ފަހަތުން އަަރައި ހައިޓީ ބަލިކޮށް، މޮރޮކޯ ދެ ވަނަ ބުރަށް

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު ސީގައި ހައިޓީއާ ދެކޮޅަށް ކުޅުނު މެޗުން މޮޅުވެ، މޮރޮކޯ އިން މުބާރާތުގެ ދެ ވަނަ ބުރުން ޖާގަ ހޯދައިފި އެވެ.

ބުދަ ދުވަހުގެ ރޭ ފަތިހު ކުޅުނު މެެޗު މޮރޮކޯ އިން ކާމިޔާބު ކުރީ 4-2 އިންނެވެ. މެޗުގައި ހައިޓީ އިން ދެ ފަހަރެއްގެ މަތިން ލީޑު ނެގިއިރު، މޮރޮކޯ އިން ވަނީ ފަހަތުން އަރައި މޮޅުވެފައި އެވެ.

މެޗު ފަށައިގެން 10 ވަނަ މިނެޓުގައި ހައިޓީ އަށް ލީޑު ލިބުނީ މޮރޮކޯގެ ގޯލު ކީޕަރު ޔާސީން ބޯނޯ އަތުން ބައި ކޮޅަށް ވަތް ލަނޑުންނެވެ. ނަމަވެސް، މެޗުގެ 39 ވަނަ މިނެޓުގައި އަޝްރަފް ހަކީމީ ވަނީ ލަނޑު ޖަހައި މޮރޮކޯ އަށް ނަތީޖާ ހަމަހަމަ ކޮށްދީފައި އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ދެ ވަނަ ފަހަރަށް ހައިޓީ އަށް ލީޑު ނަގައިދިނީ ވިލްސަން އިސީޑޯ އެވެ. ނަމަވެސް ފުރަތަމަ ހާފުގެ އިތުރު ވަގުތުގައި އިސްމާއިލް ސައިބާރީ ވަނީ މޮރޮކޯ އަށް ދެ ވަނަ ފަހަރަށް ނަތީޖާ ހަމަހަމަ ކޮށްދީފައި އެވެ.

މެޗުގައި މޮރޮކޯ އިން ފުރަތަމަ ފަހަރަށް ލީޑު ނެގީ 78 ވަނަ މިނެޓުގައި ސޯފިއަން ރަހީމީ ޖެހި ލަނޑުންނެވެ. އޭގެ ފަހުން މެޗުގެ 89 ވަނަ މިނެޓުގައި މޮރޮކޯގެ ހަތަރު ވަނަ ލަނޑު ޖެހީ ގާސިމް ޔަސީން އެވެ. 

މޮޅާ އެކު މޮރޮކޯ އިން މުބާރާތުގެ ދެ ވަނަ ބުރުގެ ޖާގަ ހޯދީ މި ގުރޫޕުގެ ދެ ވަނައިގައި އެވެ. އެއީ އެ ޓީމު ކުޅެފައިވާ ތިން މެޗުން ހަތް ޕޮއިންޓާ އެކު އެވެ.