ޗައިނާގައި މިނިވޭން އަކާއި ލޮރީއެއް ޖެހި 13 މީހުން މަރުވެއްޖެ
ޗައިނާގެ ހުނާން ޕްރޮވިންސްގެ އެކްސްޕްރެސްވޭއެއްގައި 9 މީހުންގެ ޖާގަ އޮންނަ މިނީވޭނެއްގައި 16 މީހުން އުފުލަނިކޮށް، ލޮރީއެއްގެ ފަހަތުގައި ޖެހި ހިނގި މި އެކްސިޑެންޓް ތަހުގީގު ކުރުމަށް ޚާއްސަ ވޯކިން ގްރޫޕެއް މިހާރު ވަނީ އެ ސަރަހައްދަށް ފޮނުވާފައި. މި ހާދިސާއާ ގުޅިގެން ކަމާބެހޭ އިދާރާތަކުން ބުނެފައިވަނީ، މިއީ ގަވާއިދާ ޚިލާފަށް މީހުން އުފުލުމާއި ސަލާމަތީ މިންގަނޑުތަކަށް ފަރުވާކުޑަކުރުމުގެ ސަބަބުން ހިނގި ހިތާމަވެރި ހާދިސާއެއް ކަމަށެވެ. ޗައިނާގެ މިނިސްޓްރީ އޮފް ޕަބްލިކް ސެކިއުރިޓީން މި މައްސަލަ ވަރަށް ސީރިއަސްކޮށް ބަލަމުންދާއިރު، މިއީ އެ ގައުމުގެ މަގުމަތީގައި އާންމުކޮށް ދިމާވާ ނުރައްކާތެރި ހާދިސާތަކުގެ ތެރެއިން ހާދިސާއެއް.
ޗައިނާގެ ހުނާން ޕްރޮވިންސްގެ ލިއުޔަންގްގައި ހުންނަ ފަޓާސް އުފައްދާ ކާރުޚާނާއެއްގައި 2026 ވަނަ އަހަރުގެ މެއި މަހުގެ 6 ވަނަ ދުވަހު ހިނގި ގޮވުމުގެ ހާދިސާއާ ގުޅިގެން، އެ ސަރަހައްދުގައި ހަރަކާތްތެރިވާ އެމްބިއުލާންސްތަކުގެ ކައިރިއަށް މީހުން އެއްވެފައި. | ރޮއިޓާސް
ޗައިނާގެ މެދުތެރޭގެ ސަރަހައްދެއްގައި، އޭގެ ކެޕޭސިޓީއަށްވުރެ އިތުރަށް މީހުން އުފުލި މިނީވޭނެއް ލޮރީއެއްގައި ޖެހި ބުރާސްފަތި ދުވަހު ހިނގި ނުރައްކާތެރި އެކްސިޑެންޓެއްގައި 13 މީހުން މަރުވެ، ތިން މީހަކަށް އަނިޔާވެއްޖެ ކަމަށް އެ ގައުމުގެ ޓްރެފިކް ފުލުހުން ބުނެފިއެވެ.
ޗައިނާގެ މިނިސްޓްރީ އޮފް ޕަބްލިކް ސެކިއުރިޓީގެ ޓްރެފިކް މެނޭޖްމަންޓް ބިއުރޯއިން ސޯޝަލް މީޑިއާގައި ހާމަކޮށްފައިވާ ގޮތުގައި، ގިނަވެގެން ނުވަ މީހުންގެ ޖާގަ އޮންނަ މި ވޭނުގައި އެކްސިޑެންޓް ހިނގިއިރު 16 މީހުން ތިއްބެވެ. މި ހާދިސާ ހިނގާފައިވަނީ ހުނާން ޕްރޮވިންސްގެ އެކްސްޕްރެސްވޭއެއްގައި ބުރާސްފަތި ދުވަހުގެ ފަތިހު 2:40 ގައެވެ.
މި ހާދިސާއާ ގުޅޭގޮތުން އެ ބިއުރޯއިން "ވޭބޯ" ސޯޝަލް މީޑިއާ ޕްލެޓްފޯމުގައި ބުނެފައިވަނީ، ނަންޔަންގް ސިޓީގެ ޖީ40 އެކްސްޕްރެސްވޭއިން ދަތުރުކުރަމުންދިޔަ މި ވޭން އެކްސިޑެންޓްވީ، ކުރިއަށް ދަތުރުކުރަމުންދިޔަ ސެމީ ޓްރެއިލާ ލޮރީއެއްގެ ފަހަތުގައި ޖެހިގެން ކަމަށެވެ.
ޗައިނާގެ މިނިސްޓްރީން ބުނީ މި ހާދިސާއަށް ވަރަށް ބޮޑު ސަމާލުކަމެއް ދީފައިވާ ކަމަށާއި، އެކްސިޑެންޓް ހިނގަން މެދުވެރިވި ސަބަބު ތަހުގީގުކުރުމަށާއި ކަންކަން ބެލެހެއްޓުމަށްޓަކައި ޓްރެފިކް މެނޭޖްމަންޓް ބިއުރޯގެ އިސް އޮފިޝަލަކު އިސްކޮށް ހުންނަވާ ވޯކިން ގްރޫޕެއް ވަގުތުން ނަންޔަންގަށް ފޮނުވާފައިވާ ކަމަށެވެ.
ޗައިނާގައި ސަލާމަތީ މިންގަނޑުތަކަށް ފަރުވާކުޑަކުރުމާއި، ދުއްވުމުގެ ގަވާއިދުތަކަށް އަމަލުނުކުރުމުގެ ސަބަބުން މިފަދަ ނުރައްކާތެރި މަގުމަތީ އެކްސިޑެންޓްތައް ހިނގުމަކީ އާންމު ކަމެކެވެ.
