ތެޔޮ އުފެއްދުމުގެ މިންވަރު އިތުރު ކޮށްދިނުމަށް އިރާޤުން އޯޕެކްގައި އެދިއްޖެ

އެމެރިކާ އިން އީރާާންއާ ދެކޮޅަށް ކުރި ހަނގުރާމައިގެ ސަބަބުން އިރާޤުގެ ތެލުގެ ސިނާއަތަށް ލިބުނު ގެއްލުން ތަކުގެ ސަބަބުން، އެ ޤައުމުގެ ތެޔޮ އުފެއްދުމުގެ މިންވަރު އިތުރު ކޮށްދިނުމުގެ ހުއްދަ އަށް އޯޕެކްގައި އެދިއްޖެ އެވެ. 

އިރާޤުން އޯޕެކްގައި މިހެން އެދިފައި ވަނީ ބުރާސްފަތި ދުވަހު އެވެ. އެކަން ހާމަ ކޮށްފައި ވަނީ އިރާޤުގެ ތެލާ ބެހޭ ވުޒާރާ އިންނެވެ. 

އޯޕެކްގެ ފައުންޑިން މެމްބަރެއްގެ ގޮތުގައި ހިމެނޭ އިރާޤަކީ، ތެޔޮ އުފައްދާ އެހެން ޤައުމު ތަކެކޭ އެއްފަދައިން، ހަނގުރާމައިގެ ސަބަބުން ބޮޑެތި އަސަރު ތަކެއް ކޮށްފައިވާ ޤައުމެކެވެ. އިރާޤުގެ ބަޖެޓުގެ ތިން ބައި ކުޅަ ދެ ބައި އެއީ ތެލުން ހޯދާ އާމްދަނީ އެވެ. 

އިރާޤުގެ ތެލާ ބެހޭ ވުޒާރާ އިން ބުނީ، އެ ޤައުމުން މެމްބަރު ޤައުމު ތަކުގެ ދެމެހެއްޓެނިވި ތެލުގެ ކެޕޭސިޓީއާ އެއްގޮތަށް ތެޔޮ އުފެއްދުމުގެ މިންގަނޑުތައް އަލުން ބަަލައި، އެކަށައަޅަން ޖެހޭ ކަމުގެ މުހިންމުކަން ދާއިމީ ގޮތެއްގައި ފާހަގަ ކޮށްފައިވާ ކަމަށެވެ. އަދި މިފަދައިން އެދިފައި ވަނީ އިރާޤުގެ ޚާއްސަ ސަލަމާތީ އަދި އިޤްތިޞާދީ ޙާލަތް ތަކަށް ރިއާޔަތްކޮށް ކަމަށް ވެސް ބުނެފައިވެ އެވެ. 

މީގެ އިތުރުން އެ ވުޒާރާ އިން ބުނެފައި ވަނީ މެމްބަރު ޤައުމު ތަކުގެ ކެޕޭސިޓީ އަލުން ބެލުމުގެ ޕްރޮސެސް އޯޕެކް އިން ފަށާފައިވާ ކަމަށެވެ. ބުރާސްފަތި ދުވަހު ބައެއް މީޑިއާ ތަކުގައި ބުނެފައި ވަނީ، އޯޕެކް އިން ވަކިވުމަށް އިރާޤުން ވިސްނަމުން ގެންދާ ކަމަށެވެ. ނަމަވެސް، ތެލާ ބެހޭ ވުޒާރާގެ ތަރުޖަމާނު ސަލީމް އަލް ރިކާބީ އޭއެފްޕީ އަށް ވިދާޅުވީ، އެ ޖަމިއްޔާ އިން ވަކިވުމުގެ އެއްވެސް ވިސްނުމެއް އަދި ޚިޔާލެއް އިރާޤުން ނުގެންގުޅޭ ކަމަށެވެ. 

ނަމަވެސް އޭނާ ވިދާޅުވެފައި ވަނީ، އިރާޤުން ތެޔޮ އުފެއްދުމުގެ މިންވަރު އިތުރު ކުރުމުގެ ހުއްދަ އޯޕެކް އިން ދޭން ޖެހޭ ކަމަށެވެ. އެހެން ނޫން ނަމަ، އޯޕެކް އިން ވަކިވާނީތޯ ނުވަތަ އޯޕެކްގައި ދެމި އޮންނާނީތޯ އިރާޤުން ބަލާނެ ކަމަށް ވެސް އޭނާ ވިދާޅުވި އެވެ. 

އިރާޤަކީ އޮޕެކްގެ މުހިންމު މެންބަރެއް ކަމަށްވާއިރު، އެ ޤައުމުން ތެޔޮ އުފެއްދުމުގެ ހައްދު އިތުރު ކުރުމަށް ކުރަމުންދާ މަސައްކަތަކީ އެ ޤައުމުގެ އިގްތިސާދު ހަރުދަނާ ކުރުމަށް ކުރާ މަސައްކަތުގެ ބައެއްގެ ގޮތުގައި ފާހަގަ ކުރެވެ އެވެ.