39 އަހަރުގެ ކުޅުންތެރިޔަކު ވޯލްޑް ކަޕްގެ ކުރީ ކޮޅު ފަސް ލަނޑު ޖެހުމަކީ އާދައިގެ ކަމެއް ނޫން: ރަންގްނިކް

އުމުރުން 39 އަހަރުގެ ކުޅުންތެރިޔަކު، ފީފާ ވޯލްޑް ކަޕްގެ އެންމެ ކުރީ ކޮޅު ފަސް ލަނޑު ޖެހުމަކީ އާދައިގެ ކަމެއް ނޫން ކަމަށް އޮސްޓްރިއާގެ ކޯޗު ރަލްފް ރަންގްނިކް ބުނެފި އެވެ.

އޭނާ މިހެން ބުނެފައި ވަނީ މުބާރާތުގެ ގުރޫޕު ސްޓޭޖުގައި އާޖެންޓީނާއާ ދެކޮޅަށް ކުޅެ، ބަލިވި މެޗަށް ފަހު ނޫސްވެރިންނާ ވާހަކަ ދައްކަމުންނެވެ. އެ މެޗުގައި އޮސްޓްރިއާ އިން ޑިފެންސް އަށް ސަމާލުކަން ދީގެން ކުޅެމުން ދަނިކޮށް، އާޖެންޓީނާގެ ކެޕްޓަން ލިއޮނަލް މެސީ ޖެހި ދެ ލަނޑާ އެކު އާޖެންޓީނާ ވަނީ މޮޅުވެފައި އެވެ.

ރަންގްނިކް ވަނީ މެސީ ދެއްކި ތަފާތު މޮޅު ކުޅުމަށް ވަރަށް ބޮޑަށް ތައުރީފު ކޮށްފައި އެވެ. އެގޮތުން އޭނާ ބުނީ 39 އަހަރުގެ ކުޅުންތެރިޔަކު ދެ ލަނޑު ޖަހައި، އަދި ވޯލްޑް ކަޕްގެ ކުރީ ކޮޅު ފަސް ލަނޑު ޖެހުމަކީ ތަފާތު ކަމެއް ކަމަށެވެ. މެޗުގެ ތަފާތަކަށް ފެނުނު މަންޒަރަކީ އެއީ ކަމަށް ވެސް ރަންގްނިކް ބުންޏެވެ. 

އިތުރަށް ރަންގްނިކް ބުނީ، މެސީ ހުރީ އޭނާގެ އަމިއްލަ ފެންވަރުގައި ކަމަށް އެންމެނަށް ވެސް ފެންނަން އޮތް ކަމަށެވެ. އަދި މެސީ ސާބިތު ކޮށްދިނީ އޭނާ އަކީ އެންމެ މޮޅު އެއް ކުޅުންތެރިޔާ، ނުވަތަ އެންމެ މޮޅު ކުޅުންތެރިޔާ ކަމަށް ވެސް ރަންގްނިކް ވަނީ ބުނެފައި އެވެ. ނަމަވެސް ރަންގްނިކް ޤަބޫލު ކުރާ ގޮތުގައި މެޗުގެ ފަހު ވަގުތު މެސީ ޖެހި ދެ ވަނަ ލަނޑަކީ، އޮސްޓްރިއާ އަށް ހެދުނު ވަރަށް ބޮޑު ގޯހަކުން ޖެހި ލަނޑެކެވެ.

މީގެ އިތުރުން ރަންގްނިކް ބުނީ މުޅި މެޗުގެ 90 މިނެޓުގައި މެސީ ހިފަހައްޓައިގެން ހުރުމަކީ ކުރަން އުނދަގޫ ކަމަކަށް ވާނެ ކަމަށެވެ. އެއާ އެކު ރަންގްނިކް ބުނީ، މެޗުގައި ވަކި ގޮތެއް ނިންމަން މެސީ އަށް މާ ބައިވަރު ގޮތް ތަކެއް ބޭނުން ނުވާނެ ކަމަށެވެ. އުމުރުން މިހާރު 38 އަހަރުގެ މެސީ އަށް، ބުދަ ދުވަހު 39 އަހަރު ފުރިއްޖެ އެވެ.

އާޖެންޓީނާ އަތުން ބަލިވި ނަމަވެސް، އޮސްޓްރިއާ އަށް މުބާރާތުގެ ގަދަ 32 ގެ ބުރުން ޖާގަ ހޯދުމުގެ ފުރުސަތު އެބަ އޮތެވެ. އެގޮތުން ފަހު މެޗުގައި އަލްޖީރިއާ ބަލިކޮށް އޮސްޓްރިއާ އަށް އަނެއް ބުރުން ޖާގަ ހޯދޭނެ އެވެ.