ގެންދެވޭނީ ގިނަވެގެން ދެ ޕަވަރ ބޭންކް ކަމަށާއި، ބޯޓު ތެރޭގައި އެ އެއްޗެހި ޗާޖުކުރުމަކީ މަނާކަމެއްކަން.

• ޗެކް-އިން ބަގޭޖަށް ލެޕްޓޮޕްލާނަމަ، އެ އެއްޗެހި އެއްކޮށް ނިއްވާލާފައި ބެހެއްޓުން.

އެއާލައިންސް ޔޫކޭގެ ޗީފް އެގްޒެކެޓިވް ޓިމް އެލްޑަސްލޭޑް ވިދާޅުވީ، މީހުން ބޭނުންކުރާ އިލެކްޓްރޯނިކް ސާމާނު އިތުރުވަމުންދާ ވަރަކަށް، ލިތިއަމް ބެޓެރީގެ ހާދިސާތަކަކީ "އިތުރުވަމުންދާ ގޮންޖެހުމެއް" ކަމަށެވެ.

އޭނާ އިތުރަށް ވިދާޅުވީ، ކޮންމެ ހާލަތަކާ ކުރިމަތިލުމަށް ޕައިލެޓުންނާއި ކެބިން ކުރޫން ތަމްރީނުވެފައި ތިބި ނަމަވެސް، އެންމެ ރަނގަޅު ގޮތަކީ ރައްކާތެރިކަމުގެ ފިޔަވަޅު އެޅުން ކަމަށެވެ. އަދި އެކަން ފެށެނީ ފަސިންޖަރުން ފޮށި ތައްޔާރުކުރާ ހިސާބުން ކަމަށްވެސް އޭނާ ފާހަގަކުރެއްވިއެވެ.

އިލެކްޓްރިކަލް ސޭފްޓީ ފަސްޓް ނަމަކަށް ކިޔާ ޗެރިޓީއެއްގެ ޕްރޮޑަކްޓް ސޭފްޓީ އިންޖިނިއަރެއް ކަމަށްވާ ޖިއުސެއްޕޭ ކަޕާނާ ބީބީސީ އަށް ވިދާޅުވީ، ލިތިއަމް ބެޓެރީގައި ގިނަ އަދަދަކަށް ހަކަތަ ހުންނަ ކަމަށާއި، މިއީ އާލާތްތައް ޗާޖުކުރުމަށް ވަރަށް ފަސޭހަ ކަމެއް ކަމަށެވެ.

ނަމަވެސް، މީގެ މާނައަކީ ކަމެއް ގޯސްވެއްޖެ ހާލަތެއްގައި، ނިއްވާލަން އުނދަގޫ "ނުރައްކާތެރި" އަލިފާނުގެ ހާދިސާއެއް ހިނގުން ކަމަށް އޭނާ ވިދާޅުވިއެވެ.

"މިފަދަ ތަކެތި ފޮށީގައި ބަންދުކޮށްފައި ހުންނައިރު، އެ އެއްޗެއްސާ ހަމައަށް ދެވޭނެ ގޮތެއް ނޯވޭ. އެހެންކަމުން ކަމެއް ގޯސްވެއްޖެނަމަ، ވަރަށް ނުރައްކާތެރި ނަތީޖާތަކެއް ނުކުމެދާނެ ފަދަ ބޮޑު އަލިފާނުގެ ހާދިސާއެއް ހިނގާފާނެ،" އޭނާ ވިދާޅުވިއެވެ.

މިފަދަ ބެޓެރީ ބޭނުންކުރާ ގިނަ އާލާތްތަކަކީ ރައްކާތެރި އެއްޗެހި ކަމަށް ވިޔަސް، ކަޕާނާ ވިދާޅުވީ އާންމުކޮށް މިފަދަ މައްސަލަތައް ދިމާވަނީ ތާޑް-ޕާޓީ ސެލަރުންގެ އަތުން ގަންނަ "ފެންވަރު ދަށް" އުފެއްދުންތަކުގެ ސަބަބުން ކަމަށެވެ.

އޭނާ އިތުރަށް ވިދާޅުވީ، މި ބާވަތުގެ އެއްޗެހި ގަންނަ އިރު އެއީ ރައްކާތެރިކަން ކަށަވަރުކޮށް ޓެސްޓްކޮށްފައިވާ ތަކެތިކަން ޔަގީންކުރުމަކީ ވަރަށް މުހިންމު ކަމެއް ކަމަށެވެ.