މެސީ އަކީ ހުރިހާ ޒަމާނެއްގައި ވެސް އުފެދުނު އެންމެ މޮޅު ކުޅުންތެރިޔާ: ކްލޯސާ

އާޖެންޓީނާގެ ކެޕްޓަން ލިއޮނަލް މެސީ އަކީ ހުރިހާ ޒަމާނެއްގައި ވެސް އުފެދުނު އެންމެ މޮޅު ކުޅުންތެރިޔާ ކަމަށް، ޖަރުމަނުގެ ލެޖެންޑް މިރޮސްލާވް ކްލޯސާ ބުނެފި އެވެ.

ކްލޯސާ މިހެން ބުނެފައި ވަނީ ފީފާ ވޯލްޑް ކަޕްގައި އޭނާ ޤާއިމު ކޮށްފައިވާ ރެކޯޑު މެސީ މުގުރާލުމާ ގުޅިގެންނެވެ. މިފަހަރުގެ ވޯލްޑް ކަޕާ ކުރިމަތިލި އިރު، 16 ލަނޑު ޖަހައިގެން ވޯލްޑް ކަޕްގެ އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު އޮތީ ކްލޯސާ އަތުގަ އެވެ. 

ނަމަވެސް، މުބާރާތުގައި އާޖެންޓީނާ އިން އަލްޖީރިއާ އާ ދެކޮޅަށް ކުޅުނު މެޗުގައި މެސީ ވަނީ އެ ރެކޯޑާއި އަރާ ހަމަ ކޮށްފަ އެވެ. އަދި ގުރޫޕުގައި ކުޅުނު ދެވަނަ މެޗުގައި އޮސްޓްރިއާ އާ ދެކޮޅަށް ކުޅެ ލަނޑު ޖަހައިގެން ވަނީ އެ ރެކޯޑު މުގުރާލައިފަ އެވެ. މެސީ ވަނީ މިހާތަނަށް ވޯލްޑް ކަޕްގައި 18 ލަނޑު ޖަހައިފަ އެވެ.

މެސީގެ ކާމިޔާބަށް މަރުޙަބާ ކިޔަމުން ކްލޯސާ ބުނެފައި ވަނީ، މެސީ އަކީ އާދައިގެ ކުޅުންތެރިޔެއް ނޫން ކަމަށް އޭނާ އަބަދު ވެސް ބުނަމުން އަންނަ ކަމަށެވެ. އަދި އޭނާގެ ނަޒަރުގައި މެސީ އަކީ ހުރިހާ ޒަމާނެއްގައި ވެސް އުފެދުނު އެންމެ މޮޅު ކުޅުންތެރިޔާ ކަމަށް ކްލޯސާ ބުންޏެވެ. 

މުބާރާތުގެ ކުރިން ކްލޯސާ ބުނެފައި ވަނީ އޭނާގެ ރެކޯޑު މުގުރާލާނެކަން އިނގޭ ކަމަށާއި، އެކަން ކުރާނީ މެސީ ކަމަށް އުންމީދު ކުރާ ކަމަށެވެ. އަދި އެކަން ކުރުމަށް އަބަދު ވެސް މެސީ އަށް މަރުޙަބާ ކިޔާ ކަމަށް ވެސް ކްލޯސާ ބުނެފައިވެ އެވެ. އެކަން ފާހަގަކޮށް އޭރު ވެސް ކްލޯސާ ބުނެފައި ވަނީ، އޭނާ އަކީ މެސީ އަށް ވަރަށް ސަޕޯޓު ކުރާ މީހެއް ކަމަށެވެ. 

ފީފާ ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިންގެ ދެ ވަނައިގައި މިހާރު އޮތީ 16 ލަނޑާ އެކު ޖަރުމަނުގެ މިރޮސްލާވް ކްލޯސާ އާއި، ފްރާންސްގެ ކީލިއަން އެމްބާޕޭ އެވެ.