އެމެރިކާގައި ޗައިނާގެ ސިއްރު ޕޮލިސް ސްޓޭޝަނެއް ހިންގި މީހަކު ކުށްވެރި ވެއްޖެ

އެމެރިކާގެ ނިއު ޔޯކް ސިޓީގައި ޗައިނާ ސަރުކާރުގެ ސިއްރު ޕޮލިސް ސްޓޭޝަނެއް ގާއިމުކޮށް، ގަވާއިދާ ހިލާފަށް ހިންގި މައްސަލައިގައި ހައްޔަރު ކުރި މީހާގެ މައްޗަށް ކުށް ސާބިތު ވެއްޖެ އެވެ.

ނިއު ޔޯކްގެ ބްރުކްލިން ފެޑެރަލް ކޯޓުގައި ކުރިއަށް ދިޔަ ހަތް ދުވަހުގެ ޝަރީއަތަށް ފަހު، ކުށް ސާބިތު ވެފައި ވަނީ އުމުރުން 64 އަހަރުގެ ލޫ ޖިއަންވޭންގްގެ މައްޗަށެވެ. އޭނާ އަކީ އެމެރިކާގެ ރައްޔިތެއް ނަމަވެސް، ޗައިނާ ސަރުކާރުގެ ނުފޫޒު ގަދަ މިނިސްޓްރީ އޮފް ޕަބްލިކް ސެކިއުރިޓީ އަށް ސިއްރިއްޔާތުގައި މަސައްކަތް ކޮށްދެމުން ދިޔަ އެޖެންޓެއް ކަމަށް އެމެރިކާ އިން ތުހުމަތު ކުރެ އެވެ.

ޕްރޮސެކިއުޓަރުން ހާމަކުރި ގޮތުގައި، ލޫ ވަނީ ނިއު ޔޯކްގެ ޗައިނާޓައުން ސަރަހައްދުގައި ހުރި އާދައިގެ އޮފީސް އިމާރާތެއްގެ ތެރޭގައި ސިއްރު "ފުލުސް" މަރުކަޒެއް ހިންގާފަ އެވެ. މި މަރުކަޒުގެ ބޭނުމަކީ އެމެރިކާގައި ދިރިއުޅޭ، ޗައިނާގެ ކޮމިއުނިސްޓް ޕާޓީއާ ދެކޮޅަށް ވާހަކަ ދައްކާ ޑިމޮކްރަސީ އަށް ވަކާލާތު ކުރާ އެކްޓިވިސްޓުން ހޯދައި، އެމީހުންނަށް ބިރު ދައްކައި ނުފޫޒު ފޯރުވުމެވެ.

މީގެ އިތުރުން، އޭނާ ވަނީ އެފްބީއައި އިން މި މައްސަލަ ތަހުގީގު ކުރަން ފެށުމުން، ޗައިނާގެ އޮފިޝަލުންނާ އެކު ކުރި މެސެޖުތައް ފޯނުން ފޮހެލައި، ހެކި ނައްތާލަން މަސައްކަތް ކޮށްފަ އެވެ.

މި މައްސަލައިގައި ލޫއާ އެކު ދެން ހައްޔަރު ކުރި ޗެން ޖިންޕިންގް ނަމަކަށް ކިޔާ މީހަކު ވަނީ މީގެ ކުރިން ކުށަށް އިއުތިރާފު ވެފައި އެވެ.

ޝަރީއަތުގައި ލޫގެ ވަކީލުން ބުނެފައި ވަނީ، އެއީ ޕޮލިސް ސްޓޭޝަނެއް ނޫން ކަމަށާއި، ކޮވިޑް-19 ގެ ދުވަސްވަރު ޗައިނާ އަށް ދަތުރު ނުކުރެވިފައި ތިބި މީހުންނަށް ލައިސަންސް އައު ކޮށްދިނުން ފަދަ އިދާރީ ކަންކަމުގައި އެހީތެރި ވުމަށް ހިންގި ކޮމިއުނިޓީ ސެންޓަރެއް ކަމަށެވެ. ނަމަވެސް ޗައިނާގެ އަމުރަށް އެމެރިކާގެ ފަސްގަނޑުގައި ބޭރު ގައުމެއްގެ އެޖެންޓެއްގެ ގޮތުގައި މަސައްކަތް ކުރުމާއި، އަދުލު އިންސާފަށް ހުރަސް އެޅުމުގެ ކުށް އޭނާގެ މައްޗަށް ވަނީ ސާބިތު ވެފައި އެވެ.

މި ކުށްތަކުގެ އަދަބެއްގެ ގޮތުން ލޫ ޖިއަންވޭންގްގެ މައްޗަށް 30 އަހަރާ ހަމައަށް ޖަލު ހުކުމެއް އައުން އެކަށީގެންވެ އެވެ.

ޗައިނާ ސަރުކާރުން ބޭރު ގައުމު ތަކުގައި މިފަދަ 100 އަށްވުރެ ގިނަ ސިއްރު ޕޮލިސް ސްޓޭޝަން ހިންގަމުންދާ ކަމަށް އިންސާނީ ހައްގު ތަކަށް މަސައްކަތް ކުރާ ޖަމާއަތް ތަކުން ތުހުމަތު ކުރެ އެވެ. ނަމަވެސް ޗައިނާ އިން އަދި ވެސް ބުނަމުން ދަނީ މިއީ ހަމައެކަނި އާންމުންނަށް ހިދުމަތްދޭ މަރުކަޒު ތަކެއް ކަމަށާއި، އެމެރިކާ އިން ކުރަނީ ސިޔާސީ ދޮގު ތުހުމަތު ތަކެއް ކަމަށެވެ.