ޓެކްސަސްގެ ހައިވޭ އަކަށް މަތިންދާ ބޯޓެއް ވެއްޓިއްޖެ
ޓެކްސަސްގެ ހައިވޭއަކަށް ކުޑަ ޖެޓެއް ވެއްޓި އަލިފާން ރޯވުމާ ގުޅިގެން، އޭގައި ތިބި މީހުން ސަލާމަތްކުރުމަށް އާންމުންނާއި ކަމާބެހޭ ފަރާތްތަކުން ބޮޑެތި މަސައްކަތްތަކެއް ކޮށްފި. މި ހާދިސާގައި އެކަކު މަރުވެފައިވާއިރު، ބޯޓުން ދަތުރުކުރި ފަސް މީހަކަށް ދަނީ ހޮސްޕިޓަލުގައި ފަރުވާދެމުން. ބޯޓު ވެއްޓުނު ސަރަހައްދުގެ މަގުތައް ބަންދުކޮށްފައިވާއިރު، މަރުވި މީހާއަކީ ބޯޓުން ދަތުރުކުރި މީހެއްކަން ނުވަތަ ނޫންކަން ކަމާބެހޭ އިދާރާތަކުން އަދި ކަށަވަރުކޮށްދީފައެއް ނުވޭ.
ޓެކްސަސްގެ ހައިވޭއަކަށް ކުޑަ ބޯޓެއް ވެއްޓި، އޭގައި އަލިފާން ރޯވެފައި. | އެކްސް
އަންގާރަ ދުވަހުގެ ރޭގެ ވަގުތެއްގައި ހަ މީހުންނާއެކު ދަތުރުކުރި އަމިއްލަ ކުޑަ ބޯޓެއް އެމެރިކާގެ ޓެކްސަސްގެ ހައިވޭއަކަށް ވެއްޓި ހިނގި ހާދިސާގައި އެކަކު މަރުވެ، ބޯޓުން ދަތުރުކުރި އަނެއް ފަސް މީހުންނަށް ހޮސްޕިޓަލުގައި ފަރުވާދޭން ފަށައިފިއެވެ.
ވިޔަފާރި ދަތުރުތަކުގައި ބޭނުންކުރާ މި ޖެޓް ޓެކްސަސްގެ ހައިވޭއަށް ވެއްޓި، ބޯޓުގައި އަލިފާން ރޯވުމާ ގުޅިގެން، އޭގައި ތިބި މީހުން ސަލާމަތްކުރުމަށް ކުއްލި ނުރައްކަލުގެ ހާލަތުގައި ގިނަ މަސައްކަތްތަކެއް ވަނީ ކޮށްފައެވެ.
ހައިވޭގައި ބޯޓު އޮތް މަންޒަރު ފެންނަ ވީޑިއޯތަކުން ފެންނަ ގޮތުގައި، އަލިފާން ރޯވެފައިވާ ބޯޓުގެ ކޮކްޕިޓް ކުޑަދޮރުތައް ތަޅާލައި، އޭގެ ތެރޭގައި ތިބި މީހުން ސަލާމަތްކުރުމަށް ސަލާމަތީ ޚިދުމަތްތަކުގެ މީހުންނާއި އާންމުން ދިޔައީ މަސައްކަތް ކުރަމުންނެވެ.
ކަމާބެހޭ އިދާރާތަކުން ބުނާގޮތުގައި ބޯޓު ވެއްޓުނުއިރު އޭގައި ހަ މީހުން ތިއްބެވެ. މި ހާދިސާގައި އެކަކު މަރުވެފައިވީ ނަމަވެސް، އެއީ ބޯޓުން ދަތުރުކުރި މީހެއްކަން ނުވަތަ ބޯޓު ވެއްޓުނު ވަގުތު ބިމުގައި ހުރި މީހެއްކަން ކަމާބެހޭ ފަރާތްތަކުން އަދި ސާފުކޮށްދީފައެއް ނުވެއެވެ.
