އިންޑިއާގެ އަސްކަރީ މަތިންދާބޯޓެއް ވެއްޓިއްޖެ
އިންޑިއާގެ ވައިގެ ސިފައިން ބޭނުންކުރާ "އޭއެން-32" މަރުކާގެ އަސްކަރީ މަތިންދާބޯޓެއް ޖޯރްހާޓް އެއާފޯސް ސްޓޭޝަނަށް ޖައްސަން އުޅުމުގެ ތެރޭގައި ވެއްޓި ބޮޑެތި ގެއްލުންތަކެއް ވެއްޖެ. މި ހާދިސާގައި އެއްވެސް މީހަކަށް އަނިޔާއެއް ލިބުނުކަން އަސްކަރިއްޔާއިން ހާމަކޮށްފައި ނުވާއިރު، ބޯޓު ވެއްޓުނު ސަބަބު ދެނެގަތުމަށްޓަކައި ޚާއްސަ ތަހުގީގެއް މިހާރު ވަނީ ފަށާފައި. ބޯޓު ވެއްޓުނު ސަރަހައްދުން ފެންނަ މަންޒަރުތަކުން ބޯޓު އޮތީ ބައިބަޔަށް ބިންދައިގެން ގޮސް އަލިފާން ރޯވެފައި.
އިންޑިއާގެ އާސާމްގެ ޖޯރްހާޓަށް، 2006 ވަނަ އަހަރުގެ ޖޫން މަހުގެ 13 ވަނަ ދުވަހު އަސްކަރީ މުދާ އުފުލާ ބޯޓެއް ވެއްޓިފައި. | އެކްސް
އިންޑިއާގެ އިރުއުތުރުގެ ދުރު ސަރަހައްދެއްގައި ހުންނަ އެއާފޯސް ސްޓޭޝަނަކަށް ޖައްސަން އުޅުމުގެ ތެރޭގައި، ރަޝިއާގައި އުފައްދާފައިވާ އެ ގައުމުގެ އަސްކަރީ މަތިންދާބޯޓެއް ހޮނިހިރު ދުވަހު ވެއްޓިއްޖެ ކަމަށް އިންޑިއާގެ އަސްކަރިއްޔާއިން ނެރުނު ބަޔާނެއްގައި ބުނެފިއެވެ.
އިންޑިއާގެ ވައިގެ ސިފައިން (އައި.އޭ.އެފް) ނެރުނު ބަޔާނުގައި ބުނެފައިވަނީ، އެ ފައުޖުގެ "އޭއެން-32" މަރުކާގެ މަތިންދާބޯޓަށް ހާދިސާއެއް ކުރިމަތިވީ ޖޯރްހާޓް އެއާފޯސް ސްޓޭޝަނަށް ޖައްސަން އުޅުމުގެ ތެރޭގައި ކަމަށެވެ. މި ހާދިސާގައި މީހަކަށް ގެއްލުމެއް ލިބުނުކަމުގެ އެއްވެސް ތަފްސީލެއް އަސްކަރިއްޔާއިން ހާމަކޮށްފައި ނުވާއިރު، ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ތަހުގީގު ކުރާ ކޯޓެއް (ކޯޓް އޮފް އިންކުއަރީ) އެކުލަވާލަމުންދާ ކަމަށްވެސް އެ ބަޔާނުގައިވެއެވެ.
އިންޑިއާގެ ޚަބަރު ފަތުރާ ވަސީލަތެއް ކަމަށްވާ އެން.ޑީ.ޓީ.ވީ އިން ވަނީ ބޯޓު ވެއްޓުނު ސަރަހައްދުގެ މަންޒަރުތައް ދައްކާފައެވެ. އެ ވީޑިއޯތަކުން ފެންނަ ގޮތުގައި ބޯޓު އޮތީ އެކި ބައިބަޔަށް ބިންދައިގެން ގޮސްފައި ކަމަށްވާއިރު، އެ ސަރަހައްދުން ކަޅު ދުންތައް އަރަމުންދާ މަންޒަރުވެސް ފެނެއެވެ.
