ފަހު މެޗުގައި ބޮސްނިއާ އިން ޤަތަރު ބަލިކޮށްފި
25 ޖޫން 2026 | ބުރާސްފަތި 01:36މޮޅާ އެކު ބޮސްނިއާ އޮތީ މި ގުރޫޕުގެ ތިން ވަނައިގަ އެވެ. އެއީ އެ ޓީމު ކުޅެފައިވާ ތިން މެޗުން ހަތަރު ޕޮއިންޓާ އެކު. މިއާ އެކު، މުބާރާތުގެ އެންމެ ރަނގަޅު ނަތީޖާ ހޯދާ ތިން ވަނަ ޓީމު ތަކުގެ ތެރޭގައި ހިމެނިގެން، އަނެއް ބުރުން ޖާގަ ހޯދުމުގެ ފުރުސަތު ބޮސްނިއާ އަށް އެބަ އޮތް.
މެޗުގައި ލަނޑު ޖެހުމަށް ފަހު ބޮސްނިއާގެ ކުޅުންތެރިން އުފާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު ބީގައި ޤަތަރާ ދެކޮޅަށް ކުޅުނު މެޗުން ބޮސްނިއާ މޮޅުވެއްޖެ އެވެ.
ބުދަ ދުވަހުގެ ރޭ ދަންވަރު ކުޅުނު މެޗު ބޮސްނިއާ އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ބޮސްނިއާ އިން ދެ ލަނޑު ޖެހިއިރު، ޤަތަރުން ވެސް ލަނޑެއް ޖެހި އެވެ. އަނެއް ލަނޑު ބޮސްނިއާ އިން ޖެހީ ދެ ވަނަ ހާފުގައި އެވެ.
މެޗުގެ ފުރަތަމަ ހާފުގެ 29 ވަނަ މިނެޓުގައި ބޮސްނިއާ އިން ލަނޑު ޖަހައި ލީޑު ނެގި އެވެ. އެއީ ކެރިމް އަލަޖްބެގޮވިޗް ޖެހި ލަނޑުންނެވެ. އޭގެ ފަހުން ފުރަތަމަ ހާފުގެ 34 ވަނަ މިނެޓުގައި ބޮސްނިއާގެ ދެ ވަނަ ލަނޑަކީ ޤަތަރުގެ ސުލްޓާން އަލް ބްރޭކް އަތުން ބައި ކޮޅަށް ވަތް ލަނޑެކެވެ.
މެޗުގެ ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް، ޤަތަރުގެ ހަމައެކަނި ލަނޑު ޖެހީ ކެޕްޓަން ހަސަން އަލް ހައިޑޯސް އެވެ. މެޗުގެ ދެ ވަނަ ހާފު ފަށައިގެން ބޮސްނިއާ އިން އިތުރު ލަނޑެއް ޖެހުމަށް ކުރި މަސައްކަތުގެ ތެރެއިން، 80 ވަނަ މިނެޓުގައި އާމިން މަމިޗް ވަނީ އެ ޓީމުގެ ތިން ވަނަ ލަނޑު ޖަހައިފަ އެވެ.
މޮޅާ އެކު ބޮސްނިއާ އޮތީ މި ގުރޫޕުގެ ތިން ވަނައިގަ އެވެ. އެއީ އެ ޓީމު ކުޅެފައިވާ ތިން މެޗުން ހަތަރު ޕޮއިންޓާ އެކު އެވެ. މިއާ އެކު، މުބާރާތުގެ އެންމެ ރަނގަޅު ނަތީޖާ ހޯދާ ތިން ވަނަ ޓީމު ތަކުގެ ތެރޭގައި ހިމެނިގެން، އަނެއް ބުރުން ޖާގަ ހޯދުމުގެ ފުރުސަތު ބޮސްނިއާ އަށް އެބަ އޮތެވެ.
