ވިނީޝިއުސްގެ ދެ ލަނޑާ އެކު މޮޅުވެ، އެއް ވަނައިގައި ބްރެޒިލް އަނެއް ބުރަށް

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު ސީގެ ފަހު މެޗުގައި ސްކޮޓްލެންޑާ ދެކޮޅަށް ކުޅުނު މެޗުން މޮޅުވެ، އެއް ވަނައިގައި ބްރެޒިލް އިން މުބާރާތުގެ ދެ ވަނަ ބުރުގެ ޖާގަ ހޯދައިފި އެވެ.

ބުދަ ދުވަހުގެ ރޭ ފަތިހު ކުޅުނު މެޗު ބްރެޒިލް އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ބްރެޒިލް އިން ދެ ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގައި އެވެ.

މެޗު ފަށައިގެން ހަތް ވަނަ މިނެޓުގައި ބްރެޒިލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ބްރެޒިލް އަށް ޖަަހައިދިނީ ވިނީޝިއުސް ޖޫނިއާ އެވެ. އޭގެ ފަހުން މެޗުގެ 22 ވަނަ މިނެޓުގައި ވިނީޝިއުސް ދެ ވަނަ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަަލައި ނުގަންނަން ނިންމައިފަ އެވެ.

ނަމަވެސް، މެޗުގެ ފުރަތަމަ ހާފުގެ އިތުރު ވަގުތުގައި ވިނީޝިއުސް ވަނީ ބްރެޒިލްގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. މެޗުގެ ދެ ވަނަ ހާފުގެ 60 ވަނަ މިނެޓުގައި ބްރެޒިލްގެ ތިން ވަނަ ލަނޑު ޖެހީ މަޓެއުސް ކޫންޏާ އެވެ. އެއީ ބްރޫނޯ ގިމާރޭސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މޮޅާ އެކު ބްރެޒިލް އިން މުބާރާތުގެ ދެ ވަނަ ބުރުން ޖާގަ ހޯދީ މި ގުރޫޕުގެ އެއް ވަަނައިގައި އެވެ. އެއީ ތިން މެޗުން ހަތް ޕޮއިންޓާ އެކު އެވެ. ދެ ވަނައިގައި އޮތް މޮރޮކޯ އަށް ވެސް ހަތް ޕޮއިންޓު ލިބޭއިރު، ބްރެޒިލް ކުރި ހޯދަނީ ލަނޑުގެ ތަފާތުންނެވެ. 

ބްރެޒިލް އަތުން ބަލިވި ސްކޮޓްލެންޑަށް ތިން ވަނަ ލިބުނުއިރު، ތިން ވަނަ އަށް ދާ ޓީމު ތަކުގެ ތެރެއިން އެންމެ ރަނގަޅު ނަތީޖާ ނެރޭ ޓީމު ތަކުގެ ތެރޭގައި ހިމެނިގެން ދެ ވަނަ ބުރަށް ދިޔުމުގެ ފުރުސަތު އެ ޓީމަށް އެބަ އޮތެވެ.